ການເຮັດສັນຍາໃດກໍຕາມ ຫາກເຮັດຂຶ້ນ ໂດຍທີ່ຕົນເອງບໍ່ມີສິດທີ່ຈະເຮັດສັນຍານັ້ນ ແທນບຸກຄົນອື່ນ ຍ່ອມຈະມີຜົນລົບຕາມມາ ທັງຕໍ່ຕົນເອງ ແລະ ບຸກຄົນອື່ນ.
ບຸກຄົນໃດ ທີ່ບໍ່ໄດ້ຮັບສິດໃຫ້ເປັນຜູ້ຕາງໜ້າ ຫາກເຮັດນິຕິກຳທີ່ພາໃຫ້ເກີດສິດ ແລະ ພັນທະແກ່ຜູ້ຖືກຕາງໜ້າ ຜູ້ກ່ຽວຕ້ອງຮັບຜິດຊອບຕໍ່ນິຕິກຳ ຫຼື ສັນຍານັ້ນ ເວັ້ນເສຍແຕ່ຜູ້ຖືກຕາງໜ້າຫາກເຫັນຮັບເອົາ.
ໃນກໍລະນີຜູ້ຖືກຕາງໜ້າຫາກຮູ້ ຫຼື ຄວນຮູ້ ກ່ຽວກັບການເຮັດນິຕິກຳໃດໜຶ່ງຂອງຜູ້ທີ່ບໍ່ມີສິດເປັນຜູ້ຕາງໜ້າ ແຕ່ບໍ່ທັກທ້ວງ ຫຼື ຄັດຄ້ານ ຫຼື ໃຫ້ການສະໜັບສະໜູນ ກໍຖືວ່ານິຕິກຳ ຫຼື ສັນຍານັ້ນ ໄດ້ຖືກຮັບຮູ້ໂດຍຜູ້ຖືກຕາງໜ້າ ຖ້າມີຄວາມເສຍຫາຍເກີດຂຶ້ນ ຜູ້ຕາງໜ້າກໍຕ້ອງຮັບຜິດຊອບ.
ຖ້າບຸກຄົນທີສາມ ຫາກຮູ້ວ່າຕົນໄດ້ເຮັດ ນິຕິກຳກັບຜູ້ບໍ່ມີສິດ ເປັນຜູ້ຕາງໜ້າແລ້ວ ໃຫ້ ແຈ້ງເປັນລາຍລັກອັກສອນ ແກ່ຜູ້ຖືກຕາງໜ້າ ເພື່ອໃຫ້ຕອບຕາມເວລາທີ່ຕົນໄດ້ກຳນົດໄວ້ ຖ້າໝົດກຳນົດເວລາດັ່ງກ່າວແລ້ວ ຫາກ ບໍ່ມີຄຳຕອບ ຖືວ່ານິຕິກຳນັ້ນບໍ່ຖືກຮັບຮອງ ໂດຍຜູ້ຖືກຕາງໜ້າ ໃນກໍລະນີ ບຸກຄົນທີສາມ ສາມາດຍົກເລີກນິຕິກຳນັ້ນໄດ້ຝ່າຍດຽວ ແລະ ຖ້າມີຄວາມເສຍຫາຍເກີດຂຶ້ນ ກໍມີສິດ ຮ້ອງຂໍໃຫ້ໃຊ້ແທນ ເວັ້ນເສຍແຕ່ຜູ້ກ່ຽວຫາກ ຮູ້ ຫຼື ຄວນຮູ້ໃນເວລາເຮັດນິຕິກຳນັ້ນ.
ສຳລັບຜູ້ຕາງໜ້າ ທີ່ເຮັດນິຕິກຳເກີນຂອບ ເຂດສິດຂອງຕົນ ຕ້ອງຮັບຜິດຊອບຕໍ່ນິຕິກຳນັ້ນ ເວັ້ນເສຍແຕ່ຜູ້ຖືກຕາງໜ້າຫາກເຫັນດີ ຮັບເອົາ.
ໃນກໍລະນີ ບຸກຄົນທີສາມ ຫາກເຊື່ອຢ່າງມີ ເຫດຜົນວ່າ ນິຕິກຳ ຫຼື ສັນຍາ ຊຶ່ງຜູ້ຕາງ ໜ້າເຮັດກັບຕົນນັ້ນ ຢູ່ໃນຂອບເຂດສິດຂອງການຕາງໜ້າ ຖືວ່າ ນິຕິກຳ ຫຼື ສັນຍາທີ່ ເຮັດຂຶ້ນນັ້ນ ເປັນການຖືກຕ້ອງ ຖ້າບຸກຄົນ ທີສາມ ຫາກຮູ້ວ່າຕົນໄດ້ເຮັດນິຕິກຳ ຫຼື ສັນຍາກັບຜູ້ຕາງໜ້າທີ່ເຮັດເກີນຂອບເຂດສິດ ສາມາດແຈ້ງເປັນລາຍລັກອັກສອນໃຫ້ຜູ້ຖືກຕາງໜ້າ ເພື່ອໃຫ້ຄຳຕອບຕາມເວລາທີ່ໄດ້ກຳນົດໄວ້ ຖ້າໝົດກຳນົດເວລາດັ່ງກ່າວແລ້ວ ຫາກບໍ່ມີຄຳຕອບ ກໍຖືວ່ານິຕິກຳ ຫຼື ສັນຍານັ້ນບໍ່ຖືກຮັບ ໃນກໍລະນີນີ້ ບຸກຄົນທີສາມ ສາມາດຍົກເລີກນິຕິກຳ ຫຼື ສັນຍານັ້ນໄດ້ ຝ່າຍດຽວ ແລະ ຖ້າມີຄວາມເສຍຫາຍເກີດຂຶ້ນ ກໍມີສິດຮ້ອງຂໍໃຫ້ໃຊ້ແທນເວັ້ນເສຍແຕ່ຜູ້ກ່ຽວຫາກຮູ້ ຫຼື ຄວນຮູ້ກ່ຽວກັບບັນຫາດັ່ງກ່າວ.
ໃນກໍລະນີ ຜູ້ຕາງໜ້າ ແລະ ບຸກຄົນທີສາມຫາກເຮັດນິຕິກຳ ຫຼື ສັນຍາເກີນຂອບເຂດໂດຍເຈດຕະນາ ຊຶ່ງກໍ່ຄວາມເສຍຫາຍໃຫ້ແກ່ຜູ້ຖືກຕາງໜ້າພວກກ່ຽວ ຕ້ອງຮ່ວມກັນຮັບຜິດຊອບຕໍ່ຄວາມເສຍຫາຍດັ່ງກ່າວ.
ໂດຍ: ໄມ້ງັດ