ພິທີມອບ-ຮັບເຄື່ອງນຸ່ງກີລາພີມລາຍ ຈາກບໍລິສັດ ມາຍເວ ສະປອດແວ ລາວ ຈຳນວນ 30 ຊຸດ ມູນຄ່າ 3 ລ້ານກວ່າກີບ ໃຫ້ແກ່ກຸ່ມສື່ມວນຊົນສາຍກີລາ ໄດ້ມີຂຶ້ນວັນທີ 21 ຕຸລາ 2020 ຢູ່ສະໜາມກີລາເຕະບານຫຍ້າທຽມ ມາຍເວ (ຫຼັງກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ) ບ້ານປາກທ້າງ ເມືອງສີໂຄດຕະບອງ ນະຄອນຫຼວງວຽງຈັນ ໂດຍເປັນການກ່າວມອບໂດຍທ່ານ ພຸດທະພອນ ສີວິໄຊ ປະທານບໍລິສັດ ມາຍເວ ສະປອດແວ ລາວ ແລະ ກ່າວຮັບແມ່ນທ່ານ ຕຸໄລເພັດ ພິມເມືອງ ຮອງປະທານກຸ່ມສື່ມວນຊົນສາຍກີລາ ມີທ່ານ ສຸກສາຄອນ ສີປະເສີດ ຜູ້ອຳນວຍການສູນໂຄສະນາຂ່າວສານການສຶກສາ ແລະ ກີລາ ທ່ານ ລຳພຽງ ຄຳຕິຍະເດດ ຜູ້ບໍລິຫານບໍລິສັດ ມາຍເວ ສະປອດແວ ລາວ ພ້ອມດ້ວຍສະມາຊິກຂອງທັງສອງພາກສ່ວນ ຕະຫຼອດຮອດສື່ມວນຊົນສາຍກີລາທຸກຂະແໜງການ ເຂົ້າຮ່ວມເປັນສັກຂີພິຍານ.
ໂອກາດນີ້ ທ່ານ ລຳພຽງ ຄຳຕິຍະເດດ ກ່າວວ່າ: ມື້ນີ້ ກໍເປັນໂອກາດທີ່ດີ ແລະ ກໍດີໃຈທີ່ສຸດ ທີ່ທາງບໍລິສັດພວກເຮົາໄດ້ເປັນສ່ວນໜຶ່ງໃນການສະໜັບສະໜູນໃຫ້ແກ່ທີມສື່ມວນຊົນສາຍກີລາລາວ ໄດ້ນຳໃຊ້ເຄື່ອງນຸ່ງກີລາງາມໆຂອງມາຍເວ ເພື່ອເຄື່ອນໄຫວຫຼິ້ນກີລາ ສ້າງໃຫ້ມີສຸຂະພາບແຂງແຮງ ແລະ ສືບຕໍ່ເປັນກະບອກສຽງສຳຄັນໃນການນຳສະເໜີຂ່າວການເຄື່ອນໄຫວວົງການກີລາລາວ ໃຫ້ພໍ່ແມ່ປະຊາຊົນຮັບຮູ້ຢ່າງທົ່ວເຖິງ ແລະ ຂໍໃຫ້ຄຳໝັ້ນສັນຍາວ່າ ບໍລິສັດ ມາຍເວ ສະປອດແວ ລາວ ຈະຂໍຄຽງບ່າຄຽງໄຫຼ່ເພື່ອຊຸກຍູ້ທີມນັກຂ່າວສາຍກີລາຕະຫຼອດໄປ ແນວໃດກໍດີ ໃນຕໍ່ໜ້າ ບໍລິສັດກໍໄດ້ມີວິໄສທັດ ແລະ ເປົ້າໝາຍຫຼັກ ແມ່ນຈະບຸກບືນສູ້ຊົນໃຫ້ຜະລິດຕະພັນເຄື່ອງພິມລາຍ ຂຶ້ນໄປຢືນໃນລະດັບແຖວໜ້າ ຕິດ 1 ໃນ 3 ຂອງ ສປປ ລາວ ເພື່ອຄຽງຄູ່ ແລະ ຮັບໃຊ້ສັງຄົມລາວຕະຫຼອດໄປ.
ຫຼັງຈາກພິທີມອບ-ຮັບໄດ້ສຳເລັດລົງ ໃນບັນຍາກາດດັ່ງກ່າວ ກໍໄດ້ມີການແຂ່ງຂັນເຕະບານນັດພິເສດເພື່ອຜູກແໜ້ນຄວາມສາມັກຄີຮັກແພງໃຫ້ສະມາຊິກພະນັກງານ ແລະ ນັກຂ່າວທັງສອງພາກສ່ວນແໜ້ນແຟ້ນຂຶ້ນຕື່ມອີກ ໂດຍໄດ້ມີການແຂ່ງຂັນເຕະບານ 3 ຕັ່ງ ຕັ່ງລະ 25 ນາທີ ຜ່ານການແຂ່ງຂັນ ຜົນປາກົດວ່າທັງສອງພາກສ່ວນບໍ່ສາມາດເອົາຊະນະກັນໄດ້ ສະເໝີກັນໄປແບບສຸດມ່ວນ 8-8 ປະຕູ.
# ພາບ & ຂ່າວ: ສີພອນ