ສີສັດຕະນາກປະເມີນຜົນມາດຕະຖານພົ້ນທຸກ ແລະ ການພັດທະນາ

ຫ້ອງການກະສິກຳ ແລະ ປ່າໄມ້ ເມືອງສີສັດຕະນາກ ນະຄອນຫຼວງວຽງຈັນ (ນວ) ຈັດກອງປະຊຸມເຜີຍແຜ່ເຊື່ອມຊຶມ ເກັບກຳຂໍ້ມູນຕາມລຳດັບເລກທີ 348/ລບ ວ່າດ້ວຍມາດຕະຖານພົ້ນທຸກ ແລະ ມາດຕະຖານພັດທະນາ ຂຶ້ນວັນທີ 21 ຕຸລາ 2020 ທີ່ຫ້ອງວ່າການປົກຄອງເມືອງສີສັດຕະນາກ ໂດຍມີທ່ານ ຫຼ້າສາຍ ນວນທາສິງ ຫົວໜ້າພະແນກກະສິກຳ ແລະ ປ່າໄມ້ ນວ ທ່ານ ພອນສິນ ສາວະລີ ຮອງເລຂາພັກເມືອງ ປະທານກວດກາພັກ-ລັດ ເມືອງສີສັດຕະນາກ ພ້ອມດ້ວຍຄະນະ ປະຈຳພັກ ຄະນະພັກຮາກຖານ ອຳນາດການປົກຄອງບ້ານ ແລະ ພາກສ່ວນກ່ຽວຂ້ອງເຂົ້າຮ່ວມ.

ໂອກາດນີ້ ທ່ານ ຊະນະ ແສງວິໄລ ຫົວໜ້າຫ້ອງການກະສິກຳ ແລະ ປ່າໄມ້ ເມືອງສີສັດຕະນາກ ໄດ້ຂຶ້ນຜ່ານບົດສະຫຼຸບ ການເຜີຍແຜ່ເຊື່ອມຊຶມ ເກັບກຳຂໍ້ມູນຕາມລຳດັບເລກທີ 348/ລບ ວ່າດ້ວຍມາດຕະຖານພົ້ນທຸກ ແລະ ມາດຕະຖານພັດ ທະນາ ປະຈຳປີ 2020 ຂອງເມືອງສີສັດຕະນາກ ເຊິ່ງທ່ານໄດ້ຍົກໃຫ້ເຫັນສະພາບລວມ ເມືອງສີສັດຕະນາກເປັນເມືອງໜຶ່ງໃນ 9 ຕົວເມືອງ ໃນ ນວ ມີ 37 ບ້ານ ມີ 841 ໜ່ວຍ ມີພົນລະເມືອງ 57.847 ຍິງ 30.233 ຄົນ ມີເນື້ອທີ່ລວມ 31 ກິໂລຕາແມັດ ພາຍຫຼັງທີ່ໄດ້ມີດຳລັດຂອງລັດຖະບານ ສະບັບເລກທີ 348/ລບ ແລະ ບົດແນະນຳຂອງກະຊວງກະສິກຳ ແລະ ປ່າໄມ້ ສະບັບເລກທີ 0830/ກປ ວ່າດ້ວຍມາດຕະຖານພົ້ນທຸກ ແລະ ມາດຕະຖານພັດທະນາ ຄະນະນຳເມືອງສີສັດຕະນາກ ໄດ້ຊີ້ນຳ-ນຳພາ ໃນການຜັນຂະຫຍາຍ ຈັດຕັ້ງປະຕິບັດຢູ່ເມືອງສີສັດຕະນາກ ໂດຍປະສານສົມທົບກັບພະແນກກະສິກຳ ແລະ ປ່າໄມ້ນະຄອນຫຼວງວຽງຈັນ ອອກຂໍ້ຕົກລົງຂອງທ່ານເຈົ້າເມືອງສີສັດຕະນາກ ວ່າດ້ວຍການແຕ່ງຕັ້ງຄະນະຮັບຜິດຊອບຊີ້ນຳ-ກວດກາຕິດຕາມມາດຕະຖານພົ້ນທຸກ ແລະ ມາດຕະຖານໃນການຈັດກອງປະຊຸມ ການເຮັດທົດລອງຕົວຈິງຢູ່ຂັ້ນຄອບຄົວ-ຂັ້ນບ້ານ ແລະ ອື່ນໆ ແບ່ງອອກເປັນ 4 ຂັ້ນຕອນ ຄື: 1. ການເຜີຍແຜ່ເຊື່ອມຊຶມເອກະສານ ຢູ່ຂັ້ນເມືອງ 2. ການເຮັດທົດ ລອງລົງເກັບກຳຂໍ້ມູນຂັ້ນຄອບຄົວ ແລະ ຂັ້ນບ້ານ 3. ການລົງເກັບກຳຂໍ້ມູນຕົວຈິງພາຍໃນເມືອງ ແລະ 4. ການສັງລວມ ວິເຄາະຂໍ້ມູນ ປັບປຸງ ແລະ ສະຫຼຸບຮັບຮອງ ແລະ ການກຳນົດແຜນພັດທະນາບ້ານ.

ຜ່ານການເກັບກຳຂໍ້ມູນຕົວຈິງ ທົ່ວເມືອງສີສັດຕະນາກມີ 37 ບ້ານ ມີຄອບຄົວທັງໝົດ 11.782 ຄອບຄົວ ມີພົນລະເມືອງທັງໝົດ 57.847 ຄົນ ຍິງ 30.233 ໄດ້ເກັບກຳຕົວຈີງ ຈຳນວນ 11.683 ຄອບຄົວ ເທົ່າກັບ 99,15 % ບໍ່ໄດ້ເກັບກຳຂໍ້ມູນຈຳນວນ 99 ຄອບຄົວ ເທົ່າກັບ 0,84% ຈຳນວນທີ່ບັນລຸຄົບ 6 ມາດຕະຖານ ມີ 11.676 ຄອບຄົວ ເທົ່າກັບ 99,94% ຈຳນວນທີ່ບັນລຸຄົບ 5 ມາດຕະຖານ ມີ 7 ຄອບຄົວເທົ່າກັບ 0,06 % ຈຳນວນຄອບຄົວທີ່ບັນລຸຄົບ 16 ຕົວຊີ້ບອກລົງມາມີ 7 ຄອບຄົວ.

ສັງລວມຈຳນວນຄອບຄົວຕາມແຕ່ລະມາດຕະຖານຄອບຄົວພັດທະນາ ບັນລຸ 11.676 ຄອບຄົວ ເທົ່າກັບ 99,94% ບໍ່ບັນລຸ 7 ຄອບຄົວ ເທົ່າກັບ 0,06 % ມາດຕະຖານບ້ານພົ້ນທຸກ ແລະ ບ້ານພັດທະນາຕາມແບບຟອມ ( F2 ) ສັງລວມຂໍ້ມູນມາດຕະຖານບ້ານພົ້ນທຸກຕາມ 8 ມາດຕະຖານ ຈຳນວນທີ່ບັນລຸຕາມ 8 ມາດຕະຖານ ບ້ານພົ້ນທຸກ ແລະ ບ້ານພັດທະນາ ບັນລຸໄດ້ ຈຳນວນ 37 ບ້ານ ເທົ່າກັບ 100%.