ກອງປະຊຸມເຜີຍແຜ່ບົດລາຍງານ ຜົນວິໄຈສະພາບຄວາມທຸກຍາກໃນ ສປປ ລາວ ຈາກຂໍ້ມູນຜົນການສຳ ຫຼວດການຊົມໃຊ້ ແລະ ການໃຊ້ຈ່າຍຂອງຄົວເຮືອນ ຄັ້ງທີ 6 (LECS VI) ປີ 2018-2019 ຈັດຂຶ້ນວັນທີ 20 ຕຸລາ 2020 ຢູ່ໂຮງແຮມແລນມາກ ນະຄອນຫຼວງວຽງຈັນ ໂດຍເປັນປະທານຂອງທ່ານນາງ ພອນສາຫຼີ ສຸກສະຫວັດ ຫົວໜ້າສູນສະຖິຕິແຫ່ງຊາດ ກະຊວງແຜນການ ແລະ ການລົງທຶນ ມີທ່ານ Nicola Pontara ຜູ້ອຳນວຍການທະນາຄານໂລກ ປະຈຳ ສປປ ລາວ ພ້ອມບັນດາຫົວໜ້າ ຮອງຫົວໜ້າກົມອ້ອມຂ້າງ ແລະ ຕາງໜ້າອົງການຈັດຕັ້ງສາກົນເຂົ້າຮ່ວມ.
ທ່ານ ນາງ ພອນສາຫຼີ ສຸກສະຫວັດ ກ່າວວ່າ: ຜົນການສຳຫຼວດການຊົມໃຊ້ ແລະ ການໃຊ້ຈ່າຍຂອງຄົວ ເຮືອນຄັ້ງທີ 6 ແມ່ນມີຄວາມສຳຄັນຫຼາຍ ໃຫ້ບັນດາການນຳ ແລະ ຜູ້ຊົມໃຊ້ທົ່ວໄປທີ່ມີຄວາມສົນໃຈນຳໃຊ້ຂໍ້ມູນເຂົ້າໃນວຽກງານການສ້າງນະໂຍບາຍ ແລະ ການວາງແຜນພັດທະນາເສດຖະກິດ-ສັງຄົມ ການວາງແຜນແກ້ໄຂ ແລະ ຫຼຸດຜ່ອນຄວາມທຸກຍາກໃນ ສປປ ລາວ ເຊິ່ງຈະສ່ອງແສງໃຫ້ເຫັນເຖິງໄລຍະການປ່ຽນແປງຂອງການພັດທະນາໃນຂົງເຂດເສດຖະກິດ ການຜະລິດ ການເຂົ້າເຖິງບໍລິການທາງດ້ານສາທາລະນະສຸກ ການສຶກສາ ແລະ ອື່ນໆ ແລະ ທີ່ສຳຄັນທີ່ສຸດ ແມ່ນທ່າອ່ຽງຂອງຄວາມທຸກຍາກໃນໄລຍະ 25 ປີຜ່ານມາ ອັດຕາສ່ວນຂອງປະຊາກອນທີ່ມີຄວາມທຸກຍາກ ໄດ້ຫຼຸດລົງຫຼາຍກວ່າເຄິ່ງໜຶ່ງ ຈາກ 46% ໃນປີ 1993 ມາເປັນ 18% ໃນປີ 2019.
ພາຍຫຼັງທີ່ສຳເລັດການປະກາດຜົນ LECS VI ແລ້ວ ສູນສະຖິຕິແຫ່ງຊາດໄດ້ສຶບຕໍ່ວິໄຈເລິກໃນຫົວຂໍ້ “ສະພາບຄວາມທຸກຍາກໃນ ສປປ ລາວ” ໂດຍພື້ນຖານແມ່ນອີງໃສ່ການສຳຫຼວດລາຍຈ່າຍ ແລະ ການບໍລິ ໂພກໃນລາວ (LECS) ທີ່ດຳເນີນໃນຂອບເຂດທົ່ວປະເທດ ໃນລະຫວ່າງປີ 2018-2019 ຂໍ້ມູນທີ່ໄດ້ຈາກ LECS ສະແດງໃຫ້ເຫັນວ່າ ອັດຕາຄວາມທຸກຍາກແຫ່ງຊາດລາວທີ່ຫຼຸດລົງ 6,3% ໃຊ້ເວລາຫຼາຍກວ່າ 6 ປີ ນັບຈາກ 24,6% ໃນປີ 2013 ເປັນ 18,3% ໃນປີ 2019 ໝາຍຄວາມວ່າ ເຖິງຢ່າງໃດກໍຕາມ ເກືອບ 5 ສ່ວນຂອງປະຊາຊົນລາວ ແມ່ນຍັງອາໄສຢູ່ໃນລະດັບລາຍຮັບຕ່ຳກວ່າລະດັບອັດຕາຄວາມທຸກຍາກແຫ່ງຊາດ 9.364 ກີບ ຫຼື (1ໂດລາ) ຕໍ່ມື້.
# ພາບ & ຂ່າວ: ຊິລິການດາ