ກະຊວງໄປສະນີໂທລະຄົມມະນາຄົມ ແລະ ການສື່ສານ (ປທສ) ຮ່ວມກັບພະແນກ ປທສ ນະຄອນຫຼວງວຽງຈັນ (ນວ) ຈັດກອງປະຊຸມເຜີຍແຜ່ຄວາມເຂົ້າໃຈກ່ຽວກັບການນຳໃຊ້ລະບົບຫ້ອງການທັນສະໄໝ (e-Office) ໃຫ້ບັນດາເມືອງ ແລະ ພະແນກການອ້ອມຂ້າງ ນວ ຂຶ້ນວັນທີ 20 ຕຸລາ 2020 ຢູ່ຫ້ອງວ່າການປົກຄອງ ນວ ໂດຍເປັນປະທານຂອງທ່ານ ສີຄອນ ອ່ອນສີພັນລາ ຫົວໜ້າພະແນກ ປທສ ນວ ທ່ານ ນາງ ຈັນຕະພອນ ຈັນສີລິລາດ ຮອງຫົວໜ້າສູນບໍລິຫານລັດດ້ວຍເອກເລັກໂຕຣນິກ ກະຊວງ ປທສ ມີຕາງໜ້າຈາກບັນດາເມືອງ ພະແນກການ ແລະ ພະນັກງານວິຊາການກ່ຽວຂ້ອງເຂົ້າຮ່ວມ.
ເພື່ອໃຫ້ພະນັກງານ-ວິຊາການຜູ້ທີ່ເຮັດວຽກງານຢູ່ຫ້ອງການ ໂດຍສະເພາະພະນັກງານຂາເຂົ້າ-ຂາອອກ ຢູ່ບັນດາເມືອງ ແລະ ພະແນກການອ້ອມຂ້າງ ນວ ໄດ້ຮັບຮູ້ ແລະ ເຂົ້າໃຈຂັ້ນຕອນການນຳໃຊ້ລະບົບດັ່ງກ່າວຢູ່ໃນອົງກອນຂອງຕົນ ໃຫ້ມີຄວາມສະດວກ ວ່ອງໄວ ແລະ ມີຄວາມທັນສະໄໝຫຼາຍຂຶ້ນ ເຊິ່ງລະບົບດັ່ງກ່າວນີ້ ເປັນລະບົບໜຶ່ງໃນການບໍລິຫານວຽກງານຂອງຫ້ອງການໃນຮູບແບບເອເລັກໂຕຣນິກ ແລະ ເຮັດວຽກໃນຮູບແບບອອນລາຍ ຜ່ານເວັບບຣາວເຊີ ແລະ ໂປຣແກຣມມືຖື (App) ເປັນຕົ້ນ ການຈັດເກັບບັນດາເອກະສານຂາເຂົ້າ-ຂາອອກ ທີ່ເຊື່ອມໂຍງກັນກັບພາກສ່ວນກ່ຽວຂ້ອງ ລວມທັງການມອບໝາຍວຽກງານຂອງຂັ້ນຫົວໜ້າກົມ ຄະນະພະແນກ ພະນັກງານ-ວິຊາການ ພ້ອມທັງສາມາດຕິດຕາມວຽກງານໄປຕາມແຕ່ລະຂັ້ນຕອນຂອງບຸຄະລາກອນພາຍໃນ ແລະ ຕາຕະລາງການເຄື່ອນໄຫວວຽກງານຂອງອົງກອນ ແລະ ອື່ນໆ ເຊິ່ງຈະມີຜົນປະໂຫຍດໃນການຊ່ວຍຫຼຸດຜ່ອນການເຮັດວຽກຂອງພະນັກງານ ສະດວກໃນການຕິດຕາມຄຸ້ມຄອງຂໍ້ມູນເອກະສານໃຫ້ມີຄວາມໂປ່ງໃສ ຮັບປະກັນຄວາມປອດໄພ ແລະ ຄວາມຖືກຕ້ອງດ້ານຂໍ້ມູນ ເຮັດໃຫ້ພະນັກງານມີຄວາມຮັບຜິດຊອບ ແລະ ເຮັດວຽກງ່າຍຂຶ້ນ ລວມທັງປະຢັດເວລາ ແລະ ມີປະສິດທິຜົນສູງ.
# ພາບ & ຂ່າວ: ລັດເວລາ