ທຸກຄົນອາດຈະເຄີຍເຂົ້າຮ່ວມ ເຄີຍເຫັນ ຫຼື ເຄີຍໄດ້ສຳຜັດກັບເຫດການຕົວຈິງຢູ່ໃນວົງສຸລາບາຢອງ ງານຊຶ່ງເຕັມໄປດ້ວຍບັນກາດທີ່ດີ ແລະ ບໍ່ດີ ເປັນມິດ ແລະ ບໍ່ເປັນມິດ ຫຼື ເປັນ ທັງງານເຮັດໃຫ້ມິດກາຍເປັນສັດຕູ ແລະ ເຮັດໃຫ້ສັດຕູກາຍເປັນມິດ ທັງໝົດນັ້ນແມ່ນຂຶ້ນກັບບຸກຄະລິກກະພາບຂອງຜູ້ຮ່ວມວົງດື່ມສຸລາ ໂດຍສະເພາະ ໃນການເວົ້າຈາພາທີ ມີອັນກໍເຂົ້າຫູຊ້າຍອອກຫູຂວາ ມີອັນກໍຖືກ ມີອັນກໍຜິດ ຖ້າບໍ່ມີບັ້ງອົດ ບັ້ງທົນກໍນຳໄປສູ່ ຄວາມເຈັບປວດ ມີອັນແຕກແຍກ ມີອັນ ເສຍຫາຍຕາມມາ ແຕ່ທີ່ໜ້າເສົ້າໃຈແມ່ນ ງານບາງງານກາຍເປັນສະຖານທີ່ສ້າງວີລະ ກຳທີ່ບໍ່ໜ້າຍົກຍ້ອງຂອງບາງບຸກຄົນ ເປັນຕົ້ນ ເກີດມີການທຳຮ້າຍຮ່າງກາຍເຊິ່ງກັນ ແລະ ກັນ ມີການຄາຕະກຳ ມີການລ່ວງລະເມີດ ທາງເພດ ແລະ ປາກົດການຫຍໍ້ທໍ້ອື່ນໆຕາມມາ.
ການເມົາເຫຼົ້າ ຫຼື ເມົາຢາເສບຕິດດ້ວຍ ຄວາມສະໝັກໃຈ ບໍ່ພຽງແຕ່ຈະເປັນເລື່ອງ ທີ່ຜິດຕໍ່ສິນທຳເທົ່ານັ້ນ ແຕ່ກົດໝາຍຍັງໄດ້ ກຳນົດໄວ້ເປັນຄວາມຜິດອີກດ້ວຍ ອັນໄດ້ແກ່ ຢາເສບຕິດທີ່ເສບເຂົ້າໄປແລ້ວຈະກໍ່ອັນຕະ ລາຍຕໍ່ຊີວິດ ຮ່າງກາຍ ກຽດຊື່ສຽງ ຊັບສິນຂອງບຸກຄົນອື່ນ ແລະ ນຳມາຊຶ່ງຄວາມ ສູນເສຍ ແລະ ມີຜົນສະທ້ອນອັນໃຫຍ່ຫຼວງຕໍ່ ສັງຄົມໂດຍກົງ ຖ້າຫາກການມືນເມົານັ້ນ ເປັນເຫດໃຫ້ຜູ້ນັ້ນຄວບຄຸມສະຕິ ຫຼື ບັນຊາ ການກະທຳຂອງຕົນເອງບໍ່ໄດ້ ແລະ ໄດ້ສ້າງ ຄວາມວຸ້ນວາຍ ຫຼື ໄດ້ມີການກະທຳທີ່ຝ່າ ຝືນກົດໝາຍ ກໍຈະເປັນສາເຫດທີ່ພາໃຫ້ມີ ການເພີ່ມຄວາມຮັບຜິດຊອບທາງອາຍາໜັກຂຶ້ນ.
ຄວາມໝາຍຂອງການມືນເມົາດ້ວຍຄວາມ ສະໝັກໃຈ ໝາຍເຖິງສານທີ່ມີລິດຕໍ່ຈິດປະສາດ ກໍ່ໃຫ້ເກີດຜົນກະທົບຕໍ່ຈິດໃຈ ລວມທັງ ສິ່ງທີ່ມີລັກສະນະໃນການລະງັບປະສາດ ດ້ວຍການເສບ ດ້ວຍວິທີໃດກໍຕາມ ບໍ່ວ່າຈະ ເປັນການນຳເຂົ້າທາງປາກ ທາງຮູດັງ ຫຼື ທາງອະໄວຍະວະອື່ນ ເຊັ່ນ: ສີດເຂົ້າໃນຮ່າງ ກາຍ ເຮັດໃຫ້ເກີດອາການມືນເມົາ ເຖິງຂັ້ນທີ່ເຮັດໃຫ້ບຸກຄົນນັ້ນຂາດສະຕິສຳນຶກຈົນບໍ່ສາມາດບັນຊາການກະທຳຂອງຕົນເອງໄດ້ ແລ້ວໄປກະທຳຜິດທາງອາຍາ ຊຶ່ງປະມວນ ກົດໝາຍອາຍາບໍ່ໃຫ້ຖືເອົາເຫດຂອງຄວາມມືນເມົາດ້ວຍຄວາມສະໝັກໃຈເປັນຂໍ້ອ້າງ ແກ້ຕົວ ເພື່ອໃຫ້ຫຼຸດພົ້ນຈາກຄວາມຮັບຜິດ ຊອບຄວາມເສຍຫາຍທີ່ຕົນໄດ້ກໍ່ຂຶ້ນ.
ເຫດຜົນທີ່ປະມວນກົດໝາຍອາຍາ ບໍ່ຍອມ ຍົກເອົາສາເຫດຂອງຄວາມມືນເມົາດ້ວຍ ຄວາມສະໝັກໃຈມາເປັນຂໍ້ແກ້ຕົວນັ້ນ ເພາະ ສິ່ງມືນເມົາເປັນສາເຫດອັນສຳຄັນ ທີ່ກໍ່ໃຫ້ ເກີດຄວາມເສຍຫາຍໂດຍກົງຕໍ່ຊີວິດ ຮ່າງ ກາຍ ແລະ ຊັບສິນ ບາງຄັ້ງເຖິງຂັ້ນກໍ່ອາ ຊະຍາກຳທີ່ຮ້າຍແຮງ ຖ້າຫາກປະມວນກົດ ໝາຍຍອມໃຫ້ຍົກເວັ້ນເອົາຄວາມມືນເມົາ ດ້ວຍຄວາມສະໝັກໃຈ ມາເປັນຂໍ້ແກ້ຕົວໃຫ້ພົ້ນຈາກຄວາມຮັບຜິດຊອບທາງອາຍາ ແລະ ການລົງໂທດ ຊຶ່ງຈະກາຍເປັນການສະໜັບສະໜູນ ຫຼື ສົ່ງເສີມໃຫ້ມີການກະທຳຜິດຈາກສາເຫດດັ່ງກ່າວນີ້ເພີ່ມຂຶ້ນ ເນື່ອງຈາກຜົນປະໂຫຍດທາງສ່ວນຕົວຂອງຜູ້ກະທຳຜິດ ໃນແງ່ໜຶ່ງການທີ່ກົດໝາຍບໍ່ຍອມ ໃຫ້ຍົກເອົາເຫດການຂອງການມືນເມົາມາເປັນຂໍ້ແກ້ຕົວ ກໍເທົ່າວ່າເປັນການປາບປາມ ແລະ ສະກັດກັ້ນສັນດານຜູ້ທີ່ມີນິໄສມັກມືນ ເມົາໃຫ້ມີສະຕິລະວັງຕົວ ບໍ່ໃຫ້ຕົນມືນເມົາ ຈົນເຖິງຂັ້ນຄວບຄຸມສະຕິຂອງຕົນເອງບໍ່ໄດ້ ເພາະຖ້າເກີດຄວາມມືນເມົາແລ້ວກະທຳ ຄວາມຜິດ ກໍບໍ່ສາມາດທີ່ຈະຍົກເອົາເປັນຂໍ້ ແກ້ຕົວໄດ້ ສັງລວມແລ້ວ ຖ້າບຸກຄົນໃດ ຫາກໄດ້ກະທຳຜິດໃນເວລາມືນເມົາ ຈະພາ ໃຫ້ມີການເພີ່ມຄວາມຮັບຜິດຊອບທາງອາຍາ ໂດຍບໍ່ຕ້ອງສົງໄສ.
ໂດຍ: ໄມ້ງັດ