ການປ້ອງກັນ ແລະ ລະວັງໄພຂອງ COVID-19 ຍັງຄົງເປັນສິ່ງທີ່ຫຼາຍປະເທດໃຫ້ຄວາມສຳຄັນໃນເວລານີ້ ແລະ ເທົ່າທີ່ຜ່ານມາ ມີລາຍງານຄວາມສຳເລັດໃນການຄົ້ນຄວ້າວິໄຈ ເພື່ອຊ່ວຍໃຫ້ຜູ້ຄົນສາມາດໃຊ້ຊີວິດໄດ້ເໝືອນປົກກະຕິຫຼາຍທີ່ສຸດ ເທົ່າທີ່ຈະຫຼາຍໄດ້ແດ່ແລ້ວ.
ຕົວຢ່າງຂອງການໃຊ້ເຕັກໂນໂລຊີເພື່ອສູ້ກັບການລະບາດຕົວຢ່າງໜຶ່ງ ເກີດຂຶ້ນໃນປະເທດຫວຽດນາມ ທີ່ພະຍາຍາມຍູ້ດັນການໃຊ້ “ຫຸ່ນຍົນ” ຢ່າງຕໍ່ເນື່ອງ.
ເຕັກໂນໂລຊີທີ່ຫວຽດນາມເນັ້ນຢ້ຳໃນໄລຍະນີ້ ຄືປັນຍາປະດິດ ຫຼື Artificial Intelligence (AI) ເຊິ່ງຖືກນຳມາໃຊ້ໃນການຮວບຮວມຂໍ້ມູນ ເພື່ອປະເມີນສະຖານະການ ແລະ ຄາດການວ່າຈະມີການລະບາດທີ່ຈຸດໃດແດ່ ແລະ ການໃຊ້ຫຸ່ນຍົນເຮັດໜ້າທີ່ບໍລິການໃນຮ້ານອາຫານ ເພື່ອຫຼຸດການສຳຜັດກັນຂອງຜູ້ຄົນ.
ຍິ່ງໄປກວ່ານັ້ນ ຍັງມີການໃຊ້ Chatbot ຫຼື ໂປຣແກຣມທີ່ຖືກສ້າງມາ ເພື່ອອຳນວຍຄວາມສະດວກໃນການຊ່ວຍຕອບແຊັດ ໂດຍເຕັກໂນໂລຊີນີ້ຖືກໃຊ້ເພື່ອກະຈາຍຂໍ້ມູນ ລວມທັງການເກັບຂໍ້ມູນຜ່ານລະບົບ face recognition ຫຼື ລະບົບກວດຈັບ ແລະ ຮູ້ຈຳໃບໜ້າ ການຄາດການທິດທາງຂອງສະຖານະການດ້ວຍການເຮັດ mapping ແລະ ການພັດທະນາໂປຣແກຣມ ເພື່ອຮັບມືກັບຂ່າວລືຕ່າງໆກ່ຽວກັບການລະບາດດ້ວຍ.
ບໍລິສັດ FPT Corp ເຊິ່ງເປັນທຸລະກິດໂທລະຄົມມະນາຄົມ ແລະ ຜູ້ພັດທະນາຊອຟແວຣ໌ທີ່ໃຫຍ່ທີ່ສຸດຂອງຫວຽດນາມ ຄືໜຶ່ງໃນຜູ້ທີ່ໃຊ້ປະໂຫຍດຈາກເຕັກໂນໂລຊີໃນການຊ່ວຍຄວບຄຸມການລະບາດຜ່ານ Web Application ຫຼື ເວັບໄຊທີ່ນຳເອົາໂປຣແກຣມຄອມພິວເຕີທີ່ເຊື່ອມຕໍ່ຖານຂໍ້ມູນຮຽບຮ້ອຍແລ້ວ ເພື່ອຄວາມສະດວກຂອງຜູ້ໃຊ້ງານທີ່ຊື່ວ່າ Corona Check ແລະ ເປີດໃຫ້ຊາວຫວຽດນາມໃສ່ຂໍ້ມູນກ່ຽວກັບສະຖານທີ່ທີ່ຕົນຫາກໍໄປມາເມື່ອບໍ່ນານມານີ້ ແລ້ວແອັບຈະດຳເນີນການກວດສອບກັບຂໍ້ມູນລະດັບປະເທດ ຕັ້ງແຕ່ເລື່ອງຂອງສະຖານທີ່ຕັ້ງ ໄປຈົນເຖິງໄລຍະເວລາ ແລະ ຈຳນວນຜູ້ຕິດເຊື້ອ ເພື່ອຄຳນວນຫາຄວາມໜ້າຈະເປັນວ່າ ມີຜູ້ໃດໄດ້ສຳຜັດກັບເຊື້ອໄວຣັສ COVID-19 ຫຼືບໍ່.
ຜູ້ບໍລິຫານຂອງບໍລິສັດ ບອກກັບຜູ້ສື່ຂ່າວວ່າ ລະບົບນີ້ມີຄວາມແມ່ນຢຳໃນການຄາດການຄວາມໜ້າຈະເປັນຂອງການຕິດເຊື້ອໄດ້ເຖິງ 90% ແລະ ຈະແມ່ນຢຳໄດ້ກວ່ານີ້ ຫາກມີຜູ້ຄົນເຂົ້າມາໃຊ້ງານ ແລະ ປ້ອນຂໍ້ມູນເພື່ອຊ່ວຍປະເມີນຫຼາຍຂຶ້ນ.
ລາຍງານຂ່າວລະບຸວ່າ ລະບົບດັ່ງກ່າວສາມາດເຮັດວຽກໄດ້ຂ້ອນຂ້າງມີປະສິດທິພາບ ເພາະລັດຖະບານຫວຽດນາມມີການຈັດເກັບ ແລະ ເປິດເຜີຍລາຍງານການລະບາດທີ່ບໍ່ເປິດເຜີຍຕົວຜູ້ຕິດເຊື້ອ ແຕ່ໃຫ້ຂໍ້ມູນຢ່າງລະອຽດກ່ຽວກັບສະຖານທີ່ທີ່ແຕ່ລະຄົນເດີນທາງໄປມາ ເຊິ່ງເປັນລາຍງານທີ່ມີເອກະລັກສະເພາະຕົວ ເມື່ອທຽບກັບການລາຍງານໃນປະເທດອື່ນໆ.
ຄວາມກ້າວໜ້າທາງວິທະຍາສາດ ແລະ ເຕັກໂນໂລຊີເຫຼົ່ານີ້ ເປັນພຽງສ່ວນໜຶ່ງຂອງຄວາມພະຍາຍາມຂອງມະນຸດ ທີ່ຈະເອົາຊະນະໂລກໄພໄຂ້ເຈັບ ແລະ ຊ່ວຍໃຫ້ຊີວິດຄວາມເປັນຢູ່ຂອງຜູ້ຄົນປອດໄພ ແລະ ສະດວກສະບາຍຂຶ້ນ ແຕ່ໃນຂະນະດຽວກັນ ຄວາມຮັບຮູ້ເຖິງສະຖານະການອ້ອມຕົວ ແລະ ການຮ່ວມມືກັນໃນການປະຕິບັດຕາມຂໍ້ແນະນຳຕ່າງໆ ໂດຍບໍ່ຕື່ນຕົກໃຈໄປ ລວມທັງການແບ່ງປັນຂໍ້ມູນທີ່ຖືກຕ້ອງ ຍັງຄົງເປັນສິ່ງທີ່ເຮົາທຸກຄົນຄວນເຮັດຈົນກວ່າວິກິດນີ້ຈະຜ່ານພົ້ນໄປ.