ງານມະຫະກຳ ສີມືຫັດຖະກຳລາວ ຄັ້ງທີ 19 ປະຈຳປີ 2020 ພາຍໃຕ້ຄຳຂວັນ “ສີໄມ້ລາຍມື ຄືອຸທິຍານແຫ່ງການທ່ອງທ່ຽວຕາມຮອຍປູ່ຍ່າຕາຍາຍ” ໄດ້ເປີດຢ່າງເປັນທາງການວັນທີ 12 ຕຸລາ ແລະ ຈະດຳເນີນໄປຮອດວັນທີ 18 ຕຸລາ 2020 ທີ່ສູນການຄ້າລາວ-ໄອເຕັກ ນະຄອນຫຼວງວຽງຈັນ.
ງານຄັ້ງນີ້ ມີສິນຄ້າຫັດຖະກຳໃຫ້ຢ້ຽມຊົມ ແລະ ຈຳໜ່າຍຫຼາຍກວ່າ 200 ຮ້ານຈາກທົ່ວປະເທດເປັນຕົ້ນ ເຄື່ອງຫັດຖະກຳຜ້າໄໝ ຜ້າຝ້າຍພື້ນເມືອງ ເຄື່ອງເງິນ ວັດຖຸມີຄ່າ ເຄື່ອງທອງເຫຼືອງ ເຄື່ອງປັ້ນດິນເຜົາ ເຄື່ອງຈັກສານຈາກໄມ້ປ່ອງ ຫວາຍ ແລະ ເຄື່ອງຊົນເຜົ່າ ພ້ອມນັ້ນ ຍັງມີການສາທິດການຜະລິດສິນຄ້າຫັດຖະກຳລາວ ແລະ ເຝິກອົບຮົມການແຂ່ງຂັນຕົບແຕ່ງຮ້ານ ການແຂ່ງຂັນອອກແບບຜະລິດຕະພັນໃໝ່ ເພື່ອຕໍ່ຍອດສີມີປູ່ຍ່າຕາຍາຍ ສົ່ງເສີມຜະລິດຕະພັນລາວທ່ຽວລາວ ກິດຈະກຳອາພອນເພດອັນສວຍງາມ ແລະ ການສະແດງວັນນະຄະດີຫຼາຍປະເພດ ນອກນີ້ ຍັງມີການເສວະນາຫຼາຍຫົວຂໍ້ເຊັ່ນ: ການນຸ່ງຖືແບບລາວ ສ້າງຄວາມຍືນຍົງໃຫ້ຊາວຊ່າງຫັດຖະກຳ ການເຂົ້າຫາແຫຼ່ງທຶນ SME ການປົກປ້ອງການອອກແບບລາຍດັ່ງເດີມຈາກການລະເມີດລິຂະສິດຢູ່ລາວ ການສ້າງຄວາມອາດສາມາດໃນຂົງເຂດການຕະຫຼາດທາງອອນລາຍ ໃຫ້ແກ່ຜູ້ປະກອບການ SME ການຫັນວິກິດໃຫ້ເປັນໂອກາດແກ່ສິນຄ້າຫັດຖະກຳລາວ ແລະ ການຕະຫຼາດ ມາດຕະຖານຜະລິດຕະພັນ-ການຫຸ້ມຫໍ່ ແລະ ການສ້າງແຮງຈູງໃຈໃຫ້ແກ່ຊາວໜຸ່ມ ຫັນມາເຫັນຄວາມສຳຄັນໃນການນຳໃຊ້ຜະລິດຕະພັນຫັດຖະກຳລາວ.
# ພາບ & ຂ່າວ: ຂັນທະວີ