ທ່ານ ບຸນມີ ອຸ່ນນາທີ ພະນັກງານຮັບຜິດຊອບຕາດກວາງຊີ ໃຫ້ສຳພາດວ່າ: ໃນໄຍລະບໍ່ທັນເກີດມີການລະບາດຂອງພະຍາດໂຄວິດ-19 ຕາດກວາງຊີສາມາດສ້າງລາຍຮັບຈາກການບໍລິການຕ່າງໆໃນແຕ່ລະວັນບໍ່ຫຼຸດ 10 ລ້ານກີບ ຖ້າແມ່ນວັນ ຫຼື ໂອກາດສຳຄັນຕ່າງໆ ສາມາດສ້າງລາຍຮັບໄດ້ບໍ່ຕ່ຳກວ່າ 15 ລ້ານກີບຕໍ່ວັນ ຍ້ອນມີນັກທ່ອງທ່ຽວຕ່າງປະເທດເຂົ້າມາທ່ອງທ່ຽວເປັນຈຳນວນຫຼວງຫຼາຍ ເປັນຕົ້ນແມ່ນ ນັກທ່ອງທ່ຽວທີ່ມາຈາກປະເທດຈີນ ແຕ່ມາໄລຍະຕົ້ນປີ 2020 ໄດ້ມີການລະບາດຂອງພະຍາດໂຄວິດ-19 ຕາດກວາງຊີໄດ້ປິດບໍລິການໄລຍະໜຶ່ງ ຕາມຄຳສັ່ງຂອງລັດຖະບານ ເພື່ອປ້ອງກັນການລະບາດຂອງພະຍາດດັ່ງກ່າວ.
ປັດຈຸບັນ ການທ່ອງທ່ຽວຢູ່ຕາດກວາງຊີເລີ່ມກັບມາຄຶກຄື້ນດ້ວຍນັກທ່ອງທ່ຽວ ຫຼັງຈາກລັດຖະບານໄດ້ມີມາດຕະການຜ່ອນຜັນໃນການປ້ອງກັນ ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ແຕ່ນັກທ່ອງທ່ຽວເກືອບ 100% ແມ່ນນັກທ່ອງທ່ຽວພາຍໃນປະເທດ ສ່ວນນັກທ່ອງທ່ຽວຕ່າງປະເທດມີຈຳນວນໜ້ອຍ ສ່ວນໃຫຍ່ແມ່ນນັກທ່ອງທ່ຽວທີ່ເປັນວິຊາການ ຫຼື ຊ່ຽວຊານທີ່ມາເຮັດວຽກຢູ່ລາວເທົ່ານັ້ນ ສະເລ່ຍແລ້ວ ມື້ໜຶ່ງສາມາດສ້າງລາຍຮັບໄດ້ຫຼາຍກວ່າ 1 ລ້ານກີບ ເຊິ່ງລາຍຮັບດັ່ງກ່າວ ເຖິງວ່າບໍ່ຫຼາຍຄືເມື່ອກ່ອນກໍຕາມ ແຕ່ກໍເປັນສັນຍານທີ່ດີຂຶ້ນ ເນື່ອງຈາກວ່ານັກທ່ອງທ່ຽວພາຍໃນປະເທດເຂົ້າມາທ່ຽວຊົມຕາດກວາງຊີມີທ່າອ່ຽງເພີ່ມຂຶ້ນ ໂດຍສະເພາະໃນໄລຍະທ້າຍອາທິດ.
ທ່ານ ບຸນມີ ອຸ່ນນາທີ ກໍໄດ້ເຊີນຊວນນັກທ່ອງທ່ຽວພາຍໃນປະເທດ ເຂົ້າມາທ່ອງທ່ຽວຕາດກວາງຊີ ກໍຄືສະຖານທີ່ທ່ອງທ່ຽວແຫ່ງຕ່າງໆພາຍໃນແຂວງຫຼວງພະບາງໃຫ້ຫຼາຍຂຶ້ນ ເພາະເປັນແຂວງທີ່ມີສະຖານ ທີ່ທ່ອງທ່ຽວທາງທຳມະຊາດ ວັດທະນະທຳ ແລະ ປະຫວັດສາດຫຼາຍແຫ່ງທີ່ໜ້າສົນໃຈ ໃນນີ້ ຕາດກວາງຊີຢູ່ຫ່າງຈາກເທດສະບານນະຄອນຫຼວງພະບາງໄປທາງທິດຕາເວັນຕົກສ່ຽງໃຕ້ປະມານ 30 ກິໂລແມັດ ຕາດແຫ່ງນີ້ ເປັນນ້ຳຕົກຫີນປູນຂະໜາດໃຫຍ່ ທີ່ສູງປະມານ 81 ແມັດ ກວ້າງສຸດ 35 ແມັດ ປະກອບດ້ວຍ 6 ຊັ້ນ ມີສາຍນ້ຳໄຫຼອາບມາຕາມໜ້າຜາ ຜ່ານຫີນນ້ອຍໃຫຍ່ ຮູບຊົງແປກຕາ ລົງສູ່ອ່າງນ້ຳເບື້ອງລຸ່ມ ແລະ ມີນ້ຳໄຫຼຕະຫຼອດປີ ສຳລັບຄ່າເຂົ້າຊົມ ຄົນລາວ 10.000 ກີບ ແລະ ຕ່າງປະເທດ 20.000 ກີບ ສ່ວນເດັກນ້ອຍອາຍຸຕ່ຳກວ່າ 8 ປີ ບໍ່ໄດ້ເສຍຄ່າເຂົ້າຊົມ.
# ພາບ & ຂ່າວ: ອົ່ນໄຟສົມທອງ