ພິທີມອບ-ຮັບ ແລະ ເປີດນຳໃຊ້ສະຖານີອ້າງອີງຄ່າພິກັດທາງພູມສາດ CORS ລະຫວ່າງກົມທີ່ດິນ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ກັບບໍລິສັດ ຢູນິເທັກ ຈຳກັດ ຈັດຂຶ້ນວັນທີ 9 ຕຸລາ 2020 ຢູ່ກົມທີ່ດິນ ກ່າວມອບໂດຍທ່ານ ຈັນດາວົງ ສຸທິທຳ ອຳນວຍການບໍລິສັດ ຢູນິເທັກ ຈຳກັດ ແລະ ກ່າວຮັບຂອງທ່ານ ອານົງສອນ ພົມມະຈັນ ຫົວໜ້າກົມທີ່ດິນ ໂດຍເປັນກຽດເຂົ້າຮ່ວມຂອງທ່ານ ສົມມາດ ພົນເສນາ ລັດຖະມົນຕີກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ຫົວໜ້າຫ້ອງການຊັບພະຍາກອນທຳມະ ຊາດ ແລະ ສິ່ງແວດລ້ອມເມືອງ ແລະ ແຂກທີ່ຖືກເຊີນເຂົ້າຮ່ວມ.
ທ່ານ ອານົງສອນ ພົມມະຈັນ ກ່າວວ່າ: ກົມທີ່ດິນ ມີແຜນຈະສ້າງສະຖານີອ້າງອີງການສຳຫຼວດ-ວັດແທກແບບຕໍ່ເນື່ອງ CORS ແຕ່ປີ 2016-2022 ໃນຂອບເຂດທົ່ວປະເທດ ໃຫ້ໄດ້ຈຳນວນ 77 ສະຖານີ ມາຮອດປັດຈຸບັນ ໄດ້ສຳເລັດການກໍ່ສ້າງ ການຕັ້ງຄ່າ ການສຳຫຼວດ-ວັດແທກ ດຶງຈຸດອ້າງອີງເຂົ້າສະຖານີ CORS ສາມາດນຳໃຊ້ໄດ້ທັງໝົດ 22 ສະຖານີ ເຄົ້າມູນອ້າງອີງໃນການສຳຫຼວດ-ວັດແທກ ດຶງຈຸດອ້າງອີງເຂົ້າສະຖານີ ແມ່ນຖືເອົາຈຸດພິກັດຂັ້ນ I ເຊິ່ງໄດ້ຄຳນວນໃນລະບົບພິກັດພູມສາດ ແລະ ລະບົບສາກ ດ້ວຍລະບົບ WGS84 Universal Transverse Mercator ເປັນຈຸດອ້າງອີງ ເຊິ່ງກົມແຜນທີ່ແຫ່ງຊາດໄດ້ສ້າງໄວ້ໃນເມື່ອກ່ອນ ໂດຍມີການປະສານສົມທົບກັບພາກສ່ວນທີ່ກ່ຽວຂ້ອງ ໃນການຈັດຕັ້ງປະຕິບັດ ໃນຈຳນວນ 22 ສະຖານີ ໄດ້ຖືກນຳໃຊ້ເຂົ້າໃນການສຳຫຼວດ-ວັດແທກຕອນດິນ ສ້າງແຜນທີ່ຕາດິນ ແລະ ຂຶ້ນທະບຽນອອກໃບຕາດິນ ໂດຍຈະມີການສືບຕໍ່ກໍ່ສ້າງໃຫ້ສຳເລັດໃນຈຳນວນ 55 ສະຖານີ ເຊິ່ງນອນໃນ 55 ເມືອງ ແລະ 17 ແຂວງໃນຂອບເຂດທົ່ວປະເທດ ໃຫ້ສຳເລັດຕາມແຜນທີ່ວາງໄວ້.
ການວັດແທກລະບົບ GNSS CORS Network ແມ່ນເຕັກໂນໂລຊີທີ່ທັນສະໄໝ ໃນວຽກງານສຳ ຫຼວດວັດແທກທີ່ມີຄວາມສະດວກ ວ່ອງໄວ ແລະ ຄວາມຊັດເຈນສູງ ເຊິ່ງລະບົບດັ່ງກ່າວ ແມ່ນມີຜົນດີຫຼາຍດ້ານໃນການຫຼຸດຄ່າໃຊ້ຈ່າຍ ບໍ່ວ່າຈະເປັນການນຳໃຊ້ບຸຄະລາກອນໄລຍະເວລາໃນການສຳຫຼວດ ແລະ ປະຢັດງົບປະມານໃນການຈັດຊື້ອຸປະກອນ ເນື່ອງຈາກລະບົບດັ່ງກ່າວສາມາດເຊື່ອມໂຍງກັບສະຖານີ CORS ກໍສາມາດນຳໃຊ້ໄດ້ເລີຍ ເຊິ່ງມີຄວາມສະດວກຫຼາຍ ຖ້າທຽບໃສ່ກັບການສຳຫຼວດໃນເມື່ອກ່ອນ.
# ຂ່າວ & ພາບ: ຊິລິການດາ