ຕະຫຼາດນັດ ລາວສຳພັນ ສົ່ງເສີມສິນຄ້າກະສິກຳອິນຊີ ສິນຄ້າໜຶ່ງເມືອງ ໜຶ່ງຜະລິດຕະພັນ (ODOP) ແລະ ສິນຄ້າຄອບຄົວຕົວແບບ ປະຈຳປີ 2020 ຈະຈັດຂຶ້ນວັນທີ 18-22 ຕຸລາ 2020 ຢູ່ຕະຫຼາດລາວສຳພັນ ບ້ານຊຳເກດ ເມືອງສີໂຄດຕະບອງ ນະຄອນຫຼວງວຽງຈັນ (ນວ) ໂດຍຈະມີ 99 ຫົວໜ່ວຍ 90 ຫ້ອງວາງສະແດງເຂົ້າຮ່ວມ ໃນນີ້ ສິນຄ້າ ODOP 30 ຫົວໜ່ວຍ ສິນຄ້າຄອບຄົວຕົວແບບພາຍໃນເມືອງ ແລະ ແຕ່ລະເມືອງ 20 ຫົວໜ່ວຍ ສິນຄ້າກະສິກຳອິນຊີ 30 ຫົວໜ່ວຍ ພ້ອມສິນຄ້າປະເພດອາຫານ-ເຄື່ອງດື່ມຈຳນວນໜຶ່ງເຂົ້າຮ່ວມ.
ຈຸດປະສົງເພື່ອຊຸກຍູ້-ສົ່ງເສີມການຜະລິດສິນຄ້າກະສິກຳອິນຊີ ສິນຄ້າ ODOP ສິນຄ້າຄອບຄົວຕົວແບບ ແລະ ດ້ານການຕະຫຼາດຂອງສິນຄ້າຂອງ ນວ ຊຸກຍູ້ເສດຖະກິດໃນໄລຍະລັດຖະບານຜ່ອນຜັນການສະກັດກັ້ນການແຜ່ລະບາດຂອງພະຍາດໂຄວິດ-19 ສ້າງຂະບວນການຕ້ອນຮັບກອງປະຊຸມໃຫຍ່ ຄັ້ງທີ VII ຂອງອົງຄະນະພັກ ນວ ທີ່ຈະໄຂຂຶ້ນໃນໄວໆນີ້ ທັງເປັນການສະແດງໃຫ້ເຫັນຜະລິດຕະພັນທີ່ເປັນທ່າແຮງຂອງເມືອງສີໂຄດຕະບອງ ເພື່ອກຳນົດໃຫ້ເປັນຜະລິດຕະພັນທີ່ເປັນເອກະລັກ ສາມາດສ້າງໄດ້ກຸ່ມການຜະລິດເປັນສິນຄ້າທີ່ເປັນທ່າແຮງຂອງບ້ານ ເມືອງ ແລະ ນວ ໃນຕໍ່ໜ້າ ນອກນີ້ ຍັງເປັນການສ້າງຄວາມເຂັ້ມແຂງໃຫ້ຫົວໜ່ວຍທຸລະກິດທີ່ເຮັດການຜະລິດສາມາດເຂົ້າເຖິງຕະຫຼາດພາຍໃນ ແລະ ເຊື່ອມໂຍງຕະຫຼາດປະຊາຄົມເສດຖະກິດອາຊຽນ.
ສຳລັບຫ້ອງວາງສະແດງ ແລະ ສິ່ງອຳນວຍຄວາມສະດວກຕ່າງໆ ແມ່ນບໍ່ໄດ້ເສຍຄ່າ ໂດຍບໍລິສັດ ລາວສຳພັນ ພັດທະນາ ຈຳກັດຜູ້ດຽວ ເຈົ້າຂອງຕະຫຼາດລາວສຳພັນ ເປັນຜູ້ສະໜັບສະໜູນທັງໝົດ ເຊິ່ງຫົວໜ່ວຍທຸລະກິດທີ່ສົນໃຈເຂົ້າຮ່ວມງານດັ່ງກ່າວ ສາມາດຕິດຕໍ່ໄດ້ທີ່ເບີ 021 613100 020 59328971 020 22442236 ແລະ 020 55333483.
# ຂ່າວ & ພາບ: ສະບາໄພ