ເພື່ອເຮັດໃຫ້ຄະນະພັກຮາກຖານກຸ່ມບ້ານ ເລຂາໜ່ວຍພັກບ້ານ ພ້ອມດ້ວຍສະມາຊິກພັກໃນກຸ່ມອີ່ໄລ ຈຳນວນ 184 ສະຫາຍ ໄດ້ຮັບຮູ້ ເຊື່ອມຊືມ ແລະ ສາມາດກຳໄດ້ເຖິງເນື້ອໃນຈິດໃຈຂອງມະຕິ 107 ຂອງກົມການເມືອງສູນກາງພັກ ວ່າດ້ວຍການສ້າງນະຄອນຫຼວງວຽງຈັນໃນໄລຍະໃໝ່ ແລະ ເຜີຍແຜ່ຜົນສຳເລັດກອງປະຊຸມໃຫຍ່ຂອງອົງຄະນະພັກເມືອງນາຊາຍທອງຄັ້ງທີ 7 ແລະ ແຜນພັດທະນາເສດຖະກິດ-ສັງຄົມ 5 ປີ (2020-2025) ຂອງເມືອງນາຊາຍທອງ ດັ່ງນັ້ນ ກຸ່ມອີ່ໄລຈຶ່ງໄດ້ຈັດກອງປະຊຸມເຜີຍແຜ່ມະຕິດັ່ງກ່າວໃນວັນທີ 7 ຕຸລາ 2020 ທີ່ວັດຫ້ວຍນ້ຳເຢັນ ໂດຍການເຜີຍແຜ່ຂອງທ່ານ ພັທ ລຳພອນ ສີສົມບັດ ຄະນະປະຈຳພັກເມືອງ ຫົວໜ້າກອງບັນຊາການ ປກສ ເມືອງ ທັງເປັນຜູ້ຊີ້ນຳກຸ່ມບ້ານອີ່ໄລ ມີທ່ານ ຄຳພັນ ຂັນຕິລາດ ກຳມະການພັກເມືອງ ຫົວໜ້າຫ້ອງການສາທາລະນະສຸກເມືອງ ເລຂາຄະນະພັກຮາກຖານກຸ່ມອີ່ໄລ ແລະ ບັນດາທ່ານຄະນະພັກເມືອງ ຫົວໜ້າຫ້ອງການທີ່ຊີ້ນຳກຸ່ມດັ່ງກ່າວເຂົ້າຮ່ວມ.
ໃນກອງປະຊຸມດັ່ງກ່າວ ໄດ້ມີພິທີມອບໃບຍ້ອງຍໍ ແລະ ຫຼຽນກາລະນຶກ 70 ປີ ວັນສ້າງຕັ້ງແນວລາວສ້າງຊາດຈຳນວນ 15 ຫຼຽນ ໃຫ້ແກ່ບຸກຄົນທີ່ມີຜົນງານດີເດັ່ນ ປະກອບສ່ວນເຄື່ອນໄຫວວຽກງານແນວລາວສ້າງຊາດໄລຍະຜ່ານມາ ເນື່ອງໃນໂອກາດສະເຫຼີມສະຫຼອງວັນສ້າງຕັ້ງແນວລາວສ້າງຊາດ ຄົບຮອບ 70 ປີ ແລະ ມອບໃບຢັ້ງຢືນໜ່ວຍພັກປອດໃສ ເຂັ້ມແຂງ ແລະ ໜັກແໜ້ນປະຈຳປີ 2019 ຕື່ມອີກ.
# ຂ່າວ & ພາບ: ຂັນທະວີ