ພົບກັນປະຈຳວັນນີ້ ມີເລື່ອງມາເລົ່າສູ່ຟັງ ກ່ຽວກັບມາດຕະການທາງກົດໝາຍຂອງ ສປ ຈີນ ແລະ ຍີ່ປຸ່ນ ເພື່ອປົກປ້ອງຊັບສິນທາງປັນຍາ.
ທີ່ ສປ ຈີນ: ຂ່າວຕ່າງປະເທດ ໃນຕົ້ນເດືອນມີນາ 2019 ໃຫ້ຮູ້ວ່າ ທາງການຈີນ ໄດ້ເພີ່ມມາດຕະການຄຸ້ມຄອງຊັບສິນທາງປັນຍາ ທ່ານ ເສີນຊາງ ຢິວ ຫົວໜ້າອົງການຊັບສິນທາງປັນຍາຂອງຈີນ ໄດ້ແຈ້ງໃຫ້ຊາບວ່າ ທາງການຈີນ ຈະສືບຕໍ່ນຳໃຊ້ມາດຕະການຍົກສູງຄຸນນະພາບ ແລະ ປະສິດທິພາບໃນການຄຸ້ມຄອງ ກວດກາຊັບສິນທາງປັນຍາ ພາຍໃນ 5 ປີຕໍ່ໜ້າ ດ້ວຍວິທີການດັ່ງຕໍ່ໄປນີ້:
ຫຍໍ້ເວລາສຳລັບກວດກາ ກາໝາຍສິນຄ້າຈາກ 1 ຄັ້ງຕໍ່ 8 ເດືອນ ໃນເມື່ອກ່ອນ ມາເປັນ 4 ເດືອນ/ຄັ້ງ ຫຍໍ້ໄລຍະເວລາກວດກາລິຂະສິດການປະດິດສ້າງໃໝ່ໆທົ່ວໄປສັ້ນເຂົ້າ ສ່ວນເວລາສຳລັບກວດກາລິຂະສິດທີ່ມີມູນຄ່າສູງນັ້ນ ຕ້ອງເຮັດໃຫ້ສັ້ນລົງກວ່າເກົ່າເຄິ່ງໜຶ່ງ ໃນປີ 2018 ທາງການຈີນໄດ້ສຸມໃສ່ບຳລຸງສ້າງຖັນແຖວພະນັກງານຮັບຜິດຊອບກວດກາຊັບສິນທາງປັນຍາໃຫ້ຫຼາຍຂຶ້ນ ທັງສ້າງລະບົບສຳຫຼວດກວດກາແບບອັດສະລິຍະ ຫຼຸດຂັ້ນຕອນການກວດກາ ປະດິດສ້າງ ແລະ ນຳໃຊ້ແນວຄິດ ກໍຄື ຮູບແບບໃໝ່ໃນການເຮັດວຽກຂອງຂະແໜງຄຸ້ມຄອງ-ກວດກາຊັບສິນທາງປັນຍາ ສ່ວນອີກຂ່າວໜຶ່ງຈາກ ສປ ຈີນ (ວຽງຈັນທາມ 3 ສິງຫາ 2018) ນັ້ນ ກໍໄດ້ໃຫ້ຮູ້ວ່າ ຄະນະກຳມະການຄຸ້ມຄອງຕະຫຼາດແຫ່ງຊາດຈີນ ໄດ້ປະກາດແຜນປາບປາມອາຊະຍາກຳຜະລິດ ແລະ ຈຳໜ່າຍສິນຄ້າປອມແປງ ແລະ ສິນຄ້າຄຸນນະພາບຫຼຸດມາດຕະຖານ ລວມທັງຜະລິດຕະພັນທີ່ລອກຮຽນແບບສິນຄ້າຊື່ດັງ ທາງຄະນະກຳມະການຈະເລັ່ງໃສ່ແກ້ໄຂການຜະລິດທີ່ລະເມີດລິຂະສິດ ການຂາຍສິນຄ້າປອມ ແລະ ການໂຄສະນາສິນຄ້າແບບຫຼອກລວງ ຫຼື ຜິດກົດໝາຍ ຄະນະກຳມະການຮຽກຮ້ອງໃຫ້ມີລະບົບສອບສວນຢ່າງກວ້າງຂວາງ ແລະ ເລິກເຊິ່ງ ບັນດາຜະລິດຕະພັນ ໂດຍເລີ່ມແຕ່ຂອດການຜະລິດ ສູ່ການຂາຍ ຜະລິດຕະພັນທີ່ຜິດກົດໝາຍ.
ທີ່ ຍີ່ປຸ່ນ: ຂ່າວຕ່າງປະເທດໃຫ້ຮູ້ໃນເດືອນກຸມພາ 2019 ກ່ຽວກັບກອງປະຊຸມຈັດຂຶ້ນ ເພື່ອຊອກຊ່ອງທາງແກ້ໄຂບັນຫາການລະເມີດລິຂະສິດຢູ່ ຍີ່ປຸ່ນ ເຊັ່ນ: ການລັກລອບດາວໂຫຼດບົດປະພັນ ກໍຄື ເກມຄອມພິວເຕີທີ່ລະບາດຢູ່ທົ່ວໄປ ຂ່າວບອກວ່າ ກອງປະຊຸມໄດ້ສົ່ງບົດລາຍງານໃຫ້ອົງການກິດຈະການດ້ານວັດທະນະທຳ ໂດຍໄດ້ຮຽກຮ້ອງໃຫ້ມີມາດຕະການແກ້ໄຂບັນຫາການລັກລອບດາວໂຫຼດຜົນງານທີ່ເປັນລິຂະສິດຂອງບຸກຄົນ ໂດຍໃຫ້ກວມເອົາລິຂະສິດທີ່ກວ້າງຂວາງກວ່າເກົ່າ ເພາະມາດຕະການທີ່ປະຕິບັດກັນມາໃນເມື່ອກ່ອນນັ້ນ ກວມເອົາສະເພາະແຕ່ການຫ້າມລັກລອບດາວໂຫຼດວີດີໂອ ແລະ ດົນຕີເທົ່ານັ້ນ ບົດລາຍງານໄດ້ສະເໜີໃຫ້ມີບົດລົງໂທດບັນດາເວັບໄຊ “ປີງ” ທີ່ເປັນຫົວໂປ່ໂຕການໃນການປະສານງານກັບບັນດາເວັບໄຊທີ່ລະເມີດລິຂະສິດ ສ່ວນວ່າຈະມີການລົງໂທດພວກກະທຳຜິດໃນລະດັບໃດນັ້ນ ກໍຍັງຕ້ອງໄດ້ມີຄວາມລະມັດລະວັງ ເພາະມັນອາດຈະສົ່ງຜົນກະທົບຕໍ່ຊີວິດ ແລະ ອິດສະຫຼະພາບໃນການສະແດງອອກຂອງປະຊາຊົນ ກອງປະຊຸມໄດ້ສະເໜີໃຫ້ມີການລົງໂທດໃສ່ສະເພາະຄວາມຜິດທີ່ຮ້າຍແຮງເທົ່ານັ້ນ ຄື ຜູ້ກະທຳຜິດຄວນໄດ້ຮັບໂທດຕິດຄຸກ ສູງສຸດ 2 ປີ ແລະ ເສຍຄ່າປັບໃໝເປັນເງິນ 2 ລ້ານເຢັນ (ປະມານ 18.100 ໂດລາສະຫະລັດ) ຫຼື ທັງຖືກຈຳຄຸກ ແລະ ທັງຖືກປັບໃໝ ຕາມສະຖິຕິໃນເດືອນເມສາ 2018 ຄວາມເສຍຫາຍຈາກການລະເມີດລິຂະສິດ ດ້ວຍວິທີດາວໂຫຼດຜົນງານຄົນອື່ນຢ່າງຜິດກົດໝາຍໃນຍີ່ປຸ່ນ ນັ້ນ ມີມູນຄ່າສູງເຖິງ 300 ຕື້ເຢັນ.