ເພື່ອເຮັດໃຫ້ອົງການຈັດຕັ້ງກຳມະບານນັບມື້ນັບເຂັ້ມແຂງ ແລະ ໄປສູ່ທຸກຂະແໜງການ ທຸກຂົງເຂດທັງພາກລັດ ແລະເອກະຊົນ ສະຫະພັນກຳມະບານນະຄອນຫຼວງວຽງຈັນ (ນວ) ໄດ້ສືບຕໍ່ຂະຫຍາຍຮາກຖານກຳມະບານໄປສູ່ຫົວໜ່ວຍທຸລະກິດພາກເອກະຊົນ ຫຼ້າສຸດ ວັນທີ 2 ຕຸລາ 2020 ໄດ້ຈັດພິທີຮັບເອົາສະມາຊິກ ໃໝ່ ແລະ ປະກາດການຈັດຕັ້ງກຳມະບານຮາກຖານບໍລິສັດໂຕ້ ສົ່ງເສີມກະສິກຳ ແລະ ອຸດສາຫະກຳຄົບວົງຈອນ ນຳເຂົ້າ-ສົ່ງອອກຈຳກັດ ບໍລິສັດຕັ້ງຢູ່ບ້ານແສງສະຫວ່າງ ເມືອງໄຊເສດຖາ ນວ ເຂົ້າຮ່ວມພິທີ ມີທ່ານ ດາວເພັດ ອາລຸນ ປະທານສະຫະພັນກຳມະບານ ນວ.
ສະມາຊິກກຳມະບານໃໝ່ຂອງບໍລິສັດມີທັງໝົດ 36 ຄົນ ໂດຍກຳມະບານຮາກຖານບໍລິສັດມີຄະນະ 5 ທ່ານ ເຊິ່ງທ່ານ ອຸທັນ ໄຕລິດທີ ປະທານບໍລິສັດເປັນປະທານ ທ່ານ ອຸທອນ ໄຕລິດທີ ເປັນຮອງປະທານ ທັງເປັນປະທານກວດກາ ທ່ານທຸນລັດສະໝີ ສີສົມບັດ ທ່ານ ພັດທະໂກະ ທຳມີໂຍ ແລະທ່ານ ຄຳພອນ ຫານຊະນະ ເປັນຄະນະ.
# ຂ່າວ & ພາບ: ສົມສະຫວັນ