ບໍລິສັດເລີ່ມຕົ້ນໃໝ່ໃນອາເມຣິກາແຫ່ງໜຶ່ງຊື່ Atomo Coffee ໄດ້ເງິນທຶນສະໜັບສະໜູນຈາກບໍລິສັດລົງທຶນແຫ່ງໜຶ່ງໃນຮົງກົງ ມູນຄ່າ 2 ລ້ານ 6 ແສນໂດລາ ເປັນຄ່າໃຊ້ຈ່າຍໃນການດຳເນີນການ.
Atomo Coffee ຊຶ່ງຕັ້ງຢູ່ທີ່ນະຄອນຊີແອດເຕິນຂອງສະຫະລັດອາເມຣິກາ ເປັນໂຄງການຂອງໝູ່ຄູ່ສະໜິດສອງຄົນ ຄົນໜຶ່ງຄື ທ່ານ ຈາເຣັດ ສະຕ໊ອບໂຟສ໌ ເປັນນັກວິທະຍາສາດດ້ານອາຫານມາກ່ອນ ເຂົາໄດ້ແນວຄິດເລື່ອງການເຮັດກາເຟໂດຍບໍ່ຕ້ອງອາໄສແກ່ນ ຫຼື ເມັດ ຈາກຄວາມຮູ້ສຶກເບື່ອໜ່າຍ ກ່ຽວກັບຣົດຊາດຂອງກາເຟທີ່ບໍ່ຄົງເສັ້ນຄົງທີ່.
ທ່ານ ຈາເຣັດ ຊຶ່ງຕອນນີ້ມີຕຳແໜ່ງເປັນຫົວໜ້າເຈົ້າໜ້າທີ່ວິທະຍາສາດຂອງບໍລິສັດ ໄດ້ໃຊ້ຂະບວນການແບບວິສະວະກຳຢ້ອນກັບ ຫຼື reverse-engineering ເພື່ອສຶກສາວິເຄາະ ແລະ ໄຈ້ແຍກອົງປະກອບທັງໝົດຂອງກາເຟ ທັງລັກສະນະ ກິ່ນ ສີ ແລະ ຣົດຊາດ ໃນຫ້ອງທົດລອງ ຊຶ່ງຕັ້ງຢູ່ໃນບ່ອນຈອດລົດຂອງເຂົາເອງ.
ຈາກຂະບວນການ ແລະ ຂໍ້ມູນທີ່ໄດ້ເຮັດໃຫ້ບໍລິສັດ Atomo Coffee ສາມາດສ້າງກາເຟ ແລະ ນຳອອກຂາຍໜ້າຮ້ານໄດ້ ໂດຍບໍ່ຕ້ອງອາໄສເມັດກາເຟ ໃນຂະບວນການຜະລິດເລີຍ.
ທ່ານ ຈາເຣັດ ສະຕ໊ອບໂຟສ໌ ຜູ້ຮ່ວມກໍ່ຕັ້ງບໍລິສັດບອກອີກວ່າ ເຖິງແມ່ນຈະເປັນກາເຟຈາກຂະບວນການວິສະວະກຳຢ້ອນກັບ ທີ່ບໍ່ຕ້ອງໃຊ້ເມັດກາເຟກໍຕາມ ແຕ່ລູກຄ້າກໍບໍ່ສາມາດລະບຸຄວາມແຕກຕ່າງໄດ້.
ຊ້ຳບໍ່ໜຳ ລູກຄ້າບາງຄົນຍັງຊົມເຊີຍວ່າ ກາເຟໄຮ້ເມັດແບບນີ້ ເມື່ອລອງຈິບເບິ່ງແລ້ວມີຄວາມນິ່ມນວນກວ່າ ແຖມຍັງໃຫ້ຣົດຊາດແບບເຕັມໆ ຫຼື full-bodied ຫຼາຍກວ່າດ້ວຍ ຫົວໜ້າເຈົ້າໜ້າທີ່ວິທະຍາສາດຂອງບໍລິສັດ Atomo Coffee ບອກດ້ວຍວ່າ ຂໍ້ໄດ້ປຽບສຳຄັນຂອງກາເຟແບບໄຮ້ເມັດ ຄືການຊ່ວຍອະນຸຮັກສະພາບແວດລ້ອມ.
ເພາະການເຮັດສວນກາເຟ ເຮັດໃຫ້ຕ້ອງມີການຕັດປ່າເຂດຮ້ອນເພື່ອກຽມພື້ນທີ່ປູກກາເຟ ດັ່ງນັ້ນ ກາເຟຍຸກໃໝ່ແບບບໍ່ຕ້ອງໃຊ້ເມັດນີ້ ຈຶ່ງມີຄວາມເປັນມິດກັບສິ່ງແວດລ້ອມຫຼາຍກວ່າ ຂະນະທີ່ຣົດຊາດນັ້ນ ກໍບໍ່ຜິດແປກໄປຈາກເດີມ.