ໃນວັນທີ 31 ສິງຫາ 2020 ບໍລິສັດ ລາວໂທລະຄົມມະນາຄົມ ມະຫາຊົນ ເປີດນຳໃຊ້ລະບົບ 5G ຢ່າງເປັນທາງການ ຢູ່ໂຮງແຮມລາວພລາຊາ ນະຄອນຫຼວງວຽງຈັນ ເປັນປະທານຂອງທ່ານ ສຸພົນ ຈັນທະວີໄຊ ຜູ້ອຳນວຍການໃຫຍ່ ບໍລິສັດ ລາວໂທລະຄົມມະນາຄົມ ມະຫາຊົນ ເປັນກຽດເຂົ້າຮ່ວມຂອງທ່ານ ທັນສະໄໝ ກົມມະສິດ ລັດຖະມົນຕີກະຊວງໄປສະນີ ໂທລະຄົມມະນາຄົມ ແລະ ການສື່ສານ (ປທສ) ພ້ອມດ້ວຍຫົວໜ້າ ຮອງຫົວໜ້າກົມອ້ອມຂ້າງກະຊວງ ປທສ ຜູ້ບໍລິຫານ-ພະນັກງານລາວໂທລະຄົມມະນາຄົມ ແລະ ແຂກທີ່ຖືກເຊີນເຂົ້າຮ່ວມ.
ກ່ອນໜ້ານີ້ ໃນວັນທີ 8 ຕຸລາ 2019 ທີ່ຜ່ານມາ ລາວໂທລະຄົມ ໄດ້ມີພິທີທົດລອງນຳໃຊ້ລະບົບ 5G ມາແລ້ວຄັ້ງໜຶ່ງ ເພື່ອເປັນການກຽມຄວາມພ້ອມດ້ານຕ່າງໆ ກ່ອນການເປີດໃຫ້ການບໍລິການຢ່າງເປັນທາງການ ສຳລັບຢູ່ໃນງານມື້ນີ້ ແມ່ນໄດ້ມີການສາທິດບັນດາ Show case ຈຳນວນໜຶ່ງ ທີ່ທິມງານໄດ້ກະກຽມມາສະແດງໃຫ້ເຫັນວ່າລະບົບ 5G ມີສັກກະຍະພາບທີ່ທັນສະໄໝ ແລະ ຄວາມໄວໃນການສົ່ງຂໍ້ມູນເທົ່າໃດ ສຳລັບພື້ນທີ່ໃຫ້ການບໍລິການລະບົບ 5G ໃນເບື້ອງຕົ້ນ ລາວໂທລະຄົມມະນາຄົມ ຈະໃຫ້ບໍລິການຢູ່ໃນບາງພື້ນທີ່ຂອງນະຄອນຫຼວງວຽງຈັນກ່ອນ ເຊັ່ນ: ຢູ່ບໍລິເວນຈຸດໃຈກາງເມືອງເຂດສີຫອມ ຕະຫຼາດກາງຄືນແຄມຂອງ ເຂດສາຍລົມ ແລະ ມະຫາວິທະຍາໄລແຫ່ງຊາດ (ວິທະຍາເຂດດົງໂດກ) ຈາກນັ້ນ ໄລຍະທີ່ສອງຈຶ່ງຈະຂາຍຫຍາຍໄປສູ່ບັນດາແຂວງໃຫຍ່ໃນທົ່ວປະເທດ.