ຄະນະບໍລິຫານງານພັກເມືອງສີໂຄດ ຕະບອງ ນະຄອນຫຼວງວຽງຈັນ ໄດ້ເອົາໃຈ ໃສ່ນຳພາວຽກງານປ້ອງກັນຊາດ-ປ້ອງກັນຄວາມສະຫງົບ (ປກຊ-ປກສ) ເດັດຂາດ ໂດຍກົງ ແລະ ຮອບດ້ານ ນັບແຕ່ຂັ້ນເມືອງລົງຮອດຮາກຖານບ້ານ ເຊິ່ງຖືເອົາຫົວ ໜ່ວຍຄອບຄົວ ແລະ ບ້ານເປັນພື້ນຖານ ໃນການເຮັດໜ້າທີ່ປ້ອງກັນຄວາມສະຫງົບຮອບດ້ານ.
ທ່ານ ອິນປອງ ທຸມມາ ຮອງເຈົ້າເມືອງສີໂຄດຕະບອງ ໄດ້ລາຍງານທີ່ກອງປະຊຸມການນຳພາຈັດຕັ້ງປະຕິບັດວຽກງານຮອບ ດ້ານຂອງຄະນະບໍລິຫານງານພັກເມືອງສີ ໂຄດຕະບອງໃນໄລຍະ 6 ເດືອນຕົ້ນປີ ແລະ ແຜນວຽກງານຈຸດສຸມຮອດເດືອນສິງຫາ 2020 ເຊິ່ງຈັດຂຶ້ນເມື່ອບໍ່ດົນຜ່ານມານີ້ວ່າ: ໃນໄລຍະ 6 ເດືອນຕົ້ນປີ 2020 ຜ່ານມາ ທັງສອງກຳລັງ (ປສຊ-ປກສ) ໄດ້ສ້າງແຜນການຈັດຕັ້ງກຳລັງກຽມພ້ອມສູ້ຮົບທີ່ອາດຈະເກີດຂຶ້ນ ຈັດຕັ້ງກຳລັງອອກກວດກາລາດຕະເວນລຽບຕາມເສັ້ນທາງ ລຽບຕາມແມ່ນ້ຳຂອງຕາມຈຸດຫຼໍ່ແຫຼມຕ່າງໆ ຂອບເຂດຄວາມຮັບຜິດຊອບຢ່າງເປັນປະຈຳ ເກັບກຳຂໍ້ມູນການສ້າງບ້ານປ້ອງກັນຊາດເຂັ້ມແຂງສຳເລັດ 2 ບ້ານ (ດ່ານຄຳ ແລະ ໜອງດາ) ຈັດພິທີເປີດບ້ານປ້ອງກັນຊາດເຂັ້ມແຂງໄດ້ 2 ບ້ານ (ຫ້ວຍຫ້ອມ ແລະ ບ້ານໃໝ່) ສ້າງຕັ້ງກຳລັງສຳຮອງຄືນໃໝ່ມີ 1 ກອງຮ້ອຍ ແລະ ປະກາດກຳລັງກອງຫຼອນໄດ້ 32 ບ້ານ ນອກນີ້ ໄດ້ເອົາໃຈໃສ່ຈັດຕັ້ງປະຕິບັດວຽກຈຸດສຸມ 3 ຫຼຸດ (ຫຼຸດອຸ ບັດເຫດ ຫຼຸດຢາເສບຕິດ ແລະ ຫຼຸດປາກົດການຫຍໍ້ທໍ້) ຕາມຄຳສັ່ງເລກທີ 27/ນຍ ຄຳສັ່ງເລກທີ 01/ຈນວ ເຮັດໃຫ້ສະພາບຢູ່ເມືອງສີໂຄດຕະບອງມີສະຖຽນລະພາບທາງດ້ານການເມືອງ ສັງຄົມມີຄວາມສະ ຫງົບ ແລະ ອົບອຸ່ນປອດໄພໂດຍພື້ນຖານ.
ໃນ 6 ເດືອນຕົ້ນປີ 2020 ສະພາບປາກົດການຫຍໍ້ທໍ້ຢູ່ພາຍໃນເມືອງກໍຍັງສືບຕໍ່ເກີດຂຶ້ນຢູ່ ເຊິ່ງສາມາດສະຫຼຸບ ແລະ ສັງລວມ ໄດ້ດັ່ງນີ້: ທົ່ວເມືອງມີປະກົດການຫຍໍ້ທໍ້ເກີດຂຶ້ນທັງໝົດ 210 ເລື່ອງ ທຽບໃສ່ 6 ເດືອນທ້າຍປີ 2019 ເຫັນວ່າເພີ້ມຂຶ້ນ 29 ເລື່ອງ ສ້າງຜົນເສຍຫາຍເປັນເງິນກີບ 65 ລ້ານກີບ ເງິນບາດ 2.000 ບາດ ເງິນຢວນ 8.000 ຢວນ ຄຳຮູບປະພັນ 7 ບາດ ລົດຈັກ 23 ຄັນ ແວ່ນລົດໃຫຍ່ແຕກ 2 ຄັນ ແລະ ເຄື່ອງອື່ນໆອີກຈຳນວນໜຶ່ງ ສະພາບອຸບັດເຫດເກີດຂຶ້ນທັງໝົດ 44 ເລື່ອງ ພາຫະນະເປ່ເພ 75 ຄັນ ມີຜູ້ໄດ້ຮັບບາດເຈັບ 71 ຄົນ ເສຍຊີວິດ 9 ຄົນ ສະພາບອັກຄີໄຟເກີດຂຶ້ນ 2 ຄັ້ງ ມູນຄ່າເສຍຫາຍ 1.344.200.000 ກີບ ປັດຈຸບັນ ໄດ້ສຳເລັດໃນການລົງປັບປຸງສຳມະໂນຄົວແບບໃໝ່ທັງໝົດ 60 ບ້ານ.
ທົ່ວເມືອງສີໂຄດຕະບອງ ມີບ້ານປອດຢາເສບຕິດທັງໝົດ 60 ບ້ານ ບ້ານປ້ອງກັນຄວາມສະຫງົບດີໄດ້ 59 ບ້ານ ຍັງ 1 ບ້ານຄື:ບ້ານດອນຊີງຊູ້ ຄອບຄົວປ້ອງກັນຄວາມສະຫງົບດີ 19.281 ຄອບຄົວ ເທົ່າກັບ 70,51% (ຂອງຈຳນວນຄອບຄົວທັງໝົດ 27.345 ຄອບຄົວ) ສຳລັບທິດທາງແຜນການຕໍ່ໜ້າ ແມ່ນ ຈະສືບຕໍ່ນຳພາວຽກງານປ້ອງກັນຊາດ-ປ້ອງກັນຄວາມສະຫງົບ ແລະ ຈັດຄວາມເປັນລະບຽບຮຽບຮ້ອຍໃນສັງຄົມໃຫ້ໄດ້ຕາມແຜນການ ສືບຕໍ່ເພີ່ມທະວີກວດກາສາລະເວ ກຳໄດ້ບັນດາຈຸດຫຼໍ່ແຫຼມ ແລະ ພວກຄົນບໍ່ດີ ຮູ້ໄດ້ເປົ້າໝາຍທີ່ຈະກໍ່ຄວາມບໍ່ສະຫງົບ ພ້ອມກັນປ້ອງກັນໃຫ້ທັນເວລາ ກຳແໜ້ນ 4 ໜ້າທີ່ໃຫຍ່ 26 ແຜນການໄປຜັນຂະຫຍາຍເປັນແຜນອັນລະອຽດ ສືບຕໍ່ເອົາໃຈໃສ່ວຽກງານຮັກສາຄວາມສະ ຫງົບ ຄວາມສະຖຽນລະພາບທາງດ້ານການເມືອງ ແລະ ຄວາມເປັນລະບຽບຮຽບຮ້ອຍໃນສັງຄົມ ພ້ອມທັງສຸມໃສ່ການແກ້ ໄຂປະກົດການຫຍໍ້ທໍ້ຕ່າງໆທາງສັງຄົມທີ່ເກີດຂຶ້ນ ແລະ ບັນຫາອື່ນໆ.