ນັກຄົ້ນຄວ້າໄດ້ຄົ້ນພົບເຊື້ອແບັກທີເຣຍຊະນິດໃໝ່ ທີ່ສາມາດກັດກິນໂພລີຢູຣີເທນ (polyurethane) ໄດ້ ເຊິ່ງເປັນປຼັສຕິກຊະນິດໜຶ່ງທີ່ມີຄວາມຫຍຸ້ງຍາກໃນການລີໄຊເຄີນ ຫຼື ທຳລາຍ.
ນັກວິທະຍາສາດເວົ້າວ່າ ຜົນການຄົ້ນພົບເຫຼົ່ານີ້ ອາດຈະຊ່ວຍຫຼຸດຜ່ອນປະລິມານຂອງປຼັສຕິກ ທີ່ຍາກທີ່ຈະນຳກັບມາໃຊ້ໃໝ່ໃນຫຼາຍວິທີ ເຊິ່ງທັງໝົດນີ້ ໄດ້ສິ້ນສຸດລົງໃນຂີ້ເຫຍື້ອຂອງໂລກ ທີ່ກໍ່ໃຫ້ເກີດມົນລະພິດໃນມະຫາສະໝຸດ.
ນັກຄົ້ນຄວ້າຈາກສູນຄົ້ນຄວ້າສິ່ງແວດລ້ອມ Helmholtz Center for Leipzig ປະເທດເຢຍລະມັນ ໄດ້ພົບເຊື້ອແບັກທີເຣຍຊະນິດໃໝ່ໃນດິນ ໃນບໍລິເວນທີ່ມີເສດປຼັສຕິກຈຳນວນຫຼາຍ ໂດຍພົບວ່າເຊື້ອແບັກທີເຣຍດັ່ງກ່າວກຳລັງກັດກິນ polyurethane ເຊິ່ງແມ່ນສານທີ່ຖືກນຳໃຊ້ຢ່າງກວ້າງຂວາງໃນຜະລິດຕະພັນຕ່າງໆ.
ນັກຄົ້ນຄວ້າຄາດຄະເນວ່າ ໃນປີ 2015 ມີການໃຊ້ polyurethane ໃນການຜະລິດປຼັສຕິກໃນເອີຣົບ ເຖິງ 3.500.000 ໂຕນ.
ເຖິງຢ່າງໃດກໍຕາມ ບັນຫາໜຶ່ງໃນການລີໄຊເຄີນ polyurethane ຄືການທີ່ຕ້ອງໃຊ້ພະລັງງານຈຳນວນຫຼາຍ ວັດສະດຸປຼັສຕິກຈະບໍ່ລະລາຍເມື່ອຖືກຄວາມຮ້ອນ ດັ່ງນັ້ນ ຜະລິດຕະພັນທີ່ເຮັດຈາກ polyurethane ສ່ວນຫຼາຍຈະສິ້ນສຸດລົງໃນຂີ້ເຫຍື້ອ ເຊິ່ງສາມາດປ່ອຍສານເຄມີທີ່ເປັນອັນຕະລາຍ.
ນອກຈາກນັ້ນ ນັກຄົ້ນຄວ້າພົບວ່າເຊື້ອແບັກທີເຣຍທີ່ມີຊື່ວ່າ Pseudomonasputida ສາມາດຜະລິດເອນໄຊທີ່ກັດກິນ polyurethane ເຊິ່ງຈະຊ່ວຍທຳລາຍວັດສະດຸປຼັສຕິກໃນສະພາບແວດລ້ອມ.
ທ່ານ Hermann Heipieper ຜູ້ທີ່ຊ່ວຍໃນການຂຽນບົດລາຍງານ ກ່າວໃນຖະແຫຼງການວ່າ ການຄົ້ນພົບສະແດງໃຫ້ເຫັນເຖິງບາດກ້າວທີ່ສຳຄັນ ໃນການນຳຜະລິດຕະພັນທີ່ຍາກທີ່ຈະຜະລິດຄືນໃໝ່ (Polyurethane) ເອົາມາໃຊ້ໃໝ່.
ການຄົ້ນຄວ້ານີ້ ແມ່ນສ່ວນໜຶ່ງຂອງໂຄງການຂອງສະຫະພາບເອີຣົບ ທີ່ຄົ້ນຫາເພື່ອຊອກຫາຈຸລິນຊີທີ່ມີປະໂຫຍດ ຈຸດປະສົງແມ່ນເພື່ອຄົ້ນຫາສິ່ງມີຊີວິດ ທີ່ສາມາດຊ່ວຍຫັນປ່ຽນປຼັສຕິກທີ່ໃຊ້ນ້ຳມັນ ໃຫ້ກາຍເປັນທາດທີ່ສາມາດຍ່ອຍໄດ້.
ໃນປີ 2011 ນັກສຶກສາຢູ່ມະຫາວິທະຍາໄລ Yale ໄດ້ດຳເນີນການທົດລອງທີ່ຄ້າຍຄືກັນນີ້ ໂດຍການຄົ້ນພົບແມ່ພິມທີ່ສາມາດກິນ polyurethane ໄດ້ ເຖິງແມ່ນວ່າບ່ອນທີ່ບໍ່ມີອາກາດ ເຊັ່ນວ່າຢູ່ທາງລຸ່ມຂອງຂີ້ເຫຍື້ອ.
ຕັ້ງແຕ່ນັ້ນມາ ນັກວິທະຍາສາດທົ່ວໂລກໄດ້ພົບເຫັນເຫັດຊະນິດອື່ນໆ ທີ່ສາມາດຍ່ອຍສະຫຼາຍ polyurethane ໄດ້ ໃນປີ 2017 ກຸ່ມນັກວິທະຍາສາດໄດ້ຄົ້ນພົບເຊື້ອເຫັດທີ່ສາມາດກັດກິນປຼັສຕິກໄດ້ ໂດຍການທຳລາຍສານເຄມີຕົ້ນຕໍທີ່ເຊື່ອມຕໍ່ປຼັສຕິກເຂົ້າກັນ.
ແຕ່ການສຶກສາຂອງເຢຍລະມັນພົບວ່າ ເຊື້ອແບັກທີເຣຍທີ່ກິນພາດສະຕິກນັ້ນ ສາມາດຄວບຄຸມ ແລະ ຜະລິດໄດ້ງ່າຍສຳລັບໃຊ້ອຸດສາຫະກຳ ນັກຄົ້ນຄວ້າກ່າວວ່າ ຂັ້ນຕອນຕໍ່ໄປຄືການຫາຂໍ້ມູນເພີ່ມເຕີມກ່ຽວກັບເອັນໄຊຂອງແບັກທີເຣຍ ທີ່ສາມາດຍ່ອຍສະຫຼາຍ polyurethane ໄດ້ ແຕ່ນັກວິທະຍາສາດບາງຄົນບໍ່ເຫັນດີນຳ ໂດຍຊີ້ໃຫ້ເຫັນວ່າເອັນໄຊ ຫຼື ຈຸລິນຊີໃນສະພາບແວດລ້ອມທີ່ມະນຸດສ້າງຂື້ນ ອາດເປັນອັນຕະລາຍໄດ້.