ພິທີມອບ-ຮັບຕຳແໜ່ງວິທະຍາຖານະທາງວິຊາການສາດສະດາຈານພິເສດ (Visiting Professor) ຈາກມະຫາວິທະຍາໄລອ໋ອກຝອດປະເທດອັງກິດໃຫ້ແກ່ທ່ານ ມາຍຟອງ ມາຍຊາຍ ຮອງອະທິການບໍດີມະຫາວິທະຍາໄລວິທະຍາສາດສຸຂະພາບ (ມວສ) ຈັດຂຶ້ນວັນທີ 27 ກໍລະກົດ 2020 ທີ່ ມວສ ມີທ່ານ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ ທ່ານ ຈອນ ເພຍຊັນ ເອກອັກຄະຣາຊະທູດອັງກິດປະຈຳລາວ ພ້ອມດ້ວຍຮອງລັດຖະມົນຕີ ອະທິການບໍດີ ມວສ ແລະ ແຂກຖືກເຊີນເຂົ້າຮ່ວມ.
ທ່ານ ມາຍຟອງ ມາຍຊາຍ ໄດ້ນຳສະເໜີຜົນງານການຄົ້ນຄວ້າດ້ານວິຊາການທີ່ພົ້ນເດັ່ນໃນຜ່ານມາໂດຍຫຍໍ້ ກ່ຽວກັບປະຫວັດຄວາມເປັນມາໃນຊີວິດແພດ ການປະກອບສ່ວນເຂົ້າໃນການກໍ່ຕັ້ງ ຫຼື ວ່າສ້າງໜ່ວຍງານທາງດ້ານວິຊາການທີ່ສຳຄັນຢູ່ໃນລາວ ນຳສະເໜີຜົນງານການຕີພິມເຜີຍແຜ່ບົດຄົ້ນຄວ້າຢ່າງ ໜ້ອຍ 162 ບົດໃນວາລະສານການແພດສາກົນ ຜົນງານໃນວຽກງານການສິດສອນເຮັດຄົ້ນຄວ້າວິທະຍາ ສາດດ້ານພະຍາດຊຶມເຊື້ອ ແລະ ພະຍາດເຂດຮ້ອນຮ່ວມກັບມະຫາວິທະຍາໄລອ໋ອກຝອດ ມາແຕ່ປີ 2000 ເປັນຕົ້ນມາ ເປັນທີ່ຍອມຮັບຈາກສະພາວິທະຍາສາດການແພດ ຂອງມະຫາວິທະຍາໄລອ໋ອກຝອດ ແລະ ຈາກວົງການນັກວິທະຍາສາດການແພດໃນລະດັບສາກົນ ກໍຄື ໃນພາກພື້ນ ພ້ອມນັ້ນ ຍັງໄດ້ປະກອບສ່ວນສຳຄັນເຂົ້າໃນການບົ່ງມະຕິປິ່ນປົວພະຍາດຊຶມເຊື້ອ ແລະ ພະຍາດເຂດຮ້ອນຫຼາຍຢ່າງ ປີ 2004 ໄດ້ຮັບລາງວັນຊະນະເລີດ ໃນຖານະທີ່ມີຜົນງານການຄົ້ນຄວ້າດີເດັ່ນລະດັບໂລກ ຈາກສະມາຄົມແພດເດັກນາໆຊາດທີ່ສະຫະລັດອາເມຣິກາ ປັດຈຸບັນ ຍັງດຳລົງຕຳແໜ່ງຫຼາຍຢ່າງທີ່ສຳຄັນ ໃນວົງການແພດນອກຈາກຮອງອະທິການບໍດີ ມວສ ເຊັ່ນ: ເປັນປະທານສະມາຄົມແພດພະຍາດຊຶມເຊື້ອລາວ ຮອງປະທານບອດການແພດຂອງສະພາຄຸ້ມຄອງວິຊາຊີບປິ່ນປົວຂອງລາວ ຮອງປະທານຄະນະກຳມະການທີ່ປຶກສາ ສຳລັບການສັກຢາກັນພະຍາດແຫ່ງຊາດ ແລະ ຮອງປະທານຄະນະກຳມະການແຫ່ງຊາດດ້ານຈັນຍາທຳ ການຄົ້ນຄວ້າສາທາລະນະສຸກ.
ການມອບຕຳແໜ່ງທາງວິຊາການຄັ້ງນີ້ ຖືເປັນເຫດການທີ່ມີຄວາມໝາຍຄວາມສຳຄັນຄັ້ງປະຫວັດສາດ ສຳລັບວົງການນັກວິຊາການລາວເວົ້າລວມ ເວົ້າສະເພາະ ສຳລັບຂະແໜງການສາທາລະນະສຸກ ເພາະເປັນຄັ້ງທຳອິດທີ່ນັກວິຊາການທາງການແພດຂອງລາວ ໄດ້ຮັບນາມມະຍົດອັນຊົງກຽດດັ່ງກ່າວ ຈາກມະຫາວິທະຍາໄລອ໋ອກຝອດປະເທດອັງກິດ ເຊິ່ງເປັນໜຶ່ງໃນບັນດາມະຫາວິທະຍາໄລທີ່ມີຊື່ສຽງໂດ່ງດັງ 5 ອັນດັບຕົ້ນຂອງໂລກ.