ນະຄອນຫຼວງວຽງຈັນ ວັນທີ 26 ມີຖຸນາ 2024 ໃນ ກອງປະຊຸມ ສຸດຍອດຊັບສິນດ້ານມະນຸດ ຄັ້ງທີ II ມື້ນີ້ ລັດຖະບານ ແຫ່ງ ສປປ ລາວ ໄດ້ຢັ້ງຢືນຄືນເຖິງຄໍາໝັ້ນສັນຍາ ໃນການແກ້ໄຂບັນຫາການຂາດສານອາຫານ ແລະ ຄວາມສຳຄັນຂອງວຽກງານໂພຊະນາການ ຕໍ່ການພັດທະນາຊັບສິນດ້ານມະນຸດອີກເຊັ່ນດຽວກັນ.
ກອງປະຊຸມດັ່ງກ່າວ ໄດ້ຈັດຂຶ້ນພາຍໃຕ້ຫົວຂໍ້ “ຮີບຮ້ອນປັບປຸງວຽກງານໂພຊະນາການ ເພື່ອພັດທະນາຊັບສິນດ້ານມະນຸດ” ແລະ ໄດ້ຮັບກຽດເປັນປະທານໂດຍ ພະນະທ່ານ ສອນໄຊ ສີພັນດອນ ນາຍົກລັດທະມົນຕີ ແຫ່ງ ສປປ ລາວ ແລະ ເຂົ້າຮ່ວມງານໂດຍບັນດາ ການນຳ ແລະ ວິຊາການ ເພື່ອປຶກສາຫາລືກ່ຽວກັບ ຍຸດທະສາດໃນການປັບປຸງໂພຊະນາການ ແລະ ການລົງທຶນໃນອະນາຄົດຂອງປະເທດ.
ພະນະທ່ານ ສອນໄຊ ສີພັນດອນ ໄດ້ກ່າວເຖິງຄວາມສໍາຄັນຂອງໂພຊະນາການ ເພື່ອສ້າງເສດຖະກິດທີ່ເຂັ້ມແຂງ ແລະ ທົນທານ ພ້ອມຍັງສະແດງໃຫ້ເຫັນເຖິງຄຳໝັ້ນສັນຍາຂອງ ລັດຖະບານ ເເຫ່ງ ສປປ ລາວ ໃນການປັບປຸງວຽກງານໂພຊະນາການ, ພັດທະນາຊັບສິນດ້ານມະນຸດ ເເລະ ຮັບປະກັນການເຕີບໂຕດ້ານເສດຖະກິດ ແລະ ຄວາມຈະເລີນຮຸ່ງເຮືອງຂອງປະເທດ ທ່ານໄດ້ກ່າວວ່າ: “ລັດຖະບານ ສປປ ລາວ ມີຄວາມໝາຍໝັ້ນຢ່າງເຕັມທີ່ ຕໍ່ການຈັດຕັ້ງປະຕິບັດນະໂຍບາຍດຳເນີນງານແບບຮອບດ້ານ ເພື່ອຮັບມືກັບສະພາບການຂາດໂພຊະນາການ ແລະ ໂດຍການມີສ່ວນຮ່ວມຂອງຫຼາຍຂະແໜງການ ແຕ່ສູນກາງຮອດທ້ອງຖິ່ນ ພາກສ່ວນສັງຄົມ ແລະ ຄູ່ຮ່ວມພັດທະນາ.”
ຂໍ້ມູນລ່າສຸດສະແດງໃຫ້ເຫັນວ່າ ເກືອບ 33% ຂອງເດັກນ້ອຍອາຍຸຕ່ຳກວ່າ 5 ປີ ແມ່ນຂາດສານອາຫານແບບເຕັ້ຍ-ໃນຂະນະດຽວກັນເກືອບ 11% ແມ່ນຂາດສານອາຫານແບບກະທັນ ເຊິ່ງບັນຫາເຫຼົ່ານີ້ສາມາດນໍາໄປສູ່ພະຍາດຊໍາເຮື້ອ ສົ່ງຜົນກະທົບຕໍ່ການສຶກສາຂອງເດັກ ແລະ ລາຍໄດ້ຂອງຄອບຄົວ ໃນປັດຈຸບັນ ຄາດວ່າເດັກນ້ອຍທີ່ເກີດໃນ ສປປ ລາວ ໃນມື້ນີ້ ຈະມີແຮງປະກອບສ່ວນເຂົ້າໃນການພັດທະນາປະເທດ ພຽງ 46% ເທົ່າຂອງເດັກທີ່ໄດ້ຮັບການສຶກສາ ແລະ ມີສຸຂະພາບທີ່ແຂງແຮງ ດັ່ງນັ້ນ ໂພຊະນາການທີ່ພຽງພໍ ໂດຍສະເພາະໃນຊ່ວງຕົ້ນໆຂອງຊີວິດ ແມ່ນມີຄວາມສຳຄັນທີ່ສຸດ ສຳລັບການພັດທະນາມັນສະໝອງຂອງເດັກ.
ທ່ານ ນາງ ປອ ເພຍ ເຣເບນໂລ ບຣິໂຕ, ຜູ້ຕາງໜ້າ ອົງການຢູນິເຊັບ ປະຈຳ ສປປ ລາວ ກໍໄດ້ກ່າວເຖິງຄວາມສຳຄັນຂອງການລົງທຶນດ້ານໂພຊະນາການ ຕໍ່ການພັດທະນາປະເທດຊາດ ທ່ານໄດ້ກ່າວວ່າ: “ຄວາມໝັ້ນຄົງທາງດ້ານເສດຖະກິດ ແລະ ການພັດທະນາຂອງ ສປປ ລາວ ໃນອະນາຄົດ ແມ່ນຂຶ້ນຢູ່ກັບສິ່ງທີ່ພວກເຮົາປະຕິບັດໃນມື້ນີ້. ໃນຊ່ວງເວລາອັນທ້າທາຍນີ້ ມັນເປັນສິ່ງສໍາຄັນທີ່ສຸດ ທີ່ພວກເຮົາຕ້ອງຮັບປະກັນວ່າ ທຸກໆເງິນໂດລາ ຫຼື ທຸກໆກີບ ແມ່ນໄດ້ຖືກນຳໃຊ້ຢ່າງເໝາະສົມ ໃນວຽກງານດ້ານໂພຊະນາການ ການລົງທຶນດ້ານໂພຊະນາການເດັກ ກໍຄື ການລົງທຶນໃນອະນາຄົດຂອງປະເທດ ແລະ ພວກເຮົາຈໍາເປັນຕ້ອງສຸມໃສ່ການປະຕິບັດທີ່ມີປະສິຕິຜົນສູງທີ່ສຸດ ໃຫ້ສາມາດເຂົ້າເຖິງເດັກທຸກໆຄົນໃນທົ່ວປະເທດ.”
ທ່ານ ອານເບີໂຕ້ ໂລດີເກ້ ອຳນວຍການພັດທະນາຊັບຊິນດ້ານມະນຸດ ຂອງຫ້ອງການທະນາຄານໂລກ ກ່າວວ່າ: “ເພື່ອປັບປຸງໂພຊະນາການຂອງແມ່ຍິງ ແລະ ເດັກ ມັນຈຳເປັນຕ້ອງມີການລົງທຶນໃນຫຼາຍໆຂະແໜງການ ພ້ອມທັງການບໍລິການດ້ານໂພຊະນາການທີ່ສຳຄັນ ໃຫ້ແກ່ຄອບຄົວທີ່ທົ່ວເຖິງ ແລະ ລະບົບການຕິດຕາມວຽກງານໂພຊະນາການທີ່ເຂັ້ມແຂງ ເພື່ອປະເມີນຜົນສໍາເລັດຢ່າງຊັດເຈນ”.
ກອງປະຊຸມໃນຄັ້ງນີ້ ໄດ້ສິ້ນສຸດລົງດ້ວຍການຢັ້ງຢືນເຖິງຄຳໝັ້ນສັນຍາຂອງ ລັດຖະບານ ແຫ່ງ ສປປ ລາວ ໃນການຈັດວາງເອົາວຽກງານໂພຊະນາການ ເປັນວຽກງານບູລິມະສິດໃນ ແຜນການພັດທະນາເສດຖະກິດ-ສັງຄົມແຫ່ງຊາດ ຄັ້ງທີ X ທີ່ຈະມາເຖິງນີ້ ນອກນັ້ນ ລັດຖະບານ ແຫ່ງ ສປປ ລາວ ຍັງໄດ້ໃຫ້ຄຳໝັ້ນສັນຍາ ໃນການຜັນຂະຫຍາຍແຜນການດຳເນີນງານ ເຊິ່ງຈະນຳພາໂດຍ ສຳນັກງານນາຍົກລັດຖະມົນຕີ ແຫ່ງ ສປປ ລາວ ສ້າງຕັ້ງໜ່ວຍ ເພື່ອຕິດຕາມການປະຕິບັດວຽກງານ ແລະ ຈັດຕັ້ງປະຕິບັດລະບົບຕິດຕາມງົບປະມານສຳລັບວຽກງານໂພຊະນາການ ເພື່ອຮັບປະກັນການລົງທຶນ ແລະ ນຳໃຊ້ແຫຼ່ງທຶນຢ່າງມີປະສິດທິຜົນ.
ກອງປະຊຸມສຸດຍອດດັ່ງກ່າວ ແມ່ນຈັດຂຶ້ນຜ່ານການສະໜັບສະໜູນຈາກ ທະນາຄານໂລກ ແລະ ອົງການຢູນີເຊັບ ໂດຍໄດ້ສຸມໃສ່ການລົງທຶນໃນການພັດທະນາຄວາມຮູ້ ທັກສະ ແລະ ປັບປຸງສຸຂະພາບຂອງເດັກ ກອງປະຊຸມ ສຸດຍອດຊັບສິນດ້ານມະນຸດ ຄັ້ງທີ I ແມ່ນໄດ້ຈັດຂຶ້ນໃນ ເດືອນພຶດສະພາ 2023 ໂດຍມີຫົວຂໍ້ຫຼັກແມ່ນ ການສຶກສາ.