ປັດຈຸບັນ ການເກີດອຸບັດເຫດຕາມຖະໜົນຫົນທາງໃນນະຄອນຫຼວງວຽງຈັນ ແມ່ນມີໃຫ້ເຫັນຢູ່ທຸກວັນ ຖ້າຫຼາຍທ່ານໄດ້ຕິດຕາມສື່ສັງຄົມອອນລາຍ ໂດຍສະເພາະແມ່ນ Facebook ກໍຄົງຈະຮູ້ກັນດີ ທີ່ມີຫຼາຍເພຈຂອງສື່ທາງການ ເພຈສ່ວນຕົວ ຫຼາຍແອັກເຄົ້າສ່ວນຕົວໄດ້ໂພສ ກໍລະນີເກີດອຸບັດເຫດລົງ ເຊິ່ງເຫັນໄດ້ວ່າຕົວເລກການເກີດອຸບັດເຫດຍັງສູງ ສ່ວນສາເຫດກໍເກີດຈາກການບໍ່ປະຕິບັດລະບຽບການສັນຈອນ ແລະ ໃນນັ້ນ ກໍມີການດື່ມສິ່ງມຶນເມົາແລ້ວຂັບຂີ່ ທີ່ໄດ້ກາຍເປັນອີກປັດໄຈຂອງການເກີດອຸບັດເຫດ.
ການດື່ມສິ່ງມຶນເມົາແລ້ວຂັບຂີ່ໃນປັດຈຸບັນ ຖືວ່າມີຫຼາຍສົມຄວນ ແຕ່ກໍບໍ່ສາມາດສະຫຼຸບໄດ້ດ້ວຍຕາເປົ່າ ນອກຈາກຜ່ານເຄື່ອງເປົ່າກວດຫາທາດເຫຼົ້າ ຂອງເຈົ້າໜ້າທີ່ຕຳຫຼວດຈະລາຈອນ ເນື່ອງຈາກວ່າໃນໄລຍະຜ່ານມາ ກໍຄືປັດຈຸບັນ ຜູ້ຂັບຂີ່ບາງກຸ່ມຄົນຍັງຖືເບົາຕໍ່ບັນຫາດັ່ງກ່າວ ຫຼາຍຄົນດື່ມສິ່ງມຶນເມົາແລ້ວຍັງຂັບຂີ່ ທັງໆທີ່ຮູ້ຢູ່ແລ້ວວ່າການກະທຳດັ່ງກ່າວ ແມ່ນຜິດຕໍ່ກົດລະບຽບການສັນຈອນ.
ເພື່ອແກ້ໄຂບັນຫາດັ່ງກ່າວ ໃນທ້າຍປີ 2018 ເຈົ້າຄອງນະຄອນຫຼວງວຽງຈັນ ໄດ້ອອກຂໍ້ຕົກລົງສະບັບເລກທີ 1323/ຈນວ ວ່າດ້ວຍມາດຕະການຫຼຸດຜ່ອນການເກີດອຸບັດເຫດ ແລະ ການຮັກສາຄວາມປອດໄພຕາມຖະໜົນໃນນະຄອນຫຼວງວຽງຈັນ ແລະ ໄດ້ຈັດຕັ້ງຜັນຂະຫຍາຍມາຈົນເຖິງປັດຈຸບັນ ແລະ ມີຜູ້ຂັບຂີ່ຫຼາຍໆຄົນທີ່ເຮັດໄດ້ ໃນທາງກົງກັນຂ້າມ ກໍຍັງມີຫຼາຍຄົນທີ່ຍັງຖືເບົາ.
ໃນມາດຕາ 13 ຂໍ້ 3 ຂອງຂໍ້ຕົກລົງສະບັບດັ່ງກ່າວລະບຸວ່າ: ເມື່ອກວດພົບທາດເຫຼົ້າ ແລະ ສິ່ງມຶນເມົາໃນຮ່າງກາຍຂອງຜູ້ຂັບຍານພາຫະນະ ເກີນປະລິມານທີ່ກຳນົດໄວ້ໃນມາດຕາ 20 ຂອງກົດໝາຍວ່າດ້ວຍການຈະລາຈອນທາງບົກ ໃຫ້ປະຕິບັດມາດຕະການຕໍ່ຜູ້ຂັບຂີ່ດັ່ງນີ້:
ຄັ້ງທີ 1: ຂຽນໃບຮັບສາລະພາບລະເມີດກົດຈະລາຈອນ ກັກໃບຂັບຂີ່ 1 ເດືອນ ແລະ ປັບໃໝຕ່ຳສຸດຕາມມາດຕາ 5 ຂອງດຳລັດເລກທີ 188 ແລະ ຕາມມາດຕາ 2 ຂອງມະຕິກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນນະຄອນຫຼວງວຽງຈັນ ຊຸດທີ I ສະບັບ ເລກທີ 028/ສປ ນວ ລົງວັນທີ 06 ກັນຍາ 2018.
ຄັ້ງທີ 2: ຂຽນໃບຮັບສາລະພາບລະເມີດກົດຈະລາຈອນ ກັກໃບຂັບຂີ່ 3 ເດືອນ ແລະ ປັບໃໝ 10 ເທົ່າ ຕາມມາດຕາ 5 ຂອງດຳລັດເລກທີ 188/ນຍ.
ຄັ້ງທີ 3: ຂຽນໃບຮັບສາລະພາບລະເມີດກົດຈະລາຈອນ ກັກໃບຂັບຂີ່ 6 ເດືອນຫາ 1 ປີ ແລະ ປັບໃໝ 20 ເທົ່າ ຕາມມາດຕາ 5 ຂອງດຳລັດເລກທີ 188/ນຍ.
ຄັ້ງທີ 4: ຂຽນໃບຮັບສາລະພາບລະເມີດກົດຈະລາຈອນ ຢຶດໃບຂັບຂີ່ 1 ປີ ຈຶ່ງອະນຸຍາດໃຫ້ໄປເສັງເອົາໃບຂັບຂີ່ຄືນໃໝ່ ແລະ ປັບໃໝ 20 ເທົ່າ ຕາມມາດຕາ 5 ຂອງດຳລັດເລກທີ 188/ນຍ.
ກໍລະນີຜູ້ຂັບຂີ່ຍານພາຫະນະດື່ມເຄື່ອງດື່ມທີ່ມີທາດເຫຼົ້າ ແລະ ເສບສິ່ງມຶນເມົາ ເປັນຕົ້ນເຫດພາໃຫ້ເກີດອຸບັດເຫດ ແມ່ນໃຫ້ນຳໃຊ້ມາດຕະການສູງສຸດ ແລະ ດຳເນີນຄະດີຕາມກົດໝາຍ.
ສຳລັບໃນດຳລັດ 188/ນຍ ມາດຕາ 5 ໄດ້ລະບຸໄວ້ວ່າ ຜູ້ຂັບຂີ່ໃດທີ່ມີທາດມຶນເມົາ ຫຼືທາດເຫຼົ້າຢູ່ໃນຮ່າງກາຍເກີນ 0,80 (g /I BrAC = 8mg/100ml) ກຣາມ/ລິດ ຫາກໄດ້ຂັບຂີ່ລົດ ຈະຖືກປັບໃໝຕາມປະເພດລົດ ດັ່ງນີ້: ລົດຖີບ 10.000 ກີບ ລົດຈັກ-ລົດ 3 ລໍ້ຕິດເຄືອງຈັກ-ລົດໄຖນາເດີນຕາມ 50.000 ກີບ ລົດເບົາ-ເກັງ-ກະບະ-ຈິບ-ຕູ້ 100.000 ກີບ ລົດໂດຍສານ 4 ລໍ້ 250.000 ກີບ ລົດບັນທຸກ 6 ລໍ້ຂຶ້ນໄປ 500.000 ກີບ ແລະ ລົດເມໂດຍສານ 1 ລ້ານກີບ.
ຢ່າງໃດກໍຕາມ ເມື່ອການດື່ມສິ່ງມຶນເມົາເປັນອີກປັດໄຈຂອງການເກີດອຸບັດເຫດ ຈຳເປັນຕ້ອງໄດ້ຮຽກຮ້ອງມາຍັງບັນດານັກຂັບຂີ່ທີ່ມັກດື່ມ ຕ້ອງໄດ້ເປັນເຈົ້າການໃນການຈັດຕັ້ງປະຕິບັດລະບຽບການສັນຈອນ ໂດຍສະເພາະ ດື່ມສິ່ງມຶນເມົາແລ້ວບໍ່ຂັບຂີ່ເດັດຂາດ ເພື່ອຫຼຸດຜ່ອນຕົວເລກການເກີດອຸບັດເຫດ ເຊິ່ງຈະສູນເສຍທັງສັບສິນສ່ວນຕົວ ສ່ວນລວມ ເສຍເວລາ ແລະ ຊີວິດອັນມີຄ່າຂອງຄົນເຮົາ.