ຫຼາຍທ່ານກໍຄົງໄດ້ຍິນ ແລະ ຕິດຕາມຂ່າວກ່ຽວກັບລົດຂອງຫ້ອງການມູນນິທິຊ່ວຍເຫຼືອຄົນທຸກຍາກ ຖືກຄົນຮ້າຍລັກໃນເດືອນພຶດສະພາຜ່ານມາ ເຊິ່ງເປັນທີ່ສົນໃຈຂອງບັນດາຊັ້ນຄົນໃນສັງຄົມ ແຕ່ສຸດທ້າຍ ຜູ້ຖືກຫາ ໜີບໍ່ມົ້ມ ພາຍຫຼັງເກີດອຸບັດເຫດໃນໄລຍະການຂັບລົດໜີ ຖືກເຈົ້າໜ້າທີ່ຈັບຕົວມາດຳເນີນຄະດີຕາມກົດໝາຍ.
ຕາມການລາຍງານຂ່າວຂອງເຟສບຸກ ແຟນເພຈ ຂອງປ້ອງກັນ ຄວາມສະຫງົບນະຄອນຫຼວງວຽງຈັນ ເຫັນວ່າ: ໃນຕອນເຊົ້າ 29 ພຶດສະພາ 2020 ເຈົ້າໜ້າທີ່ໜ່ວຍງານສອບສວນຄະດີອາຍາ ປກສ ເມືອງໄຊທານີ ນະຄອນຫຼວງວຽງຈັນ ໄດ້ລາຍງານໃຫ້ຮູ້ວ່າ: ໃນຄັ້ງວັນທີ 21 ພຶດສະພາ 2020 ເຈົ້າໜ້າທີ່ໜ່ວຍງານຄົ້ນຄວ້າສັງລວມຫ້ອງການພະແນກຕຳຫຼວດ ປກສ ເມືອງໄຊທານີ ນະຄອນຫຼວງວຽງຈັນ ໄດ້ຮັບແຈ້ງຄວາມຈາກທ້າວ ທັກສິນ ຂຸນນະເສນ ອາຍຸ 32 ປີ ອາຊີບພະນັກງານ ຢູ່ບ້ານທ່າພະ ເມືອງຫາດຊາຍຟອງ ນະຄອນຫຼວງວຽງຈັນ ຕາງໜ້າໃຫ້ຫ້ອງມູນນິທິຊ່ວຍເຫຼືອຄົນທຸກຍາກວ່າ: ໃນເວລາປະມານ 4:00 ໂມງເຊົ້າ ຂອງວັນທີ 21 ພຶດສະພາ 2020 ໄດ້ມີຄົນຮ້າຍ 1 ຄົນ ລັກເອົາລົດກະບະລີໂວ້ ປ້າຍທະບຽນ ກດ 1623 ກຳແພງນະຄອນ ເຊິ່ງເປັນລົດຂອງຫ້ອງການມູນນິທິຊ່ວຍເຫຼືອຄົນທຸກຍາກ ທີ່ຈອດໄວ້ແຄມທາງຕໍ່ໜ້າຫ້ອງການ ຢູ່ບ້ານສະພັງເມິກ ເມືອງໄຊທານີ ນະຄອນຫຼວງວຽງຈັນ ຫຼັງຈາກນັ້ນ ເຈົ້າໜ້າທີ່ຈຶ່ງໄດ້ອອກຕິດຕາມຈົນຮອດເວລາ 13:00 ໂມງ ກ່ອນໄດ້ຮັບແຈ້ງຈາກເຈົ້າໜ້າທີ່ກອງບັນຊາການ ປກສ ເມືອງບໍລິຄັນ ແຂວງບໍລິຄຳໄຊ ວ່າ ສາມາດຈັບຕົວຄົນຮ້າຍໄດ້ແລ້ວ ແມ່ນທ້າວ ໄຈ ອາຍຸ 28 ປີ ອາຊີບເຮັດນາ ບ້ານສະພັງເມິກ ເມືອງໄຊທານີ ນະຄອນຫຼວງວຽງຈັນ ດັ່ງນັ້ນ ເຈົ້າໜ້າທີ່ໜ່ວຍງານສອບສວນຄະດີອາຍາ ປກສ ເມືອງໄຊທານີ ນວ ຈິ່ງໄດ້ລົງໄປຈັບຕົວຜູ້ກ່ຽວມາດຳເນີນຄະດີ.
ຜ່ານການສອບສວນ ທ້າວ ໄຈ (ຜູ້ຖືກຫາ) ໃຫ້ການຮັບສາລະພາບຕໍ່ເຈົ້າໜ້າທີ່ວ່າ: ໃນເວລາປະມານ 11:00 ໂມງ ຂອງວັນທີ 15 ພຶດສະພາ 2020 ໄດ້ລັດຂໍຂີ່ລົດຂົນສົ່ງເບຍແຕ່ບ້ານຊຽງລື ເມືອງບໍລິຄັນ ແຂວງບໍລິຄຳໄຊ ເພື່ອມາຊອກເຮັດວຽກຢູ່ນະຄອນຫຼວງວຽງຈັນ ແຕ່ລົດຂົນສົ່ງເບຍຂຶ້ນມາຮອດແຕ່ບ້ານໂພນໄຊ ເມືອງບໍລິຄັນ ແຂວງບໍລິຄຳໄຊ ຕໍ່ມາຜູ້ກ່ຽວໄດ້ລັດລົດສົ່ງຊີມັງ ເພື່ອຂໍຂີ່ໃຫ້ຮອດນະຄອນຫຼວງວຽງຈັນ ຈາກນັ້ນ ຜູ້ກ່ຽວໄດ້ມາລົງລົດຢູ່ລະຫວ່າງໄຟອຳນາດດົງໂດກ ແລ້ວຍ່າງໄປພັກຢູ່ຄິວລົດເມສາຍໃຕ້.
ຕົກມາຮອດເວລາປະມານ 4:00 ໂມງເຊົ້າ ຂອງວັນທີ 21 ພຶດສະພາ 2020 ຜູ້ກ່ຽວເຫັນລົດກະບະລີໂວ້ ປ້າຍທະບຽນ ກດ 1623 ກຳແພງນະຄອນ ຈອດໄວ້ແຄມທາງ ຈຶ່ງແນມເຂົ້າໄປພາຍໃນຫ້ອງຂັບ ເຫັນກະແຈລົດສຽບຄາຮູກະແຈລົດ ຈຶ່ງເກີດມີແນວຄິດຢາກລັກລົດຄັນດັ່ງກ່າວ ເພື່ອຂັບຂີ່ກັບບ້ານ ສະນັ້ນ ຜູ້ກ່ຽວຈຶ່ງຫາວິທີລັກ ໂດຍໄດ້ໄຂປະຕູລົດເບື້ອງຊ້າຍເຂົ້າໄປຫ້ອງຂັບ ພ້ອມບິດກະແຈຕິດຈັກລົດ ແລ້ວຂັບຂີ່ມຸ່ງໜ້າເມື່ອບ້ານຊຽງລື ເມືອງບໍລິຄັນ ແຂວງບໍລິຄຳໄຊ ເມື່ອຂັບຂີລົດໄປຮອດບ້ານຜາເມືອງ ແຂວງບໍລິຄຳໄຊ ຜູ້ກ່ຽວໄດ້ຂັບລົດແຊງລົດກະບະຮຸນໄດ ແຕ່ແຊງບໍ່ພົ້ນ ເຮັດໃຫ້ທ້າຍລົດຜູ້ກ່ຽວດາດເອົາຫົວລົດກະບະຮຸນໄດ ເມື່ອເປັນແນວນັ້ນ ຜູ້ກ່ຽວໄດ້ຂັບລົດໄປຕໍ່ ບໍ່ຍອມຈອດເບິ່ງ ຈຶ່ງເຮັດໃຫ້ເຈົ້າຂອງລົດກະບະຮຸນໄດຂັບຂີ່ໄລ່ຕາມ ດ້ວຍຄວາມຢາກເອົາຕົວຫຼົບໜີ ຜູ້ກ່ຽວໄດ້ຂັບຂີ່ລົດດ້ວຍຄວາມໄວ ເຮັດໃຫ້ລົດເກີດອຸບັດ ເຫດພິກຂວ້ຳລົງຂ້າງທາງ ສຸດທ້າຍຈຶ່ງຖືກເຈົ້າໜ້າທີ່ຈັບຕົວມາດຳເນີນຄະດີຕາມຂັ້ນຕອນຂອງກົດໝາຍ.
ປັດຈຸບັນ ຄະດີດັ່ງກ່າວ ເຈົ້າໜ້າທີ່ໄດ້ລາຍງານໃຫ້ອົງການໄອຍະການປະຊາຊົນເຂດ II ນະຄອນຫຼວງວຽງຈັນ ເພື່ອຂໍຄຳສັ່ງກັກຂັງພາງ.