ທະນາຄານແຫ່ງ ສປປ ລາວ (ທຫລ) ຈັດພິທີເປີດນຳໃຊ້ລະບົບການຊຳລະ ແລະ ຫັກບັນຊີຂອງ ສປປ ລາວ (LaPASS) ເຊິ່ງເປັນລະບົບສຳຄັນທີ່ ທຫລ ເປັນຜູ້ຄວບຄຸມລະບົບ ແລະ ໃຫ້ບໍລິການແກ່ສະມາຊິກໃນການໄລ່ລຽງ ແລະ ຫັກບັນຊີທີ່ ທຫລ ໄດ້ປະຕິບັດພາລະບົດບາດໃນການພັດທະນາ ແລະ ຄຸ້ມຄອງລະບົບການຊຳລະໃຫ້ມີປະສິດທິຜົນໃນຮູບທັນສະໄໝ ສະດວກ ແລະ ມີຄວາມປອດໄພ ຂຶ້ນວັນທີ 1 ມິຖຸນາ 2020 ຢູ່ນະຄອນຫຼວງວຽງຈັນ ມີທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ ທ່ານ ສອນໄຊ ສິດພະໄຊ ຜູ້ວ່າການ ທຫລ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ລະບົບດັ່ງກ່າວເປັນລະບົບສຳຄັນທີ່ ທຫລ ເປັນຜູ້ຄວບຄຸມ ເຊິ່ງປີ 1999 ທຫລ ໄດ້ສ້າງຕັ້ງສູນຊຳລະສະສາງແຊັກຂຶ້ນກັບກົມບໍລິການທະນາຄານ ເພື່ອເຮັດໜ້າທີ່ເປັນສູນຊຳລະສະສາງແຊັກ (ສະເພາະສະກຸນເງິນກີບ) ລະຫວ່າງຜູ້ອອກແຊັກ ແລະ ຜູ້ຮຽກເກັບແຊັກ ຜ່ານລະບົບການໄລ່ລຽງ ມູນຄ່າຈຳນວນເງິນສຸດທິ ມີສະມາຊິກສູນຊຳລະ 8 ທະນາຄານ ມາຮອດປີ 2011 ທຫລ ໄດ້ສືບຕໍ່ພັດທະນາລະບົບການຊຳລະໄປສູ່ການເຊື່ອມໂຍງກັນຫຼາຍຂຶ້ນ ຈຶ່ງນຳໃຊ້ລະບົບການຊຳລະແບບທັນທີ (RTGS) ນຳໃຊ້ມາດຕະຖານຂໍ້ຄວາມ ISO 15022 ດ້ວຍຮູບແບບຂໍ້ຄວາມ MT ມີສະມາຊິກນຳໃຊ້ 23 ທະນາຄານ ແລະ 1 ກະຊວງ ມາຮອດປັດຈຸບັນ ມີສະມາຊິກ 41 ທະນາຄານ ແລະ 1 ກະຊວງ.
ຄຽງຄູ່ກັບການຈັດຕັ້ງຜັນຂະຫຍາຍ ແຜນຍຸດທະສາດການພັດທະນາລະບົບສະຖາບັນການເງິນ-ເງິນຕາ ສປປ ລາວ 10 ປີ (2016-2025) ແລະ ວິໄສທັດຮອດປີ 2030 ທີ່ ທຫລ ໄດ້ກຳນົດໄວ້ ເຊິ່ງ 1 ໃນ 4 ຍຸດທະສາດຫຼັກແມ່ນການພັດທະນາລະບົບການຊຳລະແຫ່ງຊາດ ໃຫ້ເປັນສູນກາງຊຳລະທີ່ທັນສະໄໝ ແລະ ປອດໄພ ຈຶ່ງໄດ້ສືບຕໍ່ປັບປຸງຍົກລະດັບລະບົບການຊຳລະທີ່ຮອງຮັບມາດຕະຖານ ISO 20022 ຄົ້ນຄວ້າກົນໄກຫັນປ່ຽນການຊຳລະສະສາງແຊັກທີ່ນຳໃຊ້ໃນປັດຈຸບັນ ທີ່ເປັນລະບົບແບບເຄິ່ງອັດຕະໂນມັດ ໃຫ້ເຂົ້າສູ່ລະບົບອັດຕະໂນມັດຢ່າງເຕັມສ່ວນ ໂດຍແຕ່ງຕັ້ງຄະນະຮັບຜິດຊອບຄົ້ນຄວ້າພັດທະນາລະບົບຊຳລະສະສາງແຊັກຫັນເປັນທັນສະໄໝ ຄະນະຮັບຜິດຊອບຄົ້ນຄວ້າຍົກລະດັບ RTGS ແລະ ລະບົບການໄລ່ລຽງແບບອັດຕະໂນມັດ (ACH) ທີ່ຮອງຮັບມາດຕະຖານ ISO 20022 ແລະ ຄະນະຮັບຜິດຊອບຄົ້ນຄວ້າສ້າງລະບຽບການ ແລະ ນະໂຍບາຍການດຳເນີນງານຂອງ RTGS ແລະ ACH ທີ່ຮອງຮັບມາດຕະຖານ ISO 20022.
ທ່ານ ສອນໄຊ ສິດພະໄຊ ກ່າວວ່າ: ການເປີດນຳໃຊ້ LaPASS ເປັນບາດກ້າວສຳຄັນ ສຳລັບການພັດທະນາລະບົບການຊຳລະຂອງ ສປປ ລາວ ໃນການຫັນເປັນທັນສະໄໝຮັບໃຊ້ພາກລັດ ແລະ ເອກະຊົນ ໃຫ້ສາມາດດຳເນີນທຸລະກຳໄດ້ຢ່າງຄ່ອງຕົວ ດ້ວຍການມີລະບົບທີ່ຮອງຮັບການຊຳລະມູນຄ່າສູງ-ຕ່ຳ ແລະ ເຊື່ອມໂຍງໄດ້ ປັດຈຸບັນ ລັດຖະບານກຳລັງເອົາໃຈໃສ່ວຽກງານລະບົບການຊຳລະ ເພື່ອຫັນການເກັບລາຍຮັບງົບປະມານໃຫ້ທັນສະໄໝ LaPASS ຈະຫັນເອົາລະບົບການຊຳລະງົບປະມານເຂົ້າມາລວມສູນຢູ່ ທຫລ ດ້ວຍການເຊື່ອມໂຍງລະບົບງົບປະມານເຂົ້າກັບ ACH ເຊິ່ງຈະຊ່ວຍຊຸກຍູ້ວຽກງານງົບປະມານ ໃຫ້ມີຄວາມຄ່ອງຕົວເຮັດໃຫ້ລັດຖະບານສາມາດຄຸ້ມຄອງລາຍຮັບ-ເກັບລາຍຈ່າຍຢ່າງມີປະສິດທິຜົນ ສາມາດຫຼຸດຜ່ອນຕົ້ນທຶນໃນການພັດທະນາລະບົບການຊຳລະທີ່ຕິດພັນກັບງົບປະມານ ແລະ ທີ່ສຳຄັນແມ່ນ ສາມາດຫຼຸດຜ່ອນການຮົ່ວໄຫຼຂອງການເກັບລາຍຮັບງົບປະມານເທື່ອລະກ້າວ.