ເນື່ອງໃນໂອກາດແຫ່ງການສະເຫຼີມສະຫຼອງການສ້າງຕັ້ງສາຍພົວພັນທາງການທູດ ລະຫວ່າງ ສາທາລະນະລັດອິນໂດເນເຊຍ ແລະ ສາທາລະນະລັດ ປະຊາທິປະໄຕ ປະຊາຊົນລາວ ຄົບຮອບ 65 ປີ ໄດ້ຈັດຂຶ້ນວັນທີ 24 ມິຖຸນາ 2022 ທີ່ໂຮງແຮມ ລາວພລາຊາ ນະຄອນຫຼວງວຽງຈັນ ໂດຍມີທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ ລັດຖະມົນຕີກະຊວງການຕ່າງປະເທດ ທ່ານ ປ.ເອກ ປຣາຕິໂຕ້ ຊູຮາຣິໂຢ (Pratito Soeharyo) ເອກອັກຄະລັດຖະທູດສາທາລະນະລັດອິນໂດເນເຊຍ ປະຈຳ ສປປ ລາວ ພ້ອມດ້ວຍຄະນະ ລັດຖະມົນຕີຈາກບັນດາກະຊວງ ບັນດາທຸຕານຸທູດ ຕາງໜ້າຈາກອົງການຈັດຕັ້ງສາກົນປະຈຳ ສປປ ລາວ ແລະ ພາກສ່ວນກ່ຽວຂ້ອງເຂົ້າຮ່ວມ.
ໃນພິທີທ່ານ ປຣາຕິໂຕ້ ຊູຮາຣິໂຢ ກ່າວວ່າ: ກ່ອນອື່ນໝົດ ຂໍສະແດງຄວາມຊົມເຊີຍເປັນຢ່າງຍິ່ງ ຕໍ່ກັບຜົນສຳເລັດຂອງກອງປະຊຸມສະພາແຫ່ງຊາດ ຊຸດທີ 11 ພັກປະຊາຊົນປະຕິວັດລາວ ໃນປີ 2021 ການຈັດຕັ້ງຄະນະບໍລິຫານງານສູນກາງພັກ ລັດຖະບານຊຸດໃໝ່ ແລະ ວາລະທີ່ພວມດໍາເນີນການຈັດຕັ້ງແຜນພັດທະນາເສດຖະກິດ ສັງຄົມ ແຫ່ງຊາດ ຄັ້ງທີ 9 ນຳໂດຍທ່ານ ທອງລຸນ ສີສຸລິດ ປະທານປະເທດແຫ່ງ ສປປ ລາວ ແລະ ທ່ານ ພັນຄຳ ວິພາວັນ ນາຍົກລັດຖະມົນຕີ ເຊິ່ງຂໍຖືໂອກາດນີ້ ຂໍກ່າວຊົມເຊີຍມາຍັງທ່ານ ສະເຫຼີມໄຊ ກົມມະສິດ ໃນໂອກາດທີ່ທ່ານໄດ້ຖືກແຕ່ງຕັ້ງເປັນຮອງນາຍົກລັດຖະມົນຕີ ແລະ ຖືກຄັດເລືອກເປັນສະມາຊິກກົມການເມືອງສູນກາງພັກປະຊາຊົນປະຕິວັດລາວ ດ້ວຍເຫດນີ້ ອິນໂດເນເຊຍຫວັງວ່າຈະຮ່ວມມືຢ່າງແໜ້ນແຟ້ນກັບທ່ານໃນຊຸມປີຕໍ່ໜ້າ ເພື່ອເພີ່ມທະວີການຮ່ວມມື ແລະ ການເປັນຄູ່ຮ່ວມຍຸດທະສາດໃນທຸກຂັ້ນ.
ຕະຫຼອດໄລຍະເວລາທີ່ ສປປ ລາວ ໄດ້ຜ່ານການຫັນປ່ຽນປະຕິຮູບຢ່າງຕັ້ງໜ້າ ເຮັດໃຫ້ໝັ້ນໃຈວ່າ ປະເທດຈະມຸ່ງໜ້າໄປສູ່ການເຊື່ອມໂຍງ ແລະ ເຮັດໜ້າທີ່ເປັນສູນກາງເຊື່ອມຕໍ່ໃນພາກພື້ນ ໃນຕໍ່ໜ້າ ສປປ ລາວ ຈະຍັງມີການສືບຕໍ່ການຫັນປ່ຽນປະຕິຮູບຫຼາຍຂື້ນ ແລະ ພວກເຮົາຍິນດີທີ່ໄດ້ຮ່ວມເປັນສັກຂີພະຍານເຊັ່ນ: ການເປີດນຳໃຊ້ທາງລົດໄຟ ລາວ-ຈີນ ຄັ້ງປະຫວັດສາດໃນເດືອນທັນວາຂອງປີທີ່ຜ່ານມາ ເຊິ່ງເຊື່ອວ່າ ພວກເຮົາສ່ວນ ຫຼາຍໃນທີ່ນີ້ ແມ່ນໃດ້ຮັບປະສົບການທີ່ດີຈາກນຳໃຊ້ມາແລ້ວ.
ປະເທດລາວ ແລະ ອິນໂດເນເຊຍ ແມ່ນຍັງຄົງຢູ່ໃນໄລຍະສຳຫຼວດ ແລະ ຊຸກຍູ້ສົ່ງເສີມໃຫ້ມີການເພີ່ມທະວີການພົວພັນທາງດ້ານການຄ້າ ແລະ ການລົງທຶນສອງຝ່າຍ ການຕິດຕໍ່ພົວພັນລະຫວ່າງສອງລັດຖະບານ ແລະ ປະຊາຊົນ ລວມທັງການເພີ່ມທະວີການຮ່ວມມືສອງຝ່າຍ ການຮ່ວມມືໃນພາກພື້ນ ແລະ ການຮ່ວມມືຫຼາຍຝ່າຍ ເຖິງແມ່ນວ່າຜົນກະທົບຂອງການລະບາດຂອງພະຍາດໂຄວິດ 19 ແມ່ນໄດ້ສົ່ງຜົນກະທົບໂດຍກົງຫຼາຍດ້ານ ຕໍ່ກັບຄວາມພະຍາຍາມຂອງພວກເຮົາໃນການເພີ່ມທະວີການຮ່ວມມືໃນຂົງເຂດດັ່ງກ່າວ ເຖິງຢ່າງໃດກໍ່ຕາມ ໄດ້ຊຸມໃສ່ຄວາມພະຍາຍາມທີ່ຈະສະໜັບສະໜູນເຊິ່ງກັນ ແລະ ກັນໃນເວທີສາກົນ ເວົ້າສະເພາະ ໃນຂອບການຮ່ວມມືຂອງອາຊຽນ ເຊິ່ງໄດ້ພັດທະນາຈົນກາຍມາເປັນປະຊາຄົມອັນໜຶ່ງອັນດຽວກັນ ປັດຈຸບັນ ສປປ ລາວ ແມ່ນໄດ້ພິສູດຕົນເອງໃນການກ້າວຂຶ້ນເປັນຂົວເຊື່ອມຕໍ່ໃນພາກພື້ນຢ່າງປະສົບຜົນສຳເລັດເທື່ອລະກ້າວ ພ້ອມກັນນັ້ນ ກໍເປັນການສ້າງທ່າແຮງ ກາລະໂອກາດໃໝ່ໆໃນການສ້າງໂອກາດ ເພື່ອໃຫ້ມີການລົງທຶນໃສ່ຂະແໜງ ການບຸລິມະສິດຕ່າງໆ ແລະ ການຮ່ວມມືທີ່ບົ່ມຊ້ອນ ເປັນຕົ້ນແມ່ນຂົງເຂດການສຶກສາ ວັດທະນະທຳ ສັງຄົມ ໃນຕໍ່ໜ້າ ໝາກຜົນສໍາເລັດທີ່ລໍຖ້າພວກເຮົາໃຫ້ຮ່ວມກັນສຳຫຼວດ ຄົ້ນຄວ້າເຖິງຄວາມເປັນໄປໄດ້ ເພື່ອເພີມພູນໝາກຜົນສໍາເລັດຂອງສອງປະເທດໃນຕໍ່ໜ້າ.
ຂະນະທີ່ທຸກປະເທດພວມປະສົບກັບບັນຫາຄວາມຫຍຸ້ງຍາກ ແລະ ປາກົດການຫຍໍ້ທໍ້ທີ່ເກີດຂື້ນໃນທົ່ວໂລກ ຜົນກະທົບອັນຮ້າຍແຮງຈາກການແຜ່ລະບາດຂອງພະຍາດໂຄວິດ 19 ຜົນກະທົບຈາກການປ່ຽນແປງຂອງດິນຟ້າອາກາດ ລາຄາອາຫານ ແລະ ພະລັງງານທີ່ເພີ່ມສູງຂຶ້ນ ການຂາດແຄນແຫຼ່ງຂອງການສະໜອງຕ່ອງໂສ້ ຄວາມຕ້ອງການ ແລະ ຄວາມເຄັ່ງຕຶງທາງດ້ານພູມສາດ ທັງສອງປະເທດຕ້ອງປະເຊີນໜ້າກັບຄວາມຫຍຸ້ງຍາກດັ່ງກ່າວດ້ວຍຄວາມຮ່ວມມືທີ່ດີ ແລະ ໃຫ້ມີຄວາມສອດຄ່ອງກັນ ເພາະສະນັ້ນ ອິນໂດເນເຊຍມຸ່ງເນັ້ນໄປທີ່ການຮັດແໜ້ນສາຍພົວພັນກັບ ສປປ ລາວ ໃຫ້ເລິກເຊິ່ງກ່ວາເກົ່າ ເພື່ອແກ້ໄຂບັນຫາຜົນກະທົບຂອງສິ່ງທ້າທາຍຕ່າງໆ ບໍ່ວ່າຈະເປັນການຮ່ວມມືແບບສອງຝ່າຍຫຼືແບບກວມລວມ.
ລັດຖະບານ ອິນໂດເນເຊຍ ແລະ ລາວ ລວມເຖິງປະຊາຊົນທັງສອງຊາດ ມີຫຼາຍສິ່ງທີ່ເປັນໜ້າສະເຫຼີມສະຫຼອງ ແລະ ຄວາມພາກພູມໃຈຕໍ່ຄວາມພະຍາຍາມ ຜົນສຳເລັດ ມິດຕະພາບອັນຍາວນານ ແລະ ຄວາມສາມັກຄີອ້າຍນ້ອງຕະຫຼອດໄລຍະທີ່ຜ່ານມາ ແລະ ໃນໄລຍະຊຸມປີຕໍ່ໜ້າ ດ້ວຍເຫດນີ້ ຂໍສະແດງຄວາມຂອບໃຈຢ່າງເລິກເຊິ່ງມາຍັງລັດຖະບານແຫ່ງ ສປປ ລາວ ໃນການບຳລຸງຮັກສາສາຍພົວພັນອັນດີງາມຂອງສອງປະເທດ.