ກະຊວງສຶກສາທິການ ແລະ ກີລາ ແລະ ລັດຖະບານອົດສະຕຣາລີ ເປີດການເຝິກອົບຮົມຄູສອນຊັ້ນປະຖົມສຶກສາຂັ້ນ ປ4 ກ່ຽວກັບຫຼັກສູດສະບັບປັບປຸງໃໝ່ ຮູບແບບປະສົມປະສານລະຫວ່າງຮູບແບບທາງ ໄກ ແລະ ແບບເຊິ່ງໜ້າ ລະຫວ່າງວັນທີ 16-21 ພຶດສະພາ 2022 ທີ່ຮ້ານອາຫານຄົວລາວ ນະຄອນຫຼວງວຽງຈັນ ໂດຍມີທ່ານ ປອ ອ່ອນແກ້ວ ນວນນະວົງ ຜູ້ອຳນວຍການສະຖາບັນຄົ້ນຄວ້າວິທະຍາສາດການສຶກສາ (ສວສ) ກະຊວງສຶກສາທິການ ແລະ ກີລາ ທ່ານ ແດນ ເຮວເດິນ ຮອງເອກອັກຄະລັດຖະທູດອົດສະຕຣາລີປະຈຳລາວ ພ້ອມດ້ວຍຄູເຝິກຫຼັກແຫຼ່ງຈໍານວນ 63 ທ່ານຈາກສູນກາງ ແລະ ທ້ອງຖິ່ນເຂົ້າຮ່ວມ.
ການເຝິກອົບຮົມຄູເຝິກຫຼັກແຫຼ່ງ ຈະໄດ້ຮັບຄໍາແນະນໍາກ່ຽວກັບເນື້ອໃນຫຼັກສູດຂັ້ນ ປ4 ສະບັບປັບປຸງໃໝ່ ມີ 3 ວິຊາເຊັ່ນ: ວິຊາພາສາລາວ ພາສາອັງກິດ ແລະ ວິຊາວິທະຍາສາດ ແລະ ສິ່ງແວດລ້ອມ ມີໂອກາດໃນການສໍາຫຼວດ ທົດສອບ ແລະ ສະທ້ອນຄືນບັນດາກິດຈະກໍາຕ່າງໆໃນຫ້ອງຮຽນທີ່ໄດ້ຮັບການສ້າງຂຶ້ນ ໂດຍອີງໃສ່ຮູບແບບການຮຽນ ໂດຍເອົານັກຮຽນເປັນໃຈກາງໃນການຮຽນຜ່ານກິດຈະກໍາການທົດລອງການສອນ ນອກນີ້ ຍັງຈະໄດ້ຮັບຄໍາແນະນໍາກ່ຽວກັບວິທີການປະເມີນແບບໃໝ່ ແລະ ຮ່າງການແຕ່ງບົດສອນຊັ້ນປະຖົມແບບໃໝ່ນໍາອີກ ໃນພາກສຸດທ້າຍຂອງການອົບຮົມ ຈະໄດ້ສຸມໃສ່ການຮຽນແນວທາງທີ່ຄູເຝິກ ແລະ ຄູສອນຈະສາມາດສືບຕໍ່ຮຽນຮູ້ ພັດທະນາ ຊອກຫາ ແລະ ໃຫ້ການສະໜັບສະໜູນການນໍາໃຊ້ຫຼັກສູດສະບັບປັບປຸງໃໝ່ໃນລະຫວ່າງສົກຮຽນອີກດ້ວຍ.
ທ່ານ ປອ ອ່ອນແກ້ວ ນວນນະວົງ ໄດ້ກ່າວວ່າ: ຮູ້ສຶກເປັນກຽດທີ່ໄດ້ເປີດການເຝິກອົບຮົມຄູເຝິກຫຼັກແຫຼ່ງໃນຄັ້ງນີ້ ເປັນຈຸດເລີ່ມຕົ້ນຂອງຂະບວນການເຝິກອົບຮົມຄູສອນຊັ້ນປະຖົມສຶກສາຂັ້ນ ປ4 ເພື່ອໃຫ້ຄູທຸກຄົນມີທັກສະ ເຕັກນິກ ຄວາມຮູ້ໃນພາກປະຕິບັດທີ່ຈຳເປັນ ເຂົ້າໃນການນຳໃຊ້ອຸປະກອນສື່ການຮຽນ-ການສອນແບບໃໝ່ໃນຫ້ອງຮຽນຂອງພວກເຂົາ ແລະ ເປັນການປັບປຸງຜົນການຮຽນຂອງນັກຮຽນໃຫ້ດີຂຶ້ນ ຂໍສະແດງຄວາມຂອບໃຈຕໍ່ລັດຖະບານອົດສະຕຣາລີ ທີ່ສືບຕໍ່ໃຫ້ການສະໜັບສະໜູນຢ່າງຕໍ່ເນື່ອງ ໃນການພັດທະນາ ແລະ ການຈັດຕັ້ງປະຕິບັດຫຼັກສູດສະບັບປັບປຸງໃໝ່.
ທ່ານ ແດນ ເຮວເດິນ ໄດ້ກ່າວວ່າ: ລັດຖະບານອົດສະຕຣາລີ ແລະ ລັດຖະບານ ສປປ ລາວ ມີເປົ້າໝາຍຮ່ວມກັນ ເພື່ອຮັບປະກັນການສຶກສາໃຫ້ເຂົ້າເຖິງໄດ້ສໍາລັບທຸກຄົນ ພວກເຮົາມຸ່ງໝັ້ນຮ່ວມກັນທີ່ຈະສົ່ງເສີມຄວາມເທົ່າທຽມ ແລະ ຄວາມສະເໝີພາບໃນທຸກໆກິດຈະກໍາທີ່ພວກເຮົາໃຫ້ການສະໜັບສະໜູນ ເນັ້ນໜັກໃສ່ວຽກງານບົດບາດຍິງ-ຊາຍ ແລະ ເພື່ອເປັນການອໍານວຍຄວາມສະດວກໃນການຮຽນຮູ້ດ້ວຍຕົນເອງ ການກະກຽມບົດຮຽນ ການທົບທວນເຕັກນິກການສອນ ການສ້າງວິດີໂອຫຼາຍຮູບແບບໃຫ້ກັບຄູສອນ ແລະ ຄູຝຶກໄດ້ເບິ່ງ ພ້ອມມີຟາຍສຽງສໍາລັບວິຊາພາສາອັງກິດຂັ້ນ ປ4 ຈຳນວນ 105 ຟາຍ ຈະນຳໃຊ້ໃນໄວໆນີ້.
ການຈັດການຝຶກອົບຮົມໃຫ້ກັບຄູສອນຂັ້ນ ປ.4 ແລະ ຄູສຶກສານິເທດປະມານ 9.700 ຄົນ ໃນເດືອນກໍລະກົດ ຫາເດືອນສິງຫາ ປີ 2022. ຂ້າພະເຈົ້າຫວັງວ່າທຸກທ່ານຈະປະສົບຜົນສຳຜົນສຳເລັດໄປດ້ວຍດີ ຄວາມພາກພຽນ ແລະ ພະຍາຍາມຂອງພວກທ່ານ ຈະຊ່ວຍໃຫ້ເດັກນ້ອຍຊັ້ນປະຖົມໃນປະເທດລາວໄດ້ຮຽນຮູ້ດີຂຶ້ນ ແລະ ປະສົບຜົນສຳເລັດຫຼາຍຂຶ້ນ.”
# ຂ່າວ – ພາບ : ບຸນມີ