ວັນທີ 3 ມີນາ 2022 ທີ່ກະຊວງການຕ່າງປະເທດ ໄດ້ມີກອງປະຊຸມຄະນະກຳມາທິການຮ່ວມ ລາວ-ສະຫະພາບເອີຣົບ (EU) ຄັ້ງທີ 10 ໃນຮູບແບບທາງໄກ ໂດຍການເປັນປະທານຮ່ວມຂອງທ່ານ ບຸນເຫຼືອ ພັນດານຸວົງ ຮອງລັດຖະມົນຕີກະຊວງການຕ່າງປະເທດແຫ່ງ ສປປ ລາວ ແລະ ທ່ານ ນາງ ເປົາລາ ປຳປາໂລນີ ຮອງຫົວໜ້າກົມໃຫຍ່ ຫົວໜ້າຮັບຜິດຊອບລວມຂົງເຂດອາຊີ-ປາຊີຟິກ ສຳນັກງານການຕ່າງປະເທດສະຫະພາບເອີຣົບ ມີຄະນະຜູ້ແທນຈາກບັນດາກະຊວງ ແລະ ພາກສ່ວນທີ່ກ່ຽວຂ້ອງຂອງທັງສອງຝ່າຍເຂົ້າຮ່ວມ.
ກອງປະຊຸມຄະນະກຳມາທິການຮ່ວມ ລາວ- EU ຈັດຂຶ້ນທຸກໆ 2 ປີຕໍ່ຄັ້ງ ໂດຍໄດ້ຜັດປ່ຽນກັນເປັນເຈົ້າພາບ ຊຶ່ງຄັ້ງ ນີ້ເປັນຄັ້ງທໍາອິດທີ່ ສປປ ລາວ ເປັນເຈົ້າພາບຈັດໃນຮູບແບບທາງໄກ ແລະ ກໍເປັນຄັ້ງທໍາອິດ ທີ່ສອງຝ່າຍໄດ້ຍົກລະດັບກອງປະຊຸມຂຶ້ນເປັນຂັ້ນຮອງລັດຖະມົນຕີ ຊຶ່ງສະແດງເຖິງການພົວພັນຮ່ວມມື ລະຫວ່າງ ລາວ- EU ເສີມຂະຫຍາຍຢ່າງຕໍ່ເນື່ອງ ແລະ ແຕກດອກອອກຜົນຍິ່ງໆຂຶ້ນ.
ກອງປະຊຸມໃນຄັ້ງນີ້ ສອງຝ່າຍໄດ້ແລກປ່ຽນຄຳຄິດຄຳເຫັນກ່ຽວກັບສະພາບການພົ້ນເດັ່ນດ້ານການພັດທະນາເສດຖະກິດ-ສັງຄົມ ຢູ່ ສປປ ລາວ ແລະ EU ໃນສະພາບການທີ່ປະເທດຕ່າງໆໃນໂລກກຳລັງຮັບມືກັບການລະບາດຂອງພະຍາດໂຄວິດ-19 ທີ່ໄດ້ສົ່ງຜົນກະທົບຢ່າງໜັກໜ່ວງຕໍ່ການພັດທະນາປະເທດຊາດ. ໃນກອງປະຊຸມ ໄດ້ຮັບຟັງການລາຍງານໂດຍຫຍໍ້ກ່ຽວກັບຜົນຂອງກອງປະຊຸມຂອງບັນດາໜ່ວຍງານຮ່ວມມື ການຄ້າ ສິດ ທິມະນຸດ ແລະ ວຽກງານທີ່ປິ່ນອ້ອມອື່ນໆ ລວມທັງການຮ່ວມມື ລະຫວ່າງອາຊຽນ ແລະ EU. ນອກຈາກນັ້ນ ສອງຝ່າຍຍັງໄດ້ແລກປ່ຽນຂໍ້ມູນຂ່າວສານ ຖອດຖອນບົດຮຽນ ແລະ ສະຫຼຸບຕີລາຄາຄືນ ກ່ຽວກັບຜົນການຈັດຕັ້ງປະຕິບັດບັນດາໂຄງການທີ່ EU ໃຫ້ການຊ່ວຍເຫຼືອ ພ້ອມທັງສະເໜີແຜນການຮ່ວມມືໃນຕໍ່ໜ້າລະຫວ່າງ ສປປ ລາວ ແລະ EU..
.
# ຂ່າວ-ພາບ : ໄຊບັນດິດ