ກົມສົ່ງເສີມການລົງທຶນ ກະຊວງແຜນການ ແລະ ການລົງທຶນ ໄດ້ຈັດກອງປະຊຸມສະຫຼຸບຕີລາຄາສະພາບການຈັດຕັ້ງປະຕິບັດແຜນດຳເນີນງານປີ 2021 ການປັບປຸງແຜນວຽກບູລິມະສິດຂອງແຜນດຳເນີນງານປີ 2022 ແລະ ວຽກງານບໍລິການ ການລົງທຶນປະຕູດຽວ ແລະ ບັນຊີກິດຈະການຄວບຄຸມທີ່ຕິດພັນກັບຂະແໜງການ ຕາມຄໍາສັ່ງເລກທີ 02/ນຍ ແລະ 03/ນຍ ຂຶ້ນໃນວັນທີ 19 ມັງກອນ 2022 ໂດຍເປັນປະທານຂອງທ່ານນາງ ຄຳຈັນ ວົງແສນບູນ ຮອງລັດຖະມົນຕີກະຊວງແຜນການ ແລະ ການລົງທຶນ ມີບັນດາຜູ້ຕາງໜ້າຈາກຄະນະຮັບຜິດຊອບປັບປຸງຕົວຊີ້ວັດຈາກ 7 ກະຊວງ ສານປະຊາຊົນສູງສຸດ ລັດວິສາຫະກິດໄຟຟ້າລາວ ບໍລິສັດຂໍ້ມູນຂ່າວສານສິນເຊື່ອແຫ່ງ ສປປ ລາວ ແລະ ສຳນັກງານຄະນະກຳມະການຄຸ້ມຄອງຫຼັກຊັບ ຂະແໜງການທີ່ກ່ຽວຂ້ອງຈາກນະຄອນຫຼວງ ສະພາການຄ້າ ແລະ ອຸດສາຫະກຳແຫ່ງຊາດລາວ ເຂົ້າຮ່ວມ.
ທ່ານນາງ ຄຳຈັນ ວົງແສນບູນ ກ່າວວ່າ: ການຈັດຕັ້ງປະຕິບັດຄໍາສັ່ງ ເລກທີ 02/ນຍ ແລະ 03/ນຍ ໃນໄລຍະຜ່ານມາ ເຫັນວ່າຫຼາຍຂະແໜງການໄດ້ເຮັດສໍາເລັດການປັບປຸງກົນໄກ ບັນດາລະບຽບການ ແລະ ນິຕິກໍາຫຼາຍສະບັບ ຕາມຂອບເຂດສິດ ແລະ ໜ້າທີ່ໃນຄວາມຮັບຜິດຊອບຂອງຕົນ ເພື່ອຫຼຸດຂອດຂັ້ນ ເວລາ ແລະ ຄ່າໃຊ້ຈ່າຍຕ່າງໆໃນການດໍາເນີນທຸລະກິດໃຫ້ມີຄວາມສະດວກງ່າຍດາຍຂຶ້ນກວ່າເກົ່າ ຄຽງຄູ່ກັນນັ້ນ ວຽກງານການຫັນເປັນທັນສະໄໝ ເພື່ອປັບປຸງການເຊື່ອມຕໍ່ການບໍລິການຜ່ານລະບົບເອເລັກໂຕຣນິກ ກໍໄດ້ຮັບການເອົາໃຈໃສ່ ແລະ ມີຄວາມຄືບໜ້າສົມຄວນ.
ຄຽງຄູ່ກັບຜົນສໍາເລັດດັ່ງກ່າວ ພວກເຮົາກໍຍັງມີສິ່ງທ້າທ້າຍຫຼາຍຢ່າງທີ່ຕ້ອງໄດ້ຮ່ວມມືກັນເລັ່ງແກ້ໄຂ ແລະ ປັບປຸງໃຫ້ໄດ້ຕາມເປົ້າໝາຍທີ່ລັດຖະບານໄດ້ຕັ້ງໄວ້ ສືບຕໍ່ເປັນເຈົ້າການຕື່ມໃນການຈັດຕັ້ງປະຕິບັດ ໂດຍມີແບບແຜນຢ່າງລະອຽດ ຄົ້ນຄວ້າປັບປຸງສ້າງແຜນກິດຈະກໍາໃຫ້ສອດຄ່ອງກັບສະພາບປົກກະຕິໃໝ່ ໃນສະພາບການແຜ່ລະບາດຂອງພະຍາດໂຄວິດ-19 ເພື່ອໃຫ້ສາມາດເຄື່ອນໄຫວແຜນກິດຈະກຳສໍາເລັດຕາມເປົ້າໝາຍ ແລະ ໃຫ້ສອດຄ່ອງກັບສະພາບຄວາມເປັນຈິງ ມີປະສິດທິພາບ ແລະ ໃຫ້ມີລັກສະນະບຸກທະລຸຢ່າງແຂງແຮງກວ່າເກົ່າ ໃນຂະນະດຽວກັນ ກໍສືບຕໍ່ຊຸກຍູ້ການຈັດຕັ້ງປະຕິບັດບັນດານິຕິກໍາ ແລະ ລະບຽບການທີ່ໄດ້ປັບປຸງແລ້ວ ໃຫ້ສາມາດຈັດຕັ້ງປະຕິບັດໄດ້ຕົວຈິງ ແລະ ເປັນເອກະພາບ ກາຍເປັນກໍາລັງທີ່ສໍາຄັນປະກອບສ່ວນເຂົ້າໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດໃນແຕ່ລະໄລຍະໃຫ້ບັນລຸຄາດໝາຍທີ່ວາງໄວ້.
ໃນຕອນທ້າຍຂອງການປິດກອງປະຊຸມ ທ່ານປະທານກອງປະຊຸມໄດ້ຮຽກຮ້ອງໃຫ້ຂະແໜງການທີ່ກ່ຽວຂ້ອງ ແລະ ຄະນະຮັບຜິດຊອບແຕ່ລະຂະແໜງການ ເອົາໃຈໃສ່ ແລະ ສືບຕໍ່ຈັດຕັ້ງປະຕິບັດຕາມຄຳສັ່ງເລກທີ 02/ນຍ ແລະ 03/ນຍ ເຖິງແມ່ນວ່າຈະບໍ່ມີການປະເມີນອັນດັບຄວາມສະດວກໃນການດໍາເນີນທຸລະກິດໂດຍກຸ່ມທະນາຄານໂລກ ຕາມຖະແຫຼງການຢຸດຕີພິມບົດລາຍງານການປັບປຸງສະພາບການດໍາເນີນທຸລະກິດ ກໍໃຫ້ສືບຕໍ່ປະສານສົມທົບກັບຂະແໜງການທີ່ກ່ຽວຂ້ອງທັງ 10 ຕົວຊີ້ວັດ ລວມທັງສະພາການຄ້າ ແລະ ອຸດສາຫະກໍາແຫ່ງຊາດລາວ ເພື່ອຄົ້ນຄວ້າຍົກລະດັບກົນໄກທີ່ມີຢູ່ແລ້ວ ຫັນມາເປັນການປະເມີນພາຍໃນ ສໍາລັບຂໍ້ຄົງຄ້າງທີ່ຕິພັນກັບຄໍາສັ່ງເລກທີ 03/ນຍ ກໍເຫັນວ່າທຸກຂະແໜງການໄດ້ສໍາເລັດການສ້າງຕັ້ງໜ່ວຍງານການບໍລິການການລົງທຶນປະຕູດຽວ ແລະ ປະກອບເຂົ້າໃນຄະນະ ຄໍາສັ່ງເລກທີ 03/ນຍ ແຕ່ກົນໄກປະສານງານ ແລະ ການລາຍງານຍັງບໍ່ເປັນປົກກະຕິ ສືບຕໍ່ເອົາໃຈໃສ່ທົບທວນ ຄົ້ນຄວ້າ ແລະ ປັບປຸງບັນຊີກິດຈະການຄວບຄຸມຂອງຂະແໜງການຕົນ ໂດຍເນັ້ນໃສ່ບັນດາໂຄງການທີ່ມີລັກສະນະຍຸດທະສາດ ມີຜົນກະທົບຕໍ່ຄວາມໝັ້ນຄົງຂອງຊາດ ຕໍ່ສິ່ງແວດລ້ອມ ແລະ ສັງຄົມ ເພື່ອເອົາເຂົ້າມາຄວບຄຸມ ແລະ ຫັນທິດໃຫ້ຂັ້ນທ້ອງຖິ່ນອະນຸມັດ ແລະ ຄຸ້ມຄອງໃຫ້ຫຼາຍຂຶ້ນ.
ອີກບັນຫາໜຶ່ງທີ່ພວກເຮົາຍັງຈະຕ້ອງສືບຕໍ່ແກ້ໄຂບັນຫາ ການອະນຸມັດການລົງທຶນທີ່ຍັງຊັກຊ້າ ຫຼາຍຂັ້ນຫຼາຍຂອດ ຈຶ່ງເຫັນວ່າມີຄວາມຈໍາເປັນຕ້ອງໄດ້ປັບປຸງດຳລັດ ສະບັບເລກທີ 05/ນຍ ລົງວັນທີ 05/01/2018 ກ່ຽວກັບວຽກງານການຈັດຕັ້ງປະຕິບັດ ແລະ ການເຄື່ອນໄຫວຂອງຄະນະກໍາມະການສົ່ງເສີມ ແລະ ຄຸ້ມຄອງການລົງທຶນ ໂດຍສະເໜີໃຫ້ມີການປັບປຸງບາງມາດຕາໃໝ່ຄື: ມາດຕາທີ 6ວ່າດ້ວຍໂຄງປະກອບບຸຄະລາກອນ ມາດຕາ 7 ວ່າດ້ວຍກຳນົດເວລາການພິຈາລະນາຄຳຮ້ອງຂໍລົງທຶນກິດຈະ ການໃນບັນຊີຄວບຄຸມ ມາດຕາ 8 ວ່າດ້ວ ກຳນົດເວລາການພິຈາລະນາ ຄໍາຮ້ອງຂໍລົງທຶນໃນກິດຈະການສຳປະທານ ເເລະ ມາດຕາ 10 ວ່າດ້ວຍແບບແຜນວິທີເຮັດວຽກ ພ້ອມນີ້ ກໍຍັງໄດ້ສະເໜີເອົາບາງມາດຕາຂອງກົດໝາຍວ່າດ້ວຍການສົ່ງເສີມການລົງທຶນເຂົ້າມາຜັນຂະຫຍາຍຢູ່ໃນດໍາລັດສະບັບປັບປຸງໃໝ່ ຄື: ມາດຕາ 37 ແລະ ມາດຕາ 46 ຮ່າງດຳລັດສະບັບປັບປຸງດັ່ງກ່າວ ແມ່ນໄດ້ສົ່ງໄປຍັງທ່ານນາຍົກລັດຖະມົນຕີ ຕາມໜັງສືລາຍງານ ສະບັບເລກທີ 1070/ກຜທ.ລທ6 ລົງວັນທີ 9 ກໍລະກົດ 2021 ປັດຈຸບັນ ແມ່ນຍັງລໍຖ້າການອະນຸມັດຈາກທ່ານນາຍົກລັດຖະມົນຕີ.
# ຂ່າວ & ພາບ : ສີພອນ