ວັນທີ 1 ທັນວາປີ 2021 ລັດຖະບານລາວ ໄດ້ຈັດພິທີປະດັບການຍ້ອງຍໍບັ້ນສຳເລັດໂຄງການກໍ່ສ້າງ ທາງລົດໄຟ ລາວ-ຈີນ ໂດຍທ່ານ ສອນໄຊ ສີພັນດອນ ກຳມະການກົມການເມືອງສູນກາງພັກປະຊາຊົນປະຕິວັດລາວ ຮອງນາຍົກລັດຖະມົນຕີ ທັງເປັນຫົວໜ້າຄະນະຮັບຜິດຊອບໂຄງການທາງລົດໄຟລາວ-ຈີນ ໄດ້ຕາງໜ້າລັດຖະບານລາວ ມອບຫຼຽນໄຊພັດທະນາຊັ້ນໜຶ່ງ ໃຫ້ແກ່ກຸ່ມລັດວິສາຫະກິດທາງລົດໄຟແຫ່ງຊາດຈີນ ແລະ ມອບຫຼຽນໄຊແຮງງານຊັ້ນໜຶ່ງໃຫ້ແກ່ບໍລິສັດທາງລົດໄຟລາວ-ຈີນ ພ້ອມນີ້ ມີທ່ານ ຈ່ຽງຈ້າຍຕຸ່ງ ເອກອັກຄະລັດຖະທູດ ສປຈີນ ປະຈຳລາວ ທ່ານລັດຖະມົນຕີ ຮອງລັດຖະມົນຕີ ແລະ ພາກສ່ວນກ່ຽວຂ້ອງເຂົ້າຮ່ວມ.
![](https://v2.vientianemai.net/wp-content/uploads/2021/12/261499334_1818707158316206_6478604696141209145_n-1024x539.jpg)
ໂດຍຜ່ານການອະນຸມັດຈາກຄະນະກຳມະການສູນກາງພັກກອມມູນິດຈີນ ທ່ານ ຈູໂກຈ່ຽງ ຄະນະບໍລິຫານງານບໍລິສັດທາງລົດໄຟສາກົນຈີນ ປະທານຄະນະບໍລິຫານງານບໍລິສັດທາງລົດໄຟລາວ-ຈີນ ໄດ້ຕາງ ໜ້າກຸ່ມລັດວິສາສາຫະກິດທາງລົດໄຟແຫ່ງຊາດຈີນ ແລະ ບໍລິສັດທາງລົດໄຟລາວ-ຈີນ ເຂົ້າຮ່ວມພິທີ ແລະ ຮັບຫຼຽນໄຊ.
ໃນພິທີມອບຫຼຽນໄຊ ລັດຖະບານລາວໄດ້ສະແດງຄວາມຂອບໃຈຢ່າງສຸດໃຈຕໍ່ຄະນະກຳມະການສູນກາງພັກກອມມູນິດຈີນ ທີ່ມີສະຫາຍ ສີຈິ້ນຜິງ ເປັນແກນນຳ ທັງໄດ້ສະແດງຄວາມຂອບໃຈຕໍ່ລັດຖະບານຈີນ ທີ່ໄດ້ໃຫ້ການສະໜັບສະໜູນ ແລະ ການຊ່ວຍເຫຼືອຢ່າງແຂງແຮງໃຫ້ກັບປະເທດລາວໃນການພັດທະນາເສດຖະກິດ-ສັງຄົມ ຊຸກຍູ້ປະເທດລາວໃຫ້ບັນລຸເປົ້າໝາຍການປ່ຽນແປງຄັ້ງປະຫວັດສາດ ທີ່ຫັນຈາກ ປະເທດທີ່ບໍ່ມີທາງອອກສູ່ທະເລ ມາເປັນປະເທດເຊື່ອມໂຍງເຊື່ອມຈອດ ທັງໄດ້ຕີລາຄາສູງຕໍ່ກຸ່ມລັດວິສາຫະກິດທາງລົດໄຟແຫ່ງຊາດຈີນ ແລະ ບໍລິສັດທາງລົດໄຟລາວ-ຈີນ ທີ່ໄດ້ປະກອບສ່ວນອັນພົ້ນເດັ່ນເຂົ້າໃນການກໍ່ສ້າງທາງລົດໄຟລາວ-ຈີນ ທີ່ເປັນໂຄງການສັນຍະລັກແຫ່ງມິດຕະພາບລາວ-ຈີນ ໃນຂອບໜຶ່ງແລວ ໜຶ່ງເສັ້ນທາງ.
![](https://v2.vientianemai.net/wp-content/uploads/2021/12/261101729_1105952460162098_1943615352365156863_n-1024x657.jpg)
ໂຄງການກໍ່ສ້າງທາງລົດໄຟລາວ-ຈີນ ແຕ່ຊາຍແດນລາວ-ຈີນ ບໍ່ເຕ່ນ ຫາ ນະຄອນຫຼວງວຽງຈັນ ມີຄວາມຍາວທັງໝົດ 426 ກິໂລແມັດ ເສັ້ນທາງລົດໄຟສາຍຫຼັກ ຍາວ 422,4 ກິໂລແມັດ ການກໍ່ສ້າງໂຄງການໄດ້ແບ່ງອອກເປັນສອງໄລຍະການກໍ່ສ້າງ ໄລຍະທີ 1 ມີຄວາມຍາວ 409 ກມ ນັບແຕ່ຊາຍແດນແຂວງຫຼວງນໍ້າທາ-ສະຖານີໂດຍສານນະຄອນຫຼວງວຽງຈັນ ໄລຍະທີ 2 ມີຄວາມຍາວ 17 ກມ ນັບແຕ່ສະຖານີໂດຍສານນະຄອນຫຼວງວຽງຈັນ-ທ່ານນາແລ້ງ ແລວທາງລົດໄຟລາວ-ຈີນ ໄດ້ກໍ່ສ້າງຜ່ານ 4 ແຂວງ ແລະ ນະຄອນຫລວງວຽງຈັນ ມີ 15 ເມືອງ 178 ບ້ານ.
![](https://v2.vientianemai.net/wp-content/uploads/2021/12/261565723_584270946162644_7006768292612724776_n-1024x647.jpg)
ສັງລວມແລ້ວ ການກໍ່ສ້າງໄປຕາມເປົ້າໜາຍຂອງໂຄງການທາງລົດໄຟລາວ-ຈີນ ທີ່ເປັນໂຄງການດີເດັ່ນ ປອດໃສຂາວສະອາດ ແລະ ເປັນໂຄງການຕົ້ນແບບ ໄດ້ຊຸກຍູ້ບັນດາຜູ້ເຂົ້າຮ່ວມກໍ່ສ້າງຢ່າງຕັ້ງໜ້າ ສ້າງກົນໄກ ເງື່ອນໄຂແບບຮອບດ້ານ ແລະ ມີມາດຕະຖານສູງ ທຸ່ມເທເຫຶ່ອແຮງໃຫ້ແກ່ການກໍ່ສ້າງ ພ້ອມກັນຜ່ານຜ່າອຸປະສັກຕ່າງໆ ເພື່ອໃຫ້ສາມາດບັນດຸຕາມເປົ້າໜາຍຂອງໂຄງການ ຈຶ່ງເຮັດໃຫ້ໂຄງການສາມາດດຳເນີນໄດ້ຕາມແຜນການທີ່ວາງໄວ້.
![](https://v2.vientianemai.net/wp-content/uploads/2021/12/261183717_1328869687535723_4590019952405198592_n-1024x698.jpg)
# ຂ່າວ – ພາບ : ບຸນມີ ສີວິໄລ