ໃນວັນທີ 19 ພະຈິກ ນີ້ ທີ່ສານປະຊາຊົນສູງສຸດ ໄດ້ຈັດພິທີມອບ-ຮັບ ໜ້າທີ່ ປະທານສານປະຊາຊົນ ນະຄອນຫຼວຽງຈັນ (ນວ) ລະຫວ່າງທ່ານ ແສງສຸວັນ ຈັນທະລຸນນຸວົງ ຄະນະບໍລິຫານງານພັກນະຄອນຫຼວງວຽງຈັນ ເລຂາຄະນະພັກຮາກຖານ ປະທານສານປະຊາຊົນນະຄອນຫຼວງວຽງຈັນ (ຜູ້ເກົ່າ) ແລະ ທ່ານ ນາງ ເກສອນ ພັນລັກ ປະທານສານປະຊາຊົນນະຄອນຫຼວງ (ຜູ້ໃໝ່) ໂດຍການເຂົ້າຮ່ວມເປັນສັກຂີພິຍານຂອງທ່ານ ນາງ ວຽງທອງ ສີພັນດອນ ຄະນະເລຂາທິການສູນກາງພັກ ປະທານສານປະຊາຊົນສູງສຸດ ພ້ອມດ້ວຍພະນັກງານການນຳນະຄອນຫຼວງວຽງຈັນ.
![](https://v2.vientianemai.net/wp-content/uploads/2021/11/received_226589026277246-1024x715.jpeg)
ທ່ານ ແສງສຸວັນ ຈັນທະລຸນນຸວົງ ໄດ້ຜ່ານບົດສະຫຼຸບໜ້າທີ່ວຽກງານຂອງສານປະຊາຊົນນະຄອນຫຼວງວຽງຈັນໄລຍະຜ່ານມາວ່າ: ຄະນະພັກຮາກຖານສານປະຊາຊົນ ນວ ແມ່ນຮາກຖານພັກໜຶ່ງຂຶ້ນກັບການຊີ້ນຳ-ນຳພາ ໂດຍກົງຂອງຄະນະບໍລິຫານງານພັກນະຄອນຫຼວງວຽງຈັນ ປະກອບມີ 8 ໜ່ວຍພັກຂຶ້ນກັບ ຄື: ໜ່ວຍພັກຫ້ອງການ-ຈັດຕັ້ງ ໜ່ວຍພັກຄະນະສານອາຍາ ໜ່ວຍພັກຄະນະສານເດັກ ໜ່ວຍພັກຄະນະສານແພ່ງ ໜວ່ຍພັກຄະນະສານຄອບຄົວ ໜວ່ຍພັກຄະນະສານແຮງງານ ໜ່ວຍພັກຄະນະສານການຄ້າ ແລະ ໜ່ວຍພັກຄະນະສານປົກຄອງ.
![](https://v2.vientianemai.net/wp-content/uploads/2021/11/received_962434491015329.jpeg)
ປັດຈຸບັນ ມີຄະດີທີ່ຍັງຄ້າງຢູ່ສານທັງໝົດ 1.305 ເລື່ອງ ໃນນັ້ນ ແຍກເປັນຄະດີແພ່ງທັງໝົດ 404 ເລື່ອງ ຄະດີອາຍາ 586 ເລື່ອງ ຄະດີການຄ້າ 247 ເລື່ອງ ຄະດີຄອບຄົວ 38 ເລື່ອງ ຄະດີເດັກ 23 ເລື່ອງ ແລະ ຄະດີແຮງງານ 7 ເລື່ອງ; ສ່ວນຄະດີປົກຄອງແມ່ນບໍ່ມີ (ສະຫຼຸບຮອດເດືອນ 10/2021).
![](https://v2.vientianemai.net/wp-content/uploads/2021/11/received_205669671695470-1024x622.jpeg)
ໃນພິທີດັ່ງກ່າວ ທ່ານ ນາງ ວຽງທອງ ສີພັນດອນ ໄດ້ໂອ້ລົມ ແລະ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານຂອງປະທານ ແລະ ພະນັກງານສານທຸກຄົນ ທີ່ໄດ້ປະຕິບັດໜ້າທີ່ຂອງຕົນໄລຍະຜ່ານມາ ແລະ ໄດ້ເນັ້ນໃຫ້ປະທານຜູ້ໃໝ່ຈົ່ງສືບຕໍ່ຮັກສາມູນເຊື້ອອັນດີງາມທີ່ຜ່ານມາ ແລະ ສືບຕໍ່ສຶກສາອົບຮົມການເມືອງ-ແນວຄິດ ໃຫ້ພະນັກງານ ມີຄຸນທາດການເມືອງໜັກແໜ້ນ ມີຄຸນສົມບັດ ສິນທຳປະຕິບັດ ມີຈັນຍາບັນ-ຈັນຍາທຳ ມີນໍ້າໃຈຮັກຊາດ ຮັບໃຊ້ປະຊາຊົນ ມີສະຕິເຄົາລົບປະຕິບັດລະບຽບກົດໝາຍຢ່າງເຂັ້ມງວດ ແລະ ອືບຕໍ່ຊີ້ນຳ-ນຳພາ ບັນດາຄະນະສານ ໃນການປະຕິບັດໜ້າທີ່ວຽກງານທີ່ຮັບຜິດຊອບໃຫ້ສູງຂຶ້ນກວ່າເກົ່າ ໂດຍສະເພາະ ວຽກງານການຄົ້ນຄວ້າແກ້ໄຂຄະດີຂອງແຕ່ລະຄະນະສານໃຫ້ມີຄວາມວ່ອງໄວ ໂປ່ງໃສ ແລະ ຖືກຕ້ອງຕາມກົດໝາຍ