ກອງບັນຊາການທະຫານນະຄອນຫຼວງວຽງຈັນ (ນວ) ຈັດຕັ້ງກອງປະຊຸມສະຫຼຸບຖອດຖອນບົດຮຽນໃນການຈັດຕັ້ງປະຕິບັດມາດຕະການສະກັດກັ້ນການແຜ່ລະບາດຂອງພະຍາດ COVID-2019 (ວັນທີ 31 ມີນາ-3 ພຶດສະພາ 2020) ຂຶ້ນວັນທີ 5 ພຶດສະພາ 2020 ຢູ່ກອງບັນຊາການດັ່ງກ່າວ ໂດຍເປັນປະທານຂອງທ່ານ ພົນຈັດຕະວາ ສີພອນ ຈັນສົມວົງ ຫົວໜ້າການເມືອງ ກອງບັນຊາການທະຫານ ນວ ແລະ ທ່ານ ພັນເອກ ສີ ທະວີໄຊ ຫົວໜ້າການທະຫານ ກອງບັນຊາການທະຫານ ນວ ມີຄະນະພັກ-ຄະນະບັນຊາ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ທ່ານ ພັນໂທ ເພັດບັນດິດ ແປງນາທີ ຫົວໜ້າຫ້ອງການກອງບັນຊາການທະຫານ ນວ ກ່າວວ່າ: ໂດຍປະຕິບັດຕາມຄຳສັ່ງຂອງນາຍົກລັດຖະມົນຕີ ສະບັບເລກທີ 06/ນຍ ລົງວັນທີ 29 ມີນາ 2020 ວ່າດ້ວຍການເພີ່ມທະວີມາດຕະການສະກັດກັ້ນ ຄວບຄຸມ ແລະ ກຽມພ້ອມຮອບດ້ານ ເພື່ອຕ້ານພະຍາດ COVID-2019 ແຈ້ງການຂອງທ່ານລັດຖະມົນຕີກະຊວງປ້ອງກັນປະເທດ ສະບັບເລກທີ 1783/ກປທ ລົງວັນທີ 31 ມີນາ 2020 ວ່າດ້ວຍການເພີ່ມທະວີສະກັດກັ້ນ ແລະ ຕ້ານພະຍາດ COVID-2019 ແລະ ຄຳສັ່ງແນະນຳຂອງຄະນະສະເພາະກິດ ນວ ສະບັບເລກທີ 002/ ສພກ ນວ ລົງວັນທີ 8 ເມສາ 2020 ໄລຍະຜ່ານມາ ຄະນະພັກ-ຄະນະກອງບັນຊາການທະຫານ ນວ ໄດ້ຈັດຕັ້ງປະຕິບັດຄຳສັ່ງ ກໍຄືແຈ້ງການດັ່ງກ່າວຢ່າງເຂັ້ມງວດ ຈັດຕັ້ງລະບົບປະຈຳການແຕ່ລະຂັ້ນເປັນປົກກະຕິ ເພີ່ມທະວີການເຝົ້າລະວັງ ສະກັດກັ້ນການແຜ່ລະບາດຂອງພະຍາດ COVID-2019 ຈັດຕັ້ງກວດກາວັດແທກອຸນຫະພູມພະນັກງານ-ນັກຮົບ ເຂົ້າ-ອອກຄ້າຍຢ່າງເຄັ່ງຄັດ ພ້ອມນີ້ ຍັງໄດ້ແຕ່ງຕັ້ງອະນຸກຳມະການຢູ່ຂັ້ນກອງບັນຊາການ ລົງເຄື່ອນໄຫວຊີ້ນຳບັນດາກົມກອງທີ່ເຮັດໜ້າທີ່ປະສານສົມທົບກັບຂັ້ນເທິງ ແລະ ອານຸກຳມະການແຕ່ລະພາກສ່ວນ ເຄື່ອນໄຫວກວດກາຂອບເຂດ ນວ ໂດຍນຳໃຊ້ກຳລັງ (ຈກທ) 12 ສະຫາຍ ເຄື່ອນໄຫວກວດກາເປັນປົກຕິ.
ຜ່ານການເຄື່ອນໄຫວ ມີຜູ້ລະເມີດຕໍ່ຄຳສັ່ງ ເລກທີ 06/ນຍ 34 ກໍລະນີ ນຳໃຊ້ກຳລັງທະຫານເມືອງ 198 ສະຫາຍ ຊີ້ນຳກຳລັງກອງຫຼອນ ສົມທົບກັບກຳລັງ ປກສ ກຸ່ມ ປກສ ບ້ານ ແລະ ອຳນາດການປົກຄອງບ້ານ ເພື່ອຕິດຕາມ ກວດກາການເຄື່ອນໄຫວຂອງປະຊາຊົນເຂົ້າ-ອອກບ້ານຂອງຕົນ ແລະ ສົມທົບກັບຄະນະສະເພາະກິດຂັ້ນເມືອງ ກໍຄືອົງການກ່ຽວຂ້ອງເພື່ອຕັ້ງຈຸດກວດກາການເຂົ້າ-ອອກເມືອງ ການເຄື່ອນໄຫວສັນຈອນໄປ-ມາຂອງພົນລະເມືອງ ໃຫ້ມີຄວາມຮັບປະກັນໃນການປ້ອງກັນ ຄວບຄຸມການແຜ່ລະບາດຂອງພະຍາດ COVID-2019 ໄດ້ເປັນຢ່າງດີ.
# ຂ່າວ & ພາບ : ສະບາໄພ