ການແຜ່ລະບາດຂອງພະຍາດໂຄວິດ-19 ນັບແຕ່ປີ 2020 ເປັນຕົ້ນມາ ໄດ້ເຮັດໃຫ້ແຮງງານລາວເດີນທາງກັບຄືນປະເທດເປັນຈຳນວນຫຼວງຫຼາຍ ຂະນະທີ່ຫົວໜ່ວຍທຸລະກິດຫຼາຍແຫ່ງໄດ້ໂຈະກິດຈະການຊົ່ວຄາວ ເຮັດໃຫ້ແຮງງານທີ່ກັບມາຈາກຕ່າງປະເທດ ແລະ ແຮງງານຢູ່ພາຍໃນວ່າງງານ 496.000 ຄົນ ແນວໃດກໍຕາມ ກະຊວງແຮງງານ ແລະ ພາກສ່ວນກ່ຽວຂ້ອງ ໄດ້ພະຍາຍາມຊ່ວຍເຫຼືອໃນການຈັດຫາວຽກເຮັດງານທຳ ໃຫ້ແກ່ແຮງງານ ຊຶ່ງຄາດວ່າຈະສາມາດສະໜອງແຮງງານເຂົ້າສູ່ຕຳແໜ່ງງານໄດ້ທັງໝົດ 18.628 ຄົນ.
ໃນວາລະກອງປະຊຸມສະໄໝສາມັນ ເທື່ອທີ 2 ຂອງສະພາແຫ່ງຊາດ ຊຸດທີ IX ຜ່ານມາ ທ່ານ ນາງ ຄຳໃບ ຂັດທິຍະ ລັດຖະມົນຕີກະຊວງແຮງງານ ແລະ ສະຫວັດດີການ-ສັງຄົມ (ຮສສ) ໄດ້ຊີ້ແຈງຕໍ່ ສສຊ ວ່າ: ການລະບາດຂອງພະຍາດໂຄວິດ-19 ໄດ້ສົ່ງຜົນກະທົບໃຫ້ແຮງງານລາວກັບຈາກຕ່າງປະເທດເປັນຈໍານວນຫຼາຍ ຊຶ່ງໂຕເລກຂໍ້ມູນແຮງງານທີ່ໄປອອກແຮງງານຢູ່ຕ່າງປະເທດທີ່ເກັບກຳໄດ້ທັງໝົດ ນັບແຕ່ປີ 2020 ມາຮອດເດືອນ 9 ປີ 2021 ມີ 224.118 ຄົນ ໃນນີ້ ກັບຄືນມາໃນປີ 2020 ຈຳນວນ 158.753 ຄົນ ສຳລັບໃນປີ 2021 ນັບແຕ່ເດືອນມັງກອນ-ເດືອນກັນຍາປີນີ້ ຈໍານວນແຮງງານທີ່ໄດ້ກັບຄືນປະເທດ ມີ 56.918 ຄົນ ແລະ ຍັງຄ້າງ 8.447 ຄົນ ພ້ອມກັນນີ້ ການລະບາດຂອງພະຍາດໂຄວິດ-19 ຄັ້ງນີ້ ໄດ້ສົ່ງຜົນກະທົບເຮັດໃຫ້ບັນດາຫົວໜ່ວຍທຸລະກິດ ໂຮງຈັກໂຮງງານ ບໍລິສັດ ແລະ ໂຄງການລົງທຶນສ່ວນຫຼາຍກໍຫຼຸດພະນັກງານລົງ ຫຼື ໂຈະ ການດຳເນີນກິດຈະການຊົ່ວຄາວເປັນບາງໄລຍະ ຫຼື ບາງບ່ອນ ກໍໄດ້ປິດກິດຈະການລົງ ອັນໄດ້ສົ່ງຜົນກະທົບຕໍ່ການມີວຽກເຮັດງານທຳຂອງແຮງງານລາວບໍ່ໜ້ອຍ ຊຶ່ງໃນນີ້ ມີແຮງງານທີ່ຖືກເລີກຈ້າງ ແລະ ໂຈະການເຮັດວຽກ ຈໍານວນ 439.082 ຄົນ ຈາກຂໍ້ມູນແຮງງານທີ່ກັບມາຈາກຕ່າງປະເທດທີ່ວ່າງງານ ແລະ ຜູ້ວ່າງງານພາຍໃນປະເທດ ລວມມີແຮງງານທີ່ວ່າງງານທັງໝົດ 496.000 ຄົນ.
ຕໍ່ສະພາບດັ່ງກ່າວ ລັດຖະບານ ກໍຄືກະຊວງ ຮສສ ໄດ້ສ້າງກົນໄກຕິດຕາມການເຄື່ອນໄຫວ ແລະ ຄວາມຕ້ອງການຂອງຕະຫຼາດແຮງງານລາວທີ່ຢາກມີວຽກເຮັດງານທຳ ແລະ ຢາກຝືກວິຊາຊີບຕ່າງໆ ເຊັ່ນ: ອອກແຈ້ງການໃຫ້ພະແນກ ຮສສ ສົມທົບກັບອົງການປົກຄອງທ້ອງຖິ່ນທຸກຂັ້ນ ເພື່ອເກັບກຳຂໍ້ມູນແຮງງານດັ່ງກ່າວ, ໄດ້ສ້າງສູນບໍລິການຂໍ້ມູນເພື່ອຊ່ວຍເຫຼືອແຮງງານ ຫຼື ເອີ້ນວ່າ Call Center ສ້າງລະບົບໂຄສະນາ ແລະ ຂຶ້ນທະບຽນທາງອອນລາຍເຊັ່ນ: ເວັບໄຊ Facebook Line Whatsapp ເພື່ອເກັບກໍາຈໍານວນ ແລະ ຊ່ວຍເຫຼືອໃນການຈັດຫາວຽກເຮັດງານທຳໃຫ້ແກ່ແຮງງານທັງພາຍໃນ ແລະ ແຮງງານທີ່ກັບຈາກຕ່າງປະເທດ ຜ່ານການປະຕິບັດຕົວຈິງ ສາມາດເກັບກຳຕຳແໜ່ງງານວ່າງໄດ້ທັງໝົດ 25.254 ຕໍາແໜ່ງ ແລະ ຜ່ານການປະຕິບັດໃນ 9 ເດືອນຕົ້ນປີ 2021 ຜ່ານມາ ສາມາດຈັດຫາວຽກເຮັດງານທຳໄດ້ 7.167 ຄົນ ຍິງ 3.120 ຄົນ ໂດຍອີງໃສ່ການປະສານງານຢ່າງໃກ້ຊິດກັບອົງການ 3 ຝ່າຍ ເຂດເສດຖະກິດພິເສດ ເຂດເສດຖະກິດສະເພາະ ໂຄງການລົງທຶນທັງພາຍໃນ ແລະ ຕ່າງປະເທດ ແລະ ຫົວໜ່ວຍແຮງງານ ຊຶ່ງຜ່ານການລາຍງານເບື້ອງຕົ້ນ ຂອງສູນບໍລິການຂໍ້ມູນເພື່ອຊ່ວຍເຫຼືອແຮງງານ ໃນເດືອນຕຸລາຜ່ານມາ ແມ່ນຈະສາມາດເກັບກຳຈຳນວນແຮງງານເຂົ້າສູ່ຕຳແໜ່ງໄດ້ຕື່ມ ຈຳນວນ 11.461 ຄົນ ຍິງ 1.821 ຄົນ ຄາດວ່າຈະສາມາດສະໜອງແຮງງານເຂົ້າສູ່ຕຳແໜ່ງງານໄດ້ທັງໝົດ 18.628 ຄົນ ຍິງ 4.941 ຄົນ ພ້ອມນັ້ນ ກໍເຫັນວ່າຍັງມີຕໍາແໜ່ງງານວ່າງ ຢາງໜ້ອຍ 6.626 ຕໍາແໜ່ງ ທີ່ພ້ອມຈະຮັບເອົາແຮງງານເຂົ້າເຮັດວຽກນຳ.
ລັດຖະມົນຕີກະຊວງ ຮສສ ກ່າວອີກວ່າ: ໃນຕໍ່ໜ້ານີ້ ຈະສືບຕໍ່ຮ່ວມມືກັບພາກວິສາຫະກິດ ເພື່ອເກັບກໍາຂໍ້ມູນ ແລະ ຂຶ້ນທະບຽນຜູ້ອອກແຮງງານລາວທີ່ວ່າງງານ ທັງຢູ່ພາຍໃນ ແລະ ຜູ້ທີ່ກັບມາຈາກຕ່າງປະເທດ ເພື່ອສະໜອງເຂົ້າໃສ່ຕໍາແໜ່ງງານວ່າງຢູ່ພາຍໃນປະເທດ ໂດຍເລີ່ມຈາກແຂວງພາກໃຕ້ ເຊັ່ນ: ແຂວງຈໍາປາສັກ ແລະ ຂະຫຍາຍໄປແຂວງເຊກອງ ແລະ ບັນດາແຂວງຕາມລຳດັບ ສ່ວນພາກເໜືອ ແມ່ນເລີ່ມຈາກເຂດເສດຖະກິດພິເສດສາມຫຼ່ຽມຄໍາ ແຂວງບໍ່ແກ້ວ ສືບຕໍ່ປະສານສົມທົບກັບຂະແໜງການກ່ຽວຂ້ອງ ຕິດຕາມການດັດສົມລະຫວ່າງຄວາມຕ້ອງການ ແລະ ຄວາມອາດສາມາດໃນການສະໜອງກຳລັງແຮງງານ ໃຫ້ເຂົ້າສູ່ຕະຫຼາດແຮງງານ.
# ຂ່າວ & ພາບ : ບຸນມີ ສີວິໄລ