ທະນາຄານລາວ-ຝຣັ່ງ ແລະ ບໍລິສັດພຣູເດັນໂຊລ໌ປະກັນໄພຊີວິດລາວຈຳກັດ (ພຣູເດັນໂຊລ໌ ລາວ) ໄດ້ລົງນາມສັນຍາເປັນຄູ່ຮ່ວມທຸລະກິດໃນການຂາຍປະກັນໄພຊີວິດຜ່ານທະນາຄານໄລຍະຍາວ ເຊິ່ງທັງສອງບໍລິສັດຈະໄດ້ຮ່ວມມືກັນໃນການພັດທະນາ ເເລະ ຈຳໜ່າຍຜະລິດຕະພັນການປະກັນໄພຊີວິດໃຫ້ບັນດາລູກຄ້າ ຜ່ານເຄືອຂ່າຍຂອງທະນາຄານລາວ-ຝຣັ່ງ ເຊິ່ງລວມມີສາຂາຫຼວງພະບາງ ວັງວຽງ ວຽງຈັນ ສະຫວັນນະເຂດ ແລະ ສາຂາປາກເຊ.
ພາຍໃຕ້ຂໍ້ຕົກລົງທີ່ມີຜົນສັກສິດຕັ້ງແຕ່ວັນທີ 27 ເມສາ 2020 ເປັນຕົ້ນໄປ ພຣູເດັນໂຊລ໌ ລາວ ຈະເປັນຜູ້ຈຳໜ່າຍຫຼັກຜະລິດຕະພັນປະກັນໄພຊີວິດໃຫ້ກັບລູກຄ້າຂອງທະນາຄານລາວ-ຝຣັ່ງ ພ້ອມດ້ວຍເປົ້າໝາຍທີ່ຈະເພີ່ມຄວາມສາມາດໃນການຈຳໜ່າຍປະກັນໄພຊີວິດຂອງທະນາຄານລາວ-ຝຣັ່ງຢ່າງເຂັ້ມແຂງ ເພື່ອເສີມຂະຫຍາຍສາຂາຂອງພຣູເດັນໂຊລ໌ ລາວ ໃຫ້ເຂົ້າເຖິງລູກຄ້າພາຍໃນທ້ອງຕະຫຼາດງ່າຍຂຶ້ນ.
ທ່ານ ອາໂນດ ເກົາລີເຢ ຜູ້ອຳນວຍການທະນາຄານລາວ-ຝຣັ່ງ ກ່າວວ່າ: ການຮ່ວມມືຄັ້ງນີ້ ໄດ້ສະແດງໃຫ້ເຫັນການຮ່ວມມືກັນຂອງສອງສະຖາບັນການເງິນຊັ້ນແນວໜ້າຂອງລາວ ເຊິ່ງລວມມີສາຂາກຸ່ມທະນາຄານ BRED International ພ້ອມກັບພຣູເດັນໂຊລ໌ ຜູ້ທີ່ມີຄວາມຊ່ຽວຊານດ້ານປະກັນໄພ ແລະ ການບໍລິຫານດ້ານການເງິນ ເຊິ່ງເປັນຜູ້ນຳຕະຫຼາດສາກົນທີ່ມີຄຳໝັ້ນສັນຍາໄລຍະຍາວໃຫ້ຕະຫຼາດອາຊີ ພາຍໃຕ້ການໃຫ້ຄວາມຮ່ວມມືຄັ້ງນີ້ ພວກເຮົາຈະເຮັດວຽກຮ່ວມມືກັບພຣູເດັນໂຊລ໌ ລາວ ເພື່ອສືບຕໍ່ພັດທະນາການບໍລິຫານການເງິນ ເພື່ອຮັບຮອງເອົາຖານລູກຄ້າທີ່ກຳລັງເຕີບໃຫຍ່ຢ່າງວ່ອງໄວໃນປະເທດລາວ ແລະ ຈະຊ່ວຍເຕີມເຕັມຄວາມຝັນ ພ້ອມກັບຄວາມໝັ້ນຄົງໄລຍະຍາວອີກດ້ວຍ.
ການເປັນຄູ່ຮ່ວມທຸລະກິດຂາຍປະກັນໄພຊີວິດຜ່ານທະນາຄານຄັ້ງນີ້ ລູກຄ້າຂອງທະນາຄານລາວ-ຝຣັ່ງ ເປັນຕົ້ນລູກຄ້າທົ່ວໄປ ລູກຄ້າທີ່ມີທຸລະກິດຂະໜາດໃຫຍ່ ແລະ ນ້ອຍ ສາມາດເຂົ້າເຖິງການໃຫ້ບໍລິການໃນການໃຫ້ຄຳປຶກສາດ້ານປະກັນໄພຊີວິດທີ່ເໝາະສົມທີ່ສຸດແກ່ລູກຄ້າ ໂດຍຜ່ານເຄືອຂ່າຍຂອງທະນາຄານ ເຊິ່ງລວມໄປເຖິງບໍລິການຜ່ານອິນເຕີເນັດ ແລະ ຜ່ານລະບົບທະນາຄານເທິງໂທລະສັບມືຖື ທີ່ຈະມີໃນອະນາຄົດ.
ທ່ານນາງ ວັນດາລີ ສຸວັນນະສຸກ ຮັກສາການຜູ້ອຳນວຍການໃຫຍ່ບໍລິສັດພຣູເດັນໂຊລ໌ ລາວ ກ່າວວ່າ: ພວກເຮົາມີຄວາມພາກພູມໃຈທີ່ໄດ້ເປັນຄູ່ຮ່ວມທຸລະກິດກັບທະນະຄານລາວ-ຝຮັ່ງ ແລະ ຈະໄດ້ນຳເອົາການບໍລິການຂອງທະນາຄານລາວ-ຝຣັ່ງ ທີ່ມີຫຼາຍຊ່ອງທາງມານຳສະເໜີໃຫ້ປະຊາຊົນລາວ ດ້ວຍຜະລິດຕະພັນປະກັນໄພຊີວິດຂອງພວກເຮົາ ທີ່ຖືກອອກເເບບມາໃຫ້ເໝາະສົມກັບຄວາມຕ້ອງການຂອງລຸກຄ້າ ພວກເຮົາຫວັງວ່າຈະໄດ້ຮ່ວມມືຢ່າງໃກ້ຊິດກັບທະນາຄານລາວ-ຝຣັ່ງ ເພື່ອມອບການປົກປ້ອງ ແລະ ຄຸ້ມຄອງໃຫ້ຄົນທີ່ລູກຄ້າຮັກ ແລະ ເພື່ອອະນາຄົດທີ່ສົດໃສຂອງພວກເຂົາ.
# ຂ່າວ & ພາບ: ສະບາໄພ