ເນື່ອງໃນໂອກາດວັນສື່ມວນຊົນ ແລະ ການພິມຈຳໜ່າຍແຫ່ງຊາດ ຄົບຮອບ 71 ປີ (13/8/1950-13/8/2021) ວັນທີ 11 ສິງຫາ 2021 ທ່ານ ນາງ ແສງມະນີ ພິລາວົງ ຫົວໜ້າໜ່ວຍງານພັດທະນາເຄື່ອງໝາຍການຄ້າ ແລະ ການສື່ສານມວນຊົນ ຕາງໜ້າໃຫ້ຄະນະອຳນວຍການ ກໍຄືຜູ້ບໍລິຫານທະນາຄານຮ່ວມທຸລະກິດລາວ-ຫວຽດ ຈຳກັດ ໄດ້ນຳເອົາກະຕ່າຂອງຂວັນມາອວຍພອນຄະນະບັນນາທິການ ແລະ ພະນັກ ງານສຳນັກງານໜັງສືພິມວຽງຈັນໃໝ່ ມີສຳນັກງານຕັ້ງຢູ່ຖະໜົນດົງນາໂຊກ-ໜອງບຶກ ບ້ານໜອງບຶກໃຕ້ ເມືອງສີໂຄດຕະບອງ ນະຄອນຫຼວງວຽງຈັນ ຕາງໜ້າກ່າວຕ້ອນຮັບໂດຍທ່ານ ນາງ ແກ້ວຊ້ອນ ຈັນທະນາມ ຫົວໜ້າບັນນາທິການໃຫຍ່ໜັງສືພິມວຽງຈັນໃໝ່.
ທ່ານ ນາງ ແສງມະນີ ພິລາວົງ ໄດ້ກ່າວວ່າ: ວັນສື່ມວນຊົນ ແລະ ການພິມຈໍາໜ່າຍແຫ່ງຊາດ ເປັນ ວັນໜຶ່ງທີ່ມີຄວາມສຳຄັນສຳລັບປວງຊົນລາວທັງຊາດ ເຊິ່ງຍາມໃດ ສື່ມວນຊົນລາວກໍໄດ້ເຮັດໜ້າທີ່ວິຊາສະ ເພາະຂອງຕົນຢ່າງຫ້າວຫັນ ໃນການເປັນກະບອກສຽງໂຄສະນາເຜີຍແຜ່ແນວທາງນະໂຍບາຍຂອງພັກ-ລັດ ແລະ ຜົນງານການເຄື່ອນໄຫວຂອງຫົວໜ່ວຍທຸລະກິດຕ່າງໆທີ່ດຳເນີນທຸລະກິດຢູ່ປະເທດລາວ ໃນນັ້ນ ກໍມີທະນາຄານຮ່ວມທຸລະກິດລາວ-ຫວຽດນາມ ຈຳກັດ.
ໂອກາດນີ້ ທ່ານ ນາງ ແກ້ວຊ້ອນ ຈັນທະນາມ ໄດ້ສະແດງຄວາມຂອບໃຈມາຍັງທະນາຄານຮ່ວມທຸລະກິດລາວ-ຫວຽດ ຈຳກັດ ທີ່ເຫັນໄດ້ຄວາມສຳຄັນຂອງສື່ມວນຊົນ ໂດຍສະເພາະສື່ໜັງສືພິມວຽງຈັນໃໝ່ ທີ່ເປັນກະບອກສຽງຂອງອົງຄະນະພັກນະຄອນຫຼວງວຽງຈັນ ທີ່ມາອວຍພອນຄັ້ງນີ້ ເຊິ່ງຜ່ານມາ ທະນາຄານຮ່ວມທຸລະກິດລາວ-ຫວຽດ ກໍເປັນລູກຄ້າຜູ້ໜຶ່ງທີ່ໃຊ້ບໍລິການໜັງສືພິມວຽງຈັນໃໝ່ໃນການລົງໂຄສະນາປະ ຊາສຳພັນທຸລະກິດ ແລະ ຜະລິດຕະພັນ ລົງຂ່າວການເຄື່ອນໄຫວຂອງທະນາຄານ ແລະ ອື່ນໆ ອັນໄດ້ເຮັດໃຫ້ໜັງສືພິມ ແລະ ທະນາຄານໃນຜ່ານມາ ມີການພົວພັນຮ່ວມມືທີ່ດີນຳກັນມາຕະຫຼອດ ແລະ ຫວັງວ່າຈະພ້ອມກັນຮັກສາມູນເຊື້ອອັນດີງາມນີ້ໄປເລື້ອຍໆ
ສົມສະຫວັນ ຮູບ 13.8.2021