ກອງປະຊຸມໃຫຍ່ ຄັ້ງທີ II ຂອງສະມາຄົມສີລະປິນລາວ ຈັດຂຶ້ນວັນທີ 5 ເມສາ 2021 ຢູ່ຫໍວັດທະນະທຳແຫ່ງຊາດ ໂດຍເປັນປະທານຂອງທ່ານ ບົວເງິນ ຊາພູວົງ ຮອງລັດຖະມົນຕີກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ (ຖວທ) ປະທານສະມາຄົມສີລະປີນລາວ ເປັນກຽດເຂົ້າຮ່ວມຂອງທ່ານ ກິແກ້ວ ໄຂຄຳພິທູນ ຮອງນາຍົກລັດຖະມົນຕີ ລັດຖະມົນຕີກະຊວງ ຖວທ ພ້ອມຄະນະສະມາຄົມສີລະປິນຊາດ ຕາງໜ້າຖັນແຖວສີລະປິນທັງອາຊີບ ແລະ ສະໝັກຫຼີ້ນໃນຂອບເຂດທົ່ວປະເທດ.
ທ່ານ ບົວເງິນ ຊາພູວົງ ໄດ້ຜ່ານບົດສະຫຼຸບຜົນງານການເຄື່ອນໄຫວວຽກງານໃນຊຸມປີຜ່ານມາ ແລະ ທິດທາງແຜນການໃນ 5 ປີຕໍ່ໜ້າ (2021-2025) ຂອງສະມາຄົມສິລະປິນລາວວ່າ: ໂດຍພາຍໃຕ້ການນຳພາຂອງການນຳກະຊວງ ຖວທ ກໍຄືຂອງຄະນະບໍລິຫານງານ ແລະ ຄວາມສະໝັກໃຈຕື່ນຕົວຂອງສະມາຊິກສະມາຄົມສິລະປິນ ທັງທີ່ປະຈຳການ ແລະ ບໍ່ປະຈຳການ ພວກເຮົາກໍໄດ້ມີການເຄື່ອນໄຫວຢ່າງຕັ້ງໜ້າ ເຂົ້າໃນວຽກງານວິຊາສະເພາະ ແລະ ຮັບໃຊ້ໜ້າທີ່ການເມືອງຂອງກົມກອງ ທ້ອງຖິ່ນ ແລະ ຢູ່ໃນການເຄື່ອນໄຫວຂອງຜູ້ປະກອບການຕ່າງໆໃນສັງຄົມໄດ້ເປັນຢ່າງດີສົມຄວນ ການປະດິດຄິດແຕ່ງເພງຮ້ອງ ບົດຟ້ອນດົນຕີ ຂັບລຳ ລະຄອນ ກາຍະສິນ ແລະ ການສະແດງຕ່າງໆຂອງປະເທດເຮົາ ຍັງສືບຕໍ່ເປັນຂະບວນການຟົດຟື້ນ ທັງທາງດ້ານປະລິມານ ແລະ ຄຸນນະພາບ ປະກອບສ່ວນເຂົ້າໃນການສຶກສາອົບຮົມໃຫ້ຄົນລາວມີແນວຄິດຮັກເຊື້ອແພງຊາດ ເຊື່ອໝັ້ນຕໍ່ການນຳພາຂອງພັກ-ລັດ ແລະ ອະນາຄົດອັນສົດໃສຂອງປະເທດຊາດ ວຽກງານການຟື້ນຟູອະນຸຮັກພັດທະນາ ແລະ ໂຄສະນາເຜີຍແຜ່ມູນເຊື້ອສິລະປະວັດທະນະທຳອັນດີງາມຂອງຊາດ-ຂອງເຜົ່າ ໄດ້ຮັບການຈັດຕັ້ງປະຕິບັດໄດ້ດີພໍສົມຄວນ ໂດຍສົມທົບຮັບເອົາສິ່ງຍອດຍິ່ງຂອງຍຸກສະໄໝ ເຂົ້າໃນຂະບວນການສິລະປະວັດທະນະທຳຢ່າງເລິກເຊິ່ງ ແລະ ກວ້າງຂວາງ ສ້າງຄວາມບັນເທີງ ແລະ ມ່ວນຊື່ນອັນສົດໃສໃນສັງຄົມລາວ ທັງຢູ່ພາຍໃນ ແລະ ຕ່າງປະເທດ ພິເສດ ໄດ້ຮ່ວມກັບໂທລະພາບແຫ່ງຊາດ ຈັດການສະແດງທີ່ມີຊື່ວ່າ “ອຸດທິຍານສວນສິນ“ ເປັນເວລາຫຼາຍເດືອນ ເຮັດໃຫ້ສິລະປິນຫຼາຍຄົນໄດ້ມີໂອກາດເຂົ້າຮ່ວມສະແດງໃນເວທີດັ່ງກ່າວ ປະກອບສ່ວນສ້າງຄວາມສາມັກຄີມິດຕະພາບ ແລະ ການແລກປ່ຽນທາງດ້ານສິລະປະການສະແດງກັບພາກພື້ນ ແລະ ສາກົນ ໄດ້ຢ່າງກ້ວາງຂວາງ ອັນໄດ້ປະກອບສ່ວນສ້າງວຽກເຮັດງານທຳ ປະກອບສ່ວນສ້າງລາຍຮັບໃຫ້ແກ່ເຫຼົ່າສິລະປິນ ແລະ ຜູ້ປະກອບການບັນເທີງດີພໍສົມຄວນ.
ໃນປີຜ່ານມາ ເຖິງແມ່ນສະພາບການໄປມາຫາສູ່ບໍ່ສະດວກປານໃດ ແຕ່ທາງສະມາຄົມກໍໄດ້ມີການຕິດຕໍ່ພົວພັນກັບສະມາຄົມຂອງປະເທດເພື່ອນມິດຈຳນວນໜຶ່ງ ເຊັ່ນ: ໄດ້ໄປຮ່ວມງານສະແດງດົນຕີອາຊີເອີໂຣບ ທີ່ກອງປະຊຸມສະມາຄົມດົນຕີຂອງຫວຽດນາມຈັດຂຶ້ນ ໄດ້ແລກປ່ຽນບົດເພງກັບພາກສ່ວນວົງດົນຕີແຊມໂຟນີຂອງໂຕໂຍຕ້າ ແລະ ອື່ນໆ.
# ຂ່າວ & ພາບ: ຊິລິການດາ