ວັນທີ 3-4 ມີນາ 2021 ຢູ່ໂຮງແຮມແລນມາກ ແມ່ຂອງຣີເວີໄຊ ນະຄອນຫຼວງວຽງຈັນ ກົມຄຸ້ມຄອງພະລັງງານ ກະຊວງພະລັງງານ ແລະ ບໍ່ແຮ່ (ພບ) ຈັດການເຝິກອົບຮົມກ່ຽວກັບລະບຽບການດ້ານຄວາມປອດໄພຂອງເຂື່ອນໄຟຟ້າຂະໜາດນ້ອຍໃນ ສປປ ລາວ ຄັ້ງທີ III ຮ່ວມເປັນປະທານ ມີທ່ານ ບົວເທບ ມາໄລຄຳ ຫົວໜ້າກົມຄຸ້ມຄອງພະລັງງານ ທ່ານ Tristan Bellingham ຜູ້ອຳນວຍການໂຄງການພະລັງງານທົດແທນນູແວນເຊລັງ-ລາວ ມີຕາງໜ້າຫ້ອງການ ກົມ ສະຖາບັນກະຊວງ ພບ ພະແນກ ພບ 5 ແຂວງພາກກາງ ແລະ ພາກໃຕ້ ຜູ້ພັດທະນາເຂື່ອນໄຟຟ້າທຸກໂຄງການ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ການຈັດເຝິກອົບຮົມຂຶ້ນຄັ້ງນີ້ ມີຈຸດປະສົງເພື່ອແນໃສ່ 3 ບັນຫາຕົ້ນຕໍຄື:
- ສ້າງຄວາມເຂັ້ມແຂງທາງດ້ານວິຊາການ ກ່ຽວກັບມາດຕະຖານ ຄຳແນະນຳ ແລະ ບັນດານິຕິກຳທີ່ກ່ຽວຂ້ອງ ໃນວຽກງານການຄຸ້ມຄອງຄວາມປອດໄພຂອງເຂື່ອນໃນແຕ່ລະໄລຍະ ເປັນຕົ້ນແມ່ນ ໃນໄລຍະການສືກສາ ອອກແບບ ກໍ່ສ້າງ ແລະ ດໍາເນີນງານ
- ຖອດຖອນບົດຮຽນ ການຕິດຕາມຄຸ້ມຄອງ ແລະ ການກວດກາຄວາມປອດໄພຂອງເຂື່ອນຂະໜາດນ້ອຍແຕ່ 15 ເມກາວັດລົງມາ ໃນໄລຍະຜ່ານມາ.
- ເພີ່ມທະວີການຄຸ້ມຄອງ ແລະ ການຊີ້ນຳວຽກງານຄວາມປອດໄພຂອງເຂື່ອນຂະໜາດນ້ອຍນັບແຕ່ 15 MW ລົງມາ.
ເພື່ອສະໜອງພະລັງງານໄຟຟ້າໃຫ້ທົ່ວສັງຄົມ ແລະ ສົ່ງຂາຍອອກຕ່າງປະເທດ ວຽກງານຄວາມປອດໄພຂອງເຂື່ອນ ແມ່ນບຸລິມະສິດທີ່ສຳຄັນຂອງກະຊວງພະລັງງານ ແລະ ບໍ່ແຮ່ ກໍຄືລັດຖະບານລາວ ເປັນຕົ້ນ ແມ່ນພາຍຫຼັງເຫດການບໍ່ເພີງປາດຖະໜາ ການເພພັງຂອງເຂື່ອນໄຟຟ້ານໍ້າອ້າວ ໃນປີ 2017 ແລະ ການເພພັງຂອງຄູກັນນໍ້າ D ຂອງໂຄງການເຂື່ອນໄຟຟ້າເຊປ່ຽນ-ເຊນໍ້ານ້ອຍ ໃນປີ 2018 ເຫດການດັ່ງກ່າວ ກະຊວງພະລັງງານ ແລະ ບໍ່ແຮ່ ແມ່ນໄດ້ໃຫ້ຄວາມສໍາຄັນ ແລະ ໄດ້ມີການສຸມໃສ່ເປັນພິເສດ ກ່ຽວກັບວຽກງານຕິດຕາມກວດກາຄວາມປອດໄພຂອງເຂື່ອນທັງຂະໜາດໃຫຍ່ ແລະ ນ້ອຍໃນແຕ່ລະໄລຍະການພັດທະນາເຊັ່ນ: ໃນໄລຍະການສືກສາ ອອກແບບ ກໍ່ສ້າງ ແລະ ດໍາເນີນງານ ທັງເຂື່ອນນ້ອຍ ແລະ ເຂື່ອນໃຫຍ່ໃນຂອບເຂດທົ່ວປະເທດ.
# ຂ່າວ & ພາບ : ຊິລິການດາ