ປີ 2020 ມີເຫດການສຳຄັນທາງປະຫວັດສາດ ທີ່ຍິ່ງໃຫຍ່ຂອງປະເທດເຮົາ ເຊັ່ນ: ວັນສະຖາປະນາ ສປປ ລາວ ຄົບຮອບ 45 ປີ ແລະ ວັນເກີດປະທານ ໄກສອນ ພົມວິຫານ ຄົບຮອບ 100 ປີ ສະນັ້ນ ຈຶ່ງເຫັນຂະບວນການປາຖະກະຖາ ໂຄສະນາວັນສຳຄັນດັ່ງກ່າວມາຫຼາຍເດືອນແລ້ວ… ຫາກຕິດຕາມຈະເຫັນວ່າທາງຄະນະໂຄສະນາອົບຮົມສູນກາງພັກ ເພິ່ນກໍມີແຈ້ງການແນະນຳ ເລກທີ 44/ຄອສພ ລົງວັນທີ 6 ພະຈິກ 2020 ເພື່ອເຮັດໃຫ້ການຈັດຕັ້ງປາຖະກະຖາເລິກເຊິ່ງ ກວ້າງຂວາງ ແລະ ທົ່ວເຖິງ.
ບາງເນື້ອໃນສຳຄັນຂອງແຈ້ງການແນະນຳ ທີ່ຕ້ອງກຳແໜ້ນມີດັ່ງນີ້:
I/ ຈຸດປະສົງ-ລະດັບຄາດໝາຍ
1/ ເພື່ອທົບທວນຫວນຄືນມູນເຊື້ອ ແລະ ໄຊຊະນະປະຫວັດສາດຂອງພາລະກິດແຫ່ງການຕໍ່ສູ້ປົດປ່ອຍຊາດໃນເມື່ອກ່ອນ ແລະ ຜົນສຳເລັດໃນພາລະກິດປົກປັກຮັກສາ ແລະ ພັດທະນາປະເທດຊາດ ພາຍໃຕ້ການຊີ້ນຳ-ນຳພາຂອງພັກ-ລັດເຮົາ ຖືໂອກາດນີ້ເປັນການເພີ່ມທະວີການສຶກສາອົບຮົມພະນັກງານ ສະມາຊິກພັກ ນັກຮົບ ລັດຖະກອນ ແລະ ປະຊາຊົນບັນດາເຜົ່າ ກ່ຽວກັບນ້ຳໃຈຮັກຊາດ ມູນເຊື້ອສາມັກຄີປອງດອງປະຊາຊົນບັນດາເຜົ່າ ແລະ ຊັ້ນຄົນ ນ້ຳໃຈຕໍ່ສູ້ອັນອົງອາດກ້າຫານຂອງກອງທັບ ແລະ ປະຊາຊົນເຮົາ.
2/ ເພື່ອຄົ້ນຄວ້າຮ່ຳຮຽນເອົາມູນເຊື້ອປະຕິວັດ ຄຸນທາດການເມືອງ ຄຸນສົມບັດສິນທຳປະຕິວັດ ແບບແຜນວິທີເຮັດວຽກ ແລະ ການດຳລົງຊີວິດຂອງປະທານ ໄກສອນ ພົມວິຫານ ຖືເອົາແນວຄິດ ໄກສອນ ພົມວິຫານ ເປັນທິດນຳໃນການຈັດຕັ້ງປັບປຸງໜ້າທີ່ວຽກງານໃຫ້ບັນລຸປະສິດທິຜົນສູງ.
3/ ເພື່ອສືບຕໍ່ບຸກທະລຸທາງດ້ານແນວຄິດ ຈິນຕະນາການ ສ້າງໃຫ້ມີການຫັນປ່ຽນຢ່າງແຂງແຮງ ເລິກເຊິ່ງ ແລະ ຮອບດ້ານ ສ້າງຄວາມຮັບຮູ້ແນວຄິດ ແລະ ການກະທຳ ສົ່ງເສີມດ້ານດີ ແກ້ໄຂບັນດາຂໍ້ຄົງຄ້າງ ແລະ ສິ່ງທ້າທາຍຕ່າງໆທີ່ເກີດຂຶ້ນ ສ້າງຄວາມເຊື່ອໝັ້ນຂອງພະນັກງານ ສະມາຊິກພັກ ແລະ ປະຊາຊົນບັນດາເຜົ່າຕໍ່ການນຳພາຂອງພັກ ການຄຸ້ມຄອງຂອງລັດ ເພີ່ມທະວີຄວາມຮັບຜິດຊອບ ປະກອບສ່ວນເຂົ້າໃນພາລະກິດປົກປັກຮັກສາ ແລະ ພັດທະນາປະເທດຊາດ ເພື່ອນຳເອົາປະເທດຊາດກ້າວຂຶ້ນສູ່ຄວາມວັດທະນາຖາວອນ.
4/ ເພື່ອໂຄສະນາແນວທາງນະໂຍບາຍຂອງພັກ-ລັດ ຜົນສຳເລັດຂອງການປົກປັກຮັກສາ ແລະ ພັດທະນາປະເທດຊາດ ພາຍໃຕ້ການຊີ້ນຳ-ນຳພາຂອງພັກ-ລັດ ໃຫ້ແກ່ບັນດາປະເທດໃນພາກພື້ນ ແລະ ສາກົນ ໄດ້ຮັບຮູ້ເຂົ້າໃຈຕາມແນວທາງການຕ່າງປະເທດທີ່ວາງໄວ້ ບົນພື້ນຖານນັ້ນເພື່ອສືບຕໍ່ປະກອບສ່ວນ ເຂົ້າໃນພາລະກິດປົກປັກຮັກສາ ພັດທະນາປະເທດຊາດ ໃນເງື່ອນໄຂທີ່ປະເທດເຮົາເຊື່ອມໂຍງສາກົນ ແລະ ພາກພື້ນຢ່າງຕັ້ງໜ້າ ພ້ອມດຽວກັນນັ້ນ ກໍເພື່ອໂຄສະນາປຸກລະດົມສ້າງຂະບວນການ ຄຳນັບຮັບຕ້ອນກອງປະຊຸມໃຫຍ່ ຄັ້ງທີ XI ຂອງພັກ ແລະ ຕິດພັນກັບການໂຄສະນາເຜີຍແຜ່ຜົນສຳເລັດ ກອງປະຊຸມໃຫຍ່ອົງຄະນະພັກຂອງບັນດາກະຊວງ ອົງການ ແຂວງ ນະຄອນຫຼວງ ເມືອງ ແລະ ນະຄອນ ໃນຂອບເຂດທົ່ວປະເທດຢ່າງເປັນຂະບວນຟົດຟື້ນ.
II/ ເນື້ອໃນໂຄສະນາ-ປາຖະກະຖາ
1/ ໃຫ້ນຳໃຊ້ເອກະສານໂຄສະນາ-ປາຖະກະຖາ ທີ່ຄະນະໂຄສະນາອົບຮົມສູນກາງພັກໄດ້ສົ່ງໃຫ້ ໂດຍສົມທົບກັບຜົນງານຜົນສຳເລັດຕົວຈິງຂອງບັນດາກະຊວງອົງການ ແລະ ທ້ອງຖິ່ນ ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງລັດ ໃນແຕ່ລະໄລຍະເປັນຂໍ້ມູນເພີ່ມຕື່ມເຂົ້າໃນການປາຖະກະຖາ.
2/ ການຈັດຕັ້ງໂຄສະນາ-ປະຖະກະຖາ ສາມາດສົມທົບກັບການສາຍຮູບເງົາ ສາລະຄະດີ ສະແດງສິລະປະວັນນະຄະດີ ສະແດງຮູບພາບກ່ຽວກັບປະຫວັດສາດ ການຕໍ່ສູ້ປົດປ່ອຍຊາດ ປົກປັກຮັກສາ ແລະ ພັດທະນາປະເທດຊາດ ກໍຄື ຊີວິດ ແລະ ການເຄື່ອນໄຫວປະຕິວັດຂອງປະທານ ໄກສອນ ພົມວິຫານ.
3/ ເປົ້າໝາຍເຂົ້າຮ່ວມປາຖະກະຖາ ບັນດາສະຫາຍຄະນະພັກ ຄະນະນຳ ສະມາຊິກພັກ ພະນັກງານ-ລັດຖະກອນ ທະຫານ ຕຳຫຼວດ ນັກຮຽນ-ນັກສຶກສາ ປັນຍາຊົນ ຕະຫຼອດຮອດປະຊາຊົນບັນດາເຜົ່າ ແລະ ຊັ້ນຄົນຕ່າງໆໃນທົ່ວສັງຄົມ.
4/ ກຳນົດເວລາ ການປາຖະກະຖາ ໃຊ້ເວລາ 1 ຕອນ ຫຼື ຕາມເງື່ອນໄຂຕົວຈິງຂອງກະຊວງ-ອົງການ ແລະ ທ້ອງຖິ່ນ.
III/ ວິທີຈັດຕັ້ງປະຕິບັດ
1/ ພາຍຫຼັງໄດ້ຮັບແຈ້ງການແນະນຳສະບັບນີ້ ສະເໜີໃຫ້ຄະນະປະຈຳພັກແຕ່ລະຂັ້ນ ປຶກສາຫາລືແຕ່ງຕັ້ງຄະນະຮັບຜິດຊອບປາຖະກະຖາໃນຂັ້ນຂອງຕົນ ໂດຍໃຫ້ຄະນະໂຄສະນາອົບຮົມຂັ້ນຕົນເປັນໃຈກາງ ສຳລັບຈຳນວນຄົນເຂົ້າຮ່ວມຟັງ ລວມທັງການເຂົ້າຮ່ວມກິດຈະກຳຕ່າງໆ ປິ່ນອ້ອມວັນສຳຄັນກ່ຽວຂ້ອງຢູ່ແຕ່ລະບ່ອນນັ້ນ ໃຫ້ອີງຕາມແຈ້ງການຂອງຫ້ອງວ່າການ ສຳນັກງານນາຍົກລັດຖະມົນຕີ ກ່ຽວກັບມາດຕະການໃນການປ້ອງກັນ ຄວບຄຸມ ສະກັດກັ້ນພະຍາດ COVID-19 ໃນແຕ່ລະໄລຍະ.
ສຳລັບຜູ້ປາຖະກະຖາ ສະເໜີໃຫ້ຄະນະປະຈຳພັກແຕ່ລະຂັ້ນ ຫຼື ເຊີນເອົາພະນັກງານປະຕິວັດ ອາວຸໂສ ຜູ້ທີ່ມີບົດບາດ ເປັນຜູ້ປາຖະກະຖາຕາມຄວາມເໝາະສົມ.
2/ ພາຍຫຼັງຈັດຕັ້ງໂຄສະນາ-ປາຖະກະຖາສຳເລັດແລ້ວ ໃຫ້ສະຫຼຸບລາຍງານຄະນະໂຄສະນາອົບຮົມສູນກາງພັກ ເພື່ອລາຍງານໃຫ້ຄະນະຮັບຜິດຊອບຊີ້ນຳລະດັບຊາດ ແລະ ກົມການເມືອງສູນກາງພັກຢ່າງທັນການ ທັງໝົດນັ້ນ ຄືບາງຈິດໃຈສຳຄັນທີ່ຢາກໃຫ້ພາກສ່ວນກ່ຽວຂ້ອງ ໄດ້ກຳແໜ້ນເວລາຈັດຕັ້ງປະຕິບັດ ຈຶ່ງຈະໄດ້ຮັບຜົນສຳເລັດສູງສຸດ.
ໂດຍ: ແນວລາວ