ທະນາຄານການຄ້າຕ່າງປະເທດລາວມະຫາຊົນ (ທຄຕລ) ໄດ້ຖືສຳຄັນໃນການຊ່ວຍເຫຼືອສັງຄົມ ໂດຍສະເພາະເນັ້ນໜັກດ້ານການສຶກສາ ແລະ ສຸຂະພາບຂອງປະຊາຊົນ ໃນເຂດຫ່າງໄກສອກຫຼີກໃນທົ່ວປະເທດ ເຊິ່ງໃນມໍ່ໆຜ່ານມາທະນາຄານດັ່ງກ່າວ ໄດ້ໃຫ້ການສະໜັບສະໜູນທາງດ້ານການສຶກສາ ແກ່ໂຮງຮຽນປະຖົມທ່າເຮືອເໜືອ ເມືອງວັງວຽງ ແຂວງວຽງຈັນ.
ທ່ານ ຫົງສະຫວັນ ວົງສຳພັນ ຫົວໜ້າຂະແໜງຫ້ອງການ-ບັນຊີ-ໄອທີ ທະນາຄານການຄ້າຕ່າງປະເທດລາວ ມະຫາຊົນ ສາຂາວັງວຽງ ໄດ້ຜ່ານບົດລາຍງານໂດຍຫຍໍ້ຂອງໂຄງການຊ່ວຍເຫຼືອດ້ານການສຶກສາ ໃຫ້ເມືອງວັງວຽງ ແຂວງວຽງຈັນ ວ່າ: ໂດຍປະຕິບັດຕາມແຈ້ງການຂອງທະນາຄານການຄ້າຕ່າງປະເທດລາວມະຫາຊົນ ກ່ຽວກັບວຽກງານຊ່ວຍເຫຼືອສັງຄົມ ໂດຍສະເພາະແມ່ນ ເນັ້ນໝັກດ້ານການສຶກສາ ແລະ ດ້ານສຸຂະພາບຂອງປະຊາຊົນເຂດຫ່າງໄກສອກຫຼີກໃນທົ່ວປະເທດ ເຊິ່ງມີງົບປະມານທັງໝົດປະມານ 1 ຕື້ກວ່າກີບ ສະເພາະເມືອງວັງວຽງ ແຂວງວຽງຈັນ ແມ່ນໄດ້ຮັບການແບ່ງປັນແຫຼ່ງທຶນ ປະມານ 53 ລ້ານກວ່າກີບ ໃນນັ້ນເປັນທຶນການສຶກສາ 14 ລ້ານກີບ ແລະ ເປັນທຶນດ້ານສຸຂະພາບ 39 ລ້ານກວ່າກີບ ການນຳໃຊ້ທຶນສຳລັບໂຄງການຊ່ວຍເຫຼືອດ້ານການສຶກສາໃຫ້ເມືອງວັງວຽງ ແຂວງວຽງຈັນ ໃນຄັ້ງນີ້ປະກອບມີ ອຸປະກອນເຄື່ອງຫຼິ້ນ ແລະ ປຶ້ມນິທານສຳລັບນ້ອງນ້ອຍອະນຸບານ ອຸປະກອນການຮຽນສຳລັບນ້ອງນ້ອຍ ປ 1 ຫາ ປ 5 ໝາກບານເຕະໃຫ້ແກ່ໂຮງຮຽນປະຖົມທ່າເຮືອ ຫ້ວຍຊີ ນ້ຳພາວ ແລະ ໂພນສູງ ຕິດຕັ້ງເພດານ ແລະ ພັດລົມໃຫ້ແກ່ໂຮງຮຽນປະຖົມໂພນສູງ ລວມມູນຄ່າທັງໝົດ 14.000.000 ກີບ.
ໃນວັນທີ 19 ກັນຍາ 2020 ທີ່ໂຮງຮຽນປະຖົມທ່າເຮືອເໜືອ ໄດ້ຈັດພິທີເຊັນບົດບັນທຶກມອບ-ຮັບໂຄງການຊ່ວຍເຫຼືອດ້ານການສຶກສາ ໃຫ້ເມືອງວັງວຽງ ແຂວງວຽງຈັນ ຕາງໜ້າເຊັນໂດຍທ່ານ ກໍລະກັນ ບຸນຍາລາດ ວ່າການຫົວຫນ້າທະນາຄານການຄ້າຕ່າງປະເທດລາວມະຫາຊົນ ສາຂາວັງວຽງ ແລະ ຕາງໜ້າຮັບໃນຄັ້ງນີ້ ໂດຍທ່ານ ສີປະເສິດ ວົງສາ ຮອງຫົວໜ້າຫ້ອງການສຶກສາທິການ ແລະ ກີລາ ເມືອງວັງວຽງ ໂດຍຊ່ອງໜ້າອຳນາດການປົກຄອງເມືອງ ແລະ ບ້ານ.
ໃນພິທີດັ່ງກ່າວ ທ່ານ ບຸນສີ ລັດດາວົງ ຫົວໜ້າຫ້ອງການຈັດຕັ້ງເມືອງວັງວຽງ ໄດ້ໃຫ້ກຽດຂຶ້ນມອບໃບສົມມະນາບຸນຄຸນຂອງທ່ານເຈົ້າເມືອງວັງວຽງ ໃຫ້ແກ່ ທຄຕລ ສາຂາວັງວຽງ ຕາງໜ້າຂຶ້ນຮັບໂດຍທ່ານ ກໍລະກັນ ບຸນຍາລາດ ວ່າການຫົວໜ້າທະນາຄານການຄ້າຕ່າງປະເທດລາວມະຫາຊົນ ສາຂາວັງວຽງ.