ໃນວັນທີ 28 ພຶດສະພາ 2026, ທີ່ ກະຊວງການຕ່າງປະ ເທດ, ທ່ານ ໄມທອງ ທໍາມະວົງສາ, ຮອງລັດຖະມົນຕີກະ ຊວງການຕ່າງປະເທດ ແຫ່ງ ສປປ ລາວ ໄດ້ພົບປະສອງຝ່າຍກັບ ທ່ານ ນາງ ຊີມາ ເມວໂຮຕຣາ (Seema Malhotra MP), ຮອງລັດຖະມົນຕີກະຊວງການຕ່າງປະເທດ, ຜູ້ຮັບຜິດຊອບວຽກງານອິນໂດ-ປາຊີຟິກ ແລະ ວຽກງານຄວາມເທົ່າທຽມ ແຫ່ງ ສະຫະຣາຊະອານາຈັກ ອັງ ກິດ ແລະ ອຽກລັງເໜືອ ພ້ອມດ້ວຍຄະນະ ໃນໂອກາດເດີນທາງມາຢ້ຽມຢາມເຮັດວຽກຢ່າງເປັນທາງການ ຢູ່ ສປ ປ ລາວ ເພື່ອສືບຕໍ່ເສີມຂະຫຍາຍສາຍພົວພັນ ແລະ ການຮ່ວມມື ລະຫວ່າງສອງປະເທດ ໃຫ້ຕໍ່ເນື່ອງ.
ໃນໂອກາດດັ່ງກ່າວ, ສອງຝ່າຍ ໄດ້ທົບທວນວຽກງານການພົວພັນ ເພື່ອສົ່ງເສີມການຮ່ວມມືໃຫ້ເຂັ້ມແຂງ ແລະ ຂະຫຍາຍຕົວຍິ່ງໆຂຶ້ນໃນຕໍ່ໜ້າ ລວມທັງໃນຂອບສອງຝ່າຍ ແລະ ຫຼາຍຝ່າຍ ພ້ອມທັງໄດ້ແລກປ່ຽນທັດສະນະ ກ່ຽວ ກັບ ບັນຫາຕ່າງໆ ທີ່ສອງຝ່າຍມີຄວາມສົນໃຈຮ່ວມກັນ.
ໃນໂອກາດດຽວກັນ, ທ່ານຮອງລັດຖະມົນຕີ ຊີມາ ເມວໂຮຕຣາ ຍັງໄດ້ພົບປະກັບ ບາງຂະແໜງການກ່ຽວຂ້ອງ ເພື່ອປຶກສາຫາລືບັນດາໂຄງການຮ່ວມມືເພື່ອການພັດທະນາ ແລະ ທິດທາງຮ່ວມມືໃນອະນາຄົດ. ນອກນັ້ນ, ຍັງໄດ້ຢ້ຽມ ຢາມອົງການເກັບກູ້ລະເບີດ (MAG) ແລະ ໄດ້ປະກາດສືບຕໍ່ໃຫ້ທຶນຊ່ວຍເຫຼືອ ໃນສົກປີ 2026-2027.
ນັບຕັ້ງແຕ່ ສປປ ລາວ ແລະ ອັງກິດ ໄດ້ສ້າງຕັ້ງສາຍພົວ ພັນການທູດຮ່ວມກັນ ໃນວັນທີ 5 ກັນຍາ 1955 ເປັນຕົ້ນມາ, ການພົວພັນຮ່ວມມື ລະຫວ່າງ ສອງປະເທດແມ່ນມີທ່າກ້າວ ແລະ ຂະຫຍາຍຕົວຢ່າງຕໍ່ເນື່ອງ. ໃນປີ 2025, ສອງປະເທດ ໄດ້ຮ່ວມກັນຈັດງານສະເຫຼີມສະຫຼອງ ວັນສ້າງຕັ້ງສາຍພົວພັນການທູດ ຄົບຮອບ 70 ປີ ຢ່າງເປັນຂະບວນຟົດຟື້ນ.
ຂົງເຂດການຮ່ວມມືເພື່ອການພັດທະ ນາສອງຝ່າຍ ປະກອບດ້ວຍ ວຽກງານສາທາລະນະສຸກ, ການສຶກສາ, ໂຍທາທິການ, ການພັດທະນາຊັບພະຍາກອນມະນຸດ ໂດຍຜ່ານການຈັດຝຶກອົບຮົມຕ່າງໆ ແລະ ໂຄງການເກັບກູ້ລະເບີດທີ່ບໍ່ທັນແຕກ (UXO) ຊຶ່ງເປັນການປະກອບສ່ວນທີ່ສຳຄັນເຂົ້າໃນການພັດທະນາເສດຖະກິດ-ສັງ ຄົມ ຂອງ ສປປ ລາວ. ຄຽງຄູ່ກັນນັ້ນ, ສອງປະເທດກໍໄດ້ມີການແລກປ່ຽນການຢ້ຽມຢາມຂອງຄະນະຜູ້ແທນ ໃນລະດັບຕ່າງໆ ຢ່າງເປັນປົກກະຕິ.