ບໍລິສັດ ເບຍລາວ ຈຳກັດ ຍຶດໝັ້ນໃນການເປັນສ່ວນໜຶ່ງຂອງການພັດທະນາຊັບພະຍາກອນມະນຸດ ເພື່ອສະໜັບ ສະໜູນ ເຂົ້າໃນການຂັບເຄື່ອນເສດຖະກິດ-ສັງຄົມລາວ ໃຫ້ເຕີບໂຕຢ່າງໝັ້ນຄົງ ໂດຍທຸ່ມເງິນເຂົ້າໃນໂຄງການບູລິມະສິດທີ່ “ເບຍລາວ ສານຝັນໃຫ້ນ້ອງ” ໂດຍໄດ້ເລີ່ມຈັດຕັ້ງປະຕິບັດແຕ່ປີ 2010 ມາຮອດປັດຈຸບັນໄດ້ປະກອບສ່ວນງົບ ປະມານເຂົ້າໃນວຽກງານການສຶກສາມາແລ້ວຫຼາຍກວ່າ 13 ຕື້ກີບ ເຊິ່ງສາມາດສ້າງໂອກາດໃຫ້ແກ່ນັກສຶກສາໄປແລ້ວ 3.874 ຄົນ ສຳລັບປີ 2026 ຫຼາຍກວ່າ 1,4 ຕື້ກີບ. ສຳລັບປີ 2026 ບໍລິສັດໄດ້ສືບຕໍ່ມອບທຶນການສຶກສາລວມມູນຄ່າກວ່າ 1,4 ຕື້ກີບ ໃຫ້ແກ່ນັກສຶກສາຈຳ ນວນ 150 ຄົນ ທີ່ມີຜົນການຮຽນດີເດັ່ນ ແຕ່ຂາດເຂີນທຶນຮອນ ໃນ 4 ມະຫາວິທະຍາໄລ ແລະ 4 ສະຖາບັນການສຶກສາຫຼັກ ທົ່ວປະເທດ ເຊັ່ນ: ມະຫາວິທະຍາໄລແຫ່ງຊາດ ມະຫາວິທະຍາໄລສຸພານຸວົງ ມະຫາວິທະຍາໄລສະຫວັນນະເຂດ ແລະ ມະຫາວິທະຍາໄລຈຳປາສັກ, ວິທະຍາໄລຄູປາກເຊ, ວິທະຍາໄລຄູສະຫວັນນະເຂດ, ສະຖາບັນວິຈິດສິນແຫ່ງຊາດ ແລະ ວິທະຍາໄລເຕັກນິກ ລາວ-ເຢຍລະມັນ.
ທ່ານ ເຮັນຣິກ ແອນເດີເຊິນ ຜູ້ອຳນວຍການໃຫຍ່ ບໍລິສັດ ເບຍລາວ ຈຳກັດ ກ່າວວ່າ: “ຜ່ານໂຄງການ “ເບຍລາວ ສານຝັນໃຫ້ນ້ອງ”, ພວກເຮົາມີຄວາມພາກພູມໃຈທີ່ໄດ້ສືບຕໍ່ຄວາມມຸ່ງໝັ້ນໃນການປະກອບສ່ວນຊ່ວຍເຫຼືອສັງ ຄົມລາວ ເຊິ່ງຖືເປັນສ່ວນໜຶ່ງໃນຄວາມຮັບຜິດຊອບຂອງບໍລິສັດ. ພວກເຮົາມີຄວາມເຊື່ອວ່າ ການສຶກສາແມ່ນຮາກ ຖານທີ່ແຂງແກ່ນທີ່ສຸດໃນການສ້າງໂອກາດ, ການເສີມສ້າງທ່າແຮງໃຫ້ແກ່ເຍົາວະຊົນ ແລະ ການວາງຮາກຖານເພື່ອອະນາຄົດທີ່ສົດໃສຂອງ ສປປ ລາວ. ໂຄງການນີ້ ໄດ້ຖືກອອກແບບມາເປັນພິເສດ ເພື່ອສະໜັບສະໜູນນັກສຶກສາທີ່ມີຜົນການຮຽນດີເດັ່ນ ແຕ່ຂາດເຂີນດ້ານທຶນຮອນ ເພື່ອໃຫ້ພວກເຂົາສາມາດເຂົ້າເຖິງການຮຽນຮູ້ຢ່າງຕໍ່ເນື່ອງ ແລະ ກ້າວຕາມຄວາມຝັນຂອງຕົນເອງໄດ້ຢ່າງໝັ້ນໃຈ.ໃນໂອກາດນີ້, ຂ້າພະເຈົ້າຂໍສະແດງຄວາມຍິນດີຢ່າງຈິງໃຈມາຍັງນັກສຶກສາທຸກຄົນທີ່ໄດ້ຮັບທຶນການສຶກສາໃນຄັ້ງນີ້. ຍ້ອນຄວາມມຸ່ງໝັ້ນ, ຄວາມພະຍາຍາມ ແລະ ຄວາມອົດທົນຂອງທຸກຄົນ ຈຶ່ງເຮັດໃຫ້ສາມາດກ້າວເຖິງບາດກ້າວທີ່ສຳ ຄັນນີ້ໄດ້.
ບໍ່ວ່າໃນອະນາຄົດເຂົາເຈົ້າຈະເລືອກເສັ້ນທາງອາຊີບໃດກໍ ຕາມ, ຂ້າພະເຈົ້າຂໍເປັນກຳລັງໃຈໃຫ້ນັກສຶກສາທຸກຄົນຈົ່ງເຊື່ອໝັ້ນໃນຕົນເອງ, ໝັ່ນຊອກຮູ້ຮ່ຳຮຽນ ແລະ ບໍ່ຢຸດທີ່ຈະກ້າວໄປຕາມຄວາມຝັນ. ຂ້າພະເຈົ້າເຊື່ອວ່າ ນັກສຶກສາເຫຼົ່ານີ້ລ້ວນແຕ່ມີທ່າແຮງອັນສຳຄັນ ແລະ ຈະເຕີບໃຫຍ່ກາຍເປັນບຸກຄະລາກອນທີ່ມີຄຸນນະພາບ, ສາມາດສ້າງປະໂຫຍດໃຫ້ແກ່ຊຸມຊົນ ແລະ ຮ່ວມເປັນສ່ວນໜຶ່ງໃນການພັດທະນາ ປະເທດຊາດ ໃຫ້ຈະເລີນຮຸ່ງເຮືອງໃນອະນາຄົດ.
ທ່ານ ສິດທິໄຊ ເກດຕະວົງ ຄະນະອຳນວຍການບໍລິສັດເບຍລາວ ກ່າວວ່າ: ເມ່ືອບໍລິສັດມີການເຕີບໃຫຍ່ຂະຫຍາຍຕົວ, ມີກຳໄລ ແລະ ເຮັດແນວໃດເພ່ືອໃຫ້ກຳໄລຄືນແກ່ສັງ ຄົມ ແລະ ມີຄວາມຍືນຍົງ. ຕະຫລອດ 15 ປີ ທີ່ພວກເຮົາໄດ້ປະຕິບັດມາ ກໍຄື “ໂຄງການເບຍລາວສານຝັນໃຫ້ນ້ອງ” ເປັນອີກໂຄງການໜຶ່ງທີ່ສຳຄັນ ເພື່ອເປັນຂົວຕໍ່ໃຫ້ນ້ອງໆນັກສຶກສາມີໂອກາດໄດ້ຮັບເອົາຄວາມຮູ້ອັນໃໝ່ໆ, ໄດ້ຮ່ຳຮຽນເອົາສິ່ງໃໝ່ໆ ແລະ ໄລຍະ 15 ປີມານີ້ ທາງໂຄງການໄດ້ມອບທຶນການສຶກສາໃນທົ່ວປະເທດ ຈຳນວນ 3.874 ຄົນ,ນັກສຶກສາທີ່ໄດ້ຮັບທຶນຈາກບໍລິສັດເບຍລາວ ຈໍາກັດແລ້ວ ແຕ່ແມ່ນຄົນເກັ່ງ, ມີສີມື, ມີຄວາມຮູ້ຄວາມສາມາດ ແລະ ມີຄຸນນະພາບອອກໄປຮັບໃຊ້ສັງຄົມ, ອັນນີ້ຢາກໃຫ້ສັງຄົມເຫັນວ່າບໍລິສັດເບຍລາວໄດ້ທຸ້ມເທ ແລະ ໄດ້ລົງທຶນຈຳນວນຫລາຍໃນຂະແໜງການສຶກສາ. ອີກອັນໜຶ່ງກໍເປັນການຊ່ວຍເຫລືອສະໜັບສະໜູນທິດທາງນະໂຍບາຍຂອງພັກ-ລັດໃນການສ້າງສາພັດທະນາປະເທດຊາດໃຫ້ຈະເລີນຮຸ່ງເຮືອງ.
ທ່ານ ນາງເບ ແພງສຸພີ ຮອງຜູ້ອຳນວຍການວິທະຍາໄລເຕັກນິກ-ລາວເຢຍລະມັນ ໃຫ້ຮູ້ວ່າ: “ໂຄງການ ເບຍລາວສານຝັນໃຫ້ນ້ອງປີທີ 15” ກໍເປັນອີກໂຄງການໜຶ່ງທີ່ສຳ ຄັນໃນການສົ່ງເສີມໃຫ້ນັກສຶກສາໃນຂົງເຂດຕ່າງໆໄດ້ເຂົ້າ ເຖິງທຶນການສຶກສາ ໂດຍສະເພາະແມ່ນນັກສຶກສາທີ່ມີຄວາມດຸໝັ່ນ, ຮຽນເກັ່ງ, ມີຄວາມຮູ້ຄວາມສາມາດ ແຕ່ຍັງຂາດເຂີນທຶນການສຶກສາ. ການທີ່ນ້ອງໆໄດ້ຮັບທຶນຄັ້ງນີ້ ເພື່ອເປັນການສານຝັນໃຫ້ເຂົາເຈົ້າໃນການເຮັດກິດຈະກຳ ຫລື ການຮຽນໃຫ້ໄປເຖິງຝັນ. ສຳລັບໃນຂົງເຂດອາຊີວະສຶກສາພວກເຮົາແລ້ວແມ່ນໄດ້ຮັບທຶນການສຶກສາປີນີ້ເປັນປີທີ 3 ເຊິ່ງນັກສຶກສາໄດ້ຮັບທຶນໃນປີນີ້ມີຈຳນວນ 9 ຄົນ ແລະ ແຕ່ລະຄົນລ້ວນເປັນນັກສຶກສາທີ່ມີຄວາມຮູ້ຄວາມສາມາດ ແລະ ຈະກາຍເປັນຊ່າງທີ່ດີໄດ້ໃນອະນາຄົດ. ທຶນການສຶກສາກໍເປັນມາດຖານອັນໜຶ່ງທີ່ເຮັດໃຫ້ນ້ອງໆໄດ້ມີຄວາມບຸກບືນຫລາຍຂຶ້ນກວ່ານັກສຶກສາທົ່ວໄປ ເພື່ອຮັກ ສາທຶນນັ້ນໄວ້ແຕ່ປີທຳອິດຈົນຮອດປີສຸດທ້າຍ ແລະ ຫວັງວ່າທຶນການສຶກສານີ້ຈະຊ່ວຍຕໍ່ຍອດໃຫ້ນ້ອງໆປະສົບຜົນ ສຳເລັດໄປຕາມຝັນ.
ທ້າວ ຄຳເສົາ ສີປະເກດ ນັກສຶກສາສະຖາບັນວິຈິດສິນແຫ່ງ ຊາດ ໃຫ້ສຳພາດວ່າ: ສຳລັບນ້ອງແລ້ວ ທຶນການສຶກສານີ້ບໍ່ພຽງແຕ່ເປັນໂອກາດໃນດ້ານການສຶກສາເທົ່ານັ້ນ, ແຕ່ຍັງເປັນແຮງພັກດັນໜຶ່ງທີ່ເຮັດໃຫ້ຢາກພັດທະນາຕົນເອງໃນດ້ານທັກສະ ແລະ ສີມືຕ່າງໆ ເພື່ອຫວັງວ່າໃນອະນາຄົດຈະເປັນສ່ວນໜຶ່ງຂອງອົງການເບຍລາວ.
ສຳລັບນ້ອງເອງທີ່ໄດ້ທຶນການສຶກສາມາຈາກ “ໂຄງການເບຍລາວສານຝັນໃຫ້ນ້ອງ” ໃນຄັ້ງນີ້ ແມ່ນໄດ້ເອົາໄປໝູນ ໃຊ້ໃນການຂຽນບົດນິພົນ ແລະ ສາມາດ ແບ່ງເບົາຄ່າໃຊ້ຈ່າຍໄດ້ຫລາຍພໍສົມຄວນ. ແນວໃດກໍດີ, ສຳລັບນ້ອງໆທ່ານໃດຢາກໄດ້ຮັບທຶນສຶກສາຈາກໂຄງການນີ້ ຕ້ອງມີຄວາມຫວັງ, ດຸໝັ່ນຄົ້ນຄວ້າຮ່ຳຮຽນ ແລະ ຕ້ອງບຸກບືນໃຫ້ໄດ້ມາ.ສຳລັບ ໂຄງການດັ່ງກ່າວ ໄດ້ເລີ່ມຈັດຕັ້ງປະຕິບັດມາຕັ້ງແຕ່ປີ 2010.
ໃນປີນີ້, ຖືເປັນປີທີ 15 ທີ່ໂຄງການໄດ້ເປັນກຳລັງສຳຄັນໃນການສົ່ງເສີມການສຶກສາ ແລະ ພັດທະນາຊັບພະຍາກອນມະນຸດຂອງ ສປປ ລາວ ໃຫ້ມີຄວາມຮູ້ຄວາມສາມາດ, ທັກສະທີ່ເຂັ້ມແຂງ ແລະ ຍືນຍົງ. ພ້ອມນັ້ນຍັງສະທ້ອນເຖິງຄວາມມຸ່ງໝັ້ນເຂົ້າໃນການພັດທະນາຊັບພະຍາກອນມະ ນຸດ.ຕະຫຼອດໄລຍະ 15 ປີ ທີ່ຜ່ານມາ, ບໍລິສັດ ເບຍລາວ ຈຳກັດ ໄດ້ໃຫ້ຄວາມສຳຄັນສູງສຸດຕໍ່ກັບວຽກງານການສຶກ ສາ ແລະ ການພັດທະນາຊັບພະຍາກອນມະນຸດ ຄຽງຄູ່ກັບວຽກງານເຄື່ອນໄຫວທາງສັງຄົມ.
ບໍລິສັດ ມີຄວາມຫວັງຢ່າງຍິ່ງວ່າ ນັກສຶກສາທີ່ໄດ້ຮັບທຶນການສຶກສາດັ່ງກ່າວ ຈະກາຍເປັນບຸກຄະລາກອນທີ່ມີຄຸນ ນະພາບ ແລະ ເປັນກຳລັງສຳຄັນໃນການພັດທະນາປະເທດ ຊາດໃຫ້ຈະເລີນຮຸ່ງເຮືອງ. ເພາະພວກເຮົາເຊື່ອວ່າ “ການສຶກສາທີ່ດີ ຄືເສົາຄ້ຳທີ່ແຂງແກ່ນໃຫ້ແກ່ການພັດທະນາໃນອະນາຄົດ”.