ກະຊວງທ່ອງທ່ຽວ ສິລະປະ ແລະ ວັດທະນະທຳ ປະເທດມາເລເຊຍ ຈັດກອງປະຊຸມພົບປະລະດັບສູງກັບ ເອກອັກຄະລາຊະທູດ/ເອກອັກຄະລັດຖະທູດ ແລະ ຄາລາຊະການລະດັບສູງ 9 ປະເທດອາຊຽນ ເພື່ອສົ່ງເສີມສາຍສຳພັນອັນໃກ້ຊິດລະຫວ່າງ ມາເລເຊຍ ແລະ ບັນດາປະເທດອາຊຽນ ເພື່ອປະກອບສ່ວນເຂົ້າໃນການສົ່ງເສີມການທ່ອງທ່ຽວພາຍຫຼັງການລະບາດຂອງໂຄວິດ-19.
ອີງຕາມຂໍມູນຈາກ ທ່ອງທ່ຽວມາເລເຊຍ ປະຈຳລາວ ໃຫ້ຮູ້ວ່າ: ກອງປະຊຸມດັ່ງກ່າວຈັດຂຶ້ນຢູ່ ບັງຊາ ກົວລາລຳເປີ ປະເທດມາເຊຍ ໃນວັນ 6 ກໍລະກົດ 2022 ໂດຍການເປັນປະທານຂອງ ທ່ານ ນາງ ແນນຊີ ບິນຕິ ຊູຄຣີ (Dato’ Sri Hajah Nancy Binti Shukri) ລັດຖະມົນຕີກະຊວງທ່ອງທ່ຽວ ສິນລະປະ ແລະ ວັດທະນະທຳ ປະເທດມາເລເຊຍ.
ກອງປະຊຸມພົບປະເທື່ອນີ້ຈັດຂຶ້ນເພື່ອສົ່ງເສີມສາຍສຳພັນອັນໃກ້ຊິດລະຫວ່າງມາເລເຊຍ ແລະ ບັນດາປະເທດອາຊຽນໃຫ້ແໜ້ນແຟ້ນຍິ່ງຂຶ້ນ ພາຍຫຼັງການລະບາດຂອງ ໂຄວິດ-19 ມາເປັນເວລາ 2 ປີ ເຊິ່ງກອງປະຊຸມໄດ້ນຳສະເໜີກິດຈະກໍທ່ອງທ່ຽວ 3 ວັນ 2 ຄືນ ທີ່ລັດປາຮັງ (3D2N) ເພື່ອໃຫ້ບັນດາທູດ ທູຕານຸທູດ ແລະ ຄາລາສະການລະດັບສູງຂອງບັນດາປະເພດອາຊຽນ ໄດ້ທ່ຽວຊົມລັດ ປາຮັງ ເຊິ່ງກິດຈະກໍາດັ່ງກ່າວຈະຈັດຂຶ້ນໃນເດືອນ ສິງຫາ 2022 ທີ່ຈາມາເຖິງ.
ໃນໄລຍະກອງປະຊຸມທ່ອງທ່ຽວອາຍຊຽນ ASEAN Tourism Forum (ATF) ທີ່ຈັດຂຶ້ນຢູ່ກຳປູເຈຍ ໃນເດືອນ ມັງກອນ 2022 ຜ່ານມາ ເຊິ່ງໃນຄຳຊີ້ແຈງຕໍ່ສື່ມວນຊົນກ່ຽວກັບກອງປະຊຸມລັດຖະມົນຕີທ່ອງທ່ຽວອາຊຽນ ຄັ້ງທີ 25 ຫຼື the 25th Meeting of ASEAN Tourism Ministers ໄດ້ກຳນົດວິທີການຟື້ນຟູການທ່ອງທ່ຽວພາຍຫຼັງທີ່ມີການລະບາດຂອງໂຄວິດ-19 ສໍາລັບ ອົງການທ່ອງທ່ຽວແຫ່ງຊາດອາຊຽນ ຫຼື ASEAN National Tourism Organisations (NTO) ທີ່ໄດ້ຮັບຮອງໃນເດືອນ ກັນຍາ 2021.
ເພື່ອຂັບເຄື່ອນໄປຕໍ່ໜ້າຂ້າພະເຈົ້າເຊື່ອວ່າພວກເຮົາສາມາດເຮັດວຽກຮ່ວມກັນໃນການຮັດແໜ້ນ ການຮ່ວມມືດ້ານການຕະຫຼາດເພື່ອສົ່ງເສີມການທ່ອງທ່ຽວໃນພາກພື້ນທີ່ສອດຄ່ອງກັບການສ້າງ ຜະລິດ ຕະພັນການທ່ອງທ່ຽວໃໝ່ຂອງອາຊຽນ ນັ້ນກໍແມ່ນ ຈຸດໝາຍປາຍທາງໃນຄວາມໄຝ່ຝັນຂອງທຸກໆຄົນ ເປັນສະຖານທີ່ ທີ່ພວກເຮົາສາມາດສືບຕໍ່ຈຸດຂາຍດ້ານການທ່ອງທ່ຽວຄືໃຫ້ອາ ຊຽນເປັນຈຸດໝາຍປາຍທາງດຽວ.
ບັນດາປະເທດອາຊຽນ ແມ່ນມີສ່ວນສຳຄັນຕໍ່ມາເລເຊຍ ໃນການດຶງດູດນັກທ່ອງທ່ຽວຕ່າງປະເທດເຂົ້າມາຢ້ຽມຢາມມາເລເຊຍ ເຊິ່ງໃນປີ 2019 ມີນັກທ່ອງທ່ຽວຈາກບັນດາປະເທດອາຊຽນເຂົ້າມາມາເລເຊຍ ຫຼາຍກວ່າ 17,88 ລ້ານຄົນ ກວມເອົາ 68,5% ຂອງນັກທ່ອງທ່ຽວທັງໝົດ 26,1 ລ້ານກວ່າຄົນ ເຖິງແມ່ນວ່າໃນປີ 2020-2021 ໄດ້ມີການເຂັ້ມງວດມາດຕະການ ແຕ່ມີຜູ້ເດີນທາງເຂົ້າມາ ມາເລຍເຊຍກໍຍັງມີເຖິງ 2,94 ລ້ານກວ່າຄົນໃນປີ 2020 ແລະ ໃນປີ 2021 ທີ 91.665 ຄົນ.