ໂຄງການໂອກາດ ໃຫ້ການສະໜັບສະໜູນທຶນໂດຍອົງການພັດທະນາສາກົນ ປະເທດສະຫະລັດອາເມຣິກາ (USAID) ແລະ ຈັດຕັ້ງປະຕິບັດໂດຍອົງການເວີລດ໌ເອດຢູເຄຊັນ (WEI) ອົງການເພື່ອມະນຸດສະທໍາ ແລະ ການມີສ່ວນຮ່ວມ (HI) ສະມາຄົມຊ່ວຍເຫຼືອຟື້ນຟູຄຸນນະພາບຊີວິດ (QLA) ສະມາຄົມເພື່ອການສະໜັບສະໜູນ ແລະ ປັບປຸງຊົນນະບົດ (ARMI) ເພື່ອເສີມຂະຫຍາຍການເຂົ້າເຖິງການຮັກສາສຸຂະພາບ ແລະ ໂອກາດທາງດ້ານເສດຖະກິດ ສຳລັບຄົນທີ່ມີຄວາມພິການ ພ້ອມທັງສະໜັບສະໜູນການມີສ່ວນຮ່ວມໃນການອອກແບບນະໂຍບາຍ ແລະ ປະຕິບັດວຽກງານໃນການພັດທະນາແບບມີສ່ວນຮ່ວມ.
ນັບຕັ້ງແຕ່ເດືອນສິງຫາ ຈົນເຖິງເດືອນທັນວາ 2021 ທີມງານການພັດທະນາແບບມີສ່ວນຮ່ວມຂັ້ນຊຸມຊົນ (CBID) ຂອງໂຄງການໂອກາດ ໄດ້ສະໜອງສັດລ້ຽງເຊັ່ນ: ແບ້ ໄກ່ ໝູ ປາ ແລະ ອຸປະກອນຕ່າງໆ ເຊັ່ນ: ຊິ້ນສ່ວນອາໄຫຼ່ລົດຈັກ ແລະ ລົດໄຖນາ ລາຍການເຄື່ອງແຫ້ງຕ່າງໆ ລວມມູນຄ່າ 282 ລ້ານກວ່າກີບ ໃຫ້ແກ່ 90 ຄົວເຮຶອນຂອງຄົນທີ່ມີຄວາມພິການ ແລະ ຄອບຄົວຂອງພວກເຂົາຢູ່ເມືອງຄຳ ແຂວງຊຽງຂວາງ ແລະ ຈຳນວນມູນຄ່າ 238 ລ້ານກວ່າກີບ ໃຫ້ແກ່ 86 ຄົວເຮຶອນຂອງຄົນທີ່ມີຄວາມພິການ ແລະ ຄອບຄົວຢູ່ເມືອງໄຊພູທອງ ແຂວງສະຫວັນນະເຂດ ການສະໜອງຊັບສິນເຫຼົ່ານີ້ ແມ່ນມີຈຸດປະສົງເພື່ອສະໜັບສະໜູນໃຫ້ຄົນທີ່ມີຄວາມພິການ ແລະ ຄອບຄົວໃນການເລີ່ມຕົ້ນທຸລະກິດ ຫຼື ສ້າງຄວາມເຂັ້ມແຂງທາງດ້ານທຸລະກິດຂອງພວກເຂົາ ນອກຈາກສັດລ້ຽງ ແລະ ອຸປະກອນຕ່າງໆແລ້ວ ພວກເຂົາຍັງໄດ້ເຂົ້າຮ່ວມການຝຶກອົບຮົມຕ່າງໆ ເຊັ່ນ: ການພັດທະນາແຜນທຸລະກິດ ການຝຶກອົບຮົມຄວາມຮູ້ທາງດ້ານການເງິນ ການຝຶກອົບຮົມດ້ານວິຊາການ ແລະ ຄໍາແນະນໍາກ່ຽວກັບສະຖານທີ່ເໝາະສົມສໍາລັບທຸລະກິດ ແລະ ການຝຶກອົບຮົມການຄຸ້ມຄອງການເງິນຂອງຄົວເຮືອນ ແລະ ສ່ວນບຸກຄົນ ເພື່ອຊ່ວຍໃນການສ້າງທຸລະກິດຂອງພວກເຂົາ.
ໜຶ່ງໃນບຸລິມະສິດຫຼັກຂອງທີມງານການພັດທະນາແບບມີສ່ວນຮ່ວມຂັ້ນຊຸມຊົນ ຂອງໂຄງການໂອກາດ ແມ່ນເພື່ອຮັບປະກັນວ່າບໍ່ມີໃຜໄດ້ຮັບບາດເຈັບ ຫຼືເສຍຊີວິດຈາກລະເບີດບໍ່ທັນແຕກໃນຂະນະທີ່ລິເລີ່ມ ຫຼື ຂະຫຍາຍພື້ນທີ່ກະສິກຳຈາກກິດຈະກຳສ້າງລາຍຮັບ ດັ່ງນັ້ນ ກ່ອນການມອບ-ຮັບສັດລ້ຽງ ໂຄງການໂອກາດໄດ້ມີການປະສານສົມທົບກັບກະຊວງແຮງງານ ແລະ ສະຫວັດດີການສັງຄົມ ຄະນະກໍາມະການຄຸ້ມຄອງແຫ່ງຊາດເພື່ອແກ້ໄຂບັນຫາລະເບີດບໍ່ທັນແຕກທີ່ຕົກຄ້າງ ແລະ ໂຄງການເກັບກູ້ລະເບີດແຫ່ງຊາດ ເພື່ອສໍາຫຼວດ ແລະ ກວດກູ້ເນື້ອທີ່ດິນຂອງ 33 ຄອບຄົວທີ່ມີຄົນພິການອາໄສຢູ່ໃນເຂດທີ່ມີຄວາມສ່ຽງສູງຕໍ່ກັບລະເບີດບໍ່ທັນແຕກຢູ່ເມືອງຄຳ ແຂວງຊຽງຂວາງ. ໃນປັດຈຸບັນ ພວກເຂົາສາມາດດຳເນີນການກະສິກໍາເຊິ່ງເປັນກິດຈະກຳການສ້າງລາຍຮັບທີ່ພວກເຂົາໄດ້ເລືອກໄວ້ໄດ້ຢ່າງປອດໄພ ແລະ ສະບາຍໃຈ.
ໂດຍຜ່ານການສະໜັບສະໜູນຂອງໂຄງການໂອກາດ ປັດຈຸບັນ ຄົນທີ່ມີຄວາມພິການ ແລະ ຄອບຄົວຂອງພວກເຂົາສາມາດລິເລີ່ມ ຫຼື ຂະຫຍາຍທຸລະກິດເພື່ອເພີ່ມລາຍຮັບເຂົ້າໃນຄົວເຮືອນຂອງພວກເຂົາ ແລະ ເລີ່ມຕົ້ນການປະຢັດ ເພື່ອປ້ອງກັນຄວາມສ່ຽງຂອງຄ່າໃຊ້ຈ່າຍທີ່ບໍ່ຄາດຄິດຈະເກີດຂຶ້ນ ເຊິ່ງອາດຈະມີຜົນກະທົບຕໍ່ຄວາມໝັ້ນຄົງທາງດ້ານການເງິນຂອງພວກເຂົາ.
# ຂ່າວ – ພາບ : ໄຊບັນດິດ