ກອງປະຊຸມຄົບຄະນະບໍລິຫານງານພັກນະຄອນຫຼວງວຽງຈັນ (ນວ) ຄັ້ງທີ 5 ສະໄໝທີ VII ຈັດຂຶ້ນວັນທີ 27-29 ທັນວາ 2021 ຢູ່ຫ້ອງວ່າການອົງການປົກຄອງ ນວ ໂດຍເປັນປະທານຂອງສະຫາຍ ອາດສະພັງທອງ ສີພັນດອນ ຮອງເລຂາຄະນະພັກ ເຈົ້າຄອງ ນວ ມີກໍາມະການປະຈໍາພັກ ແລະ ຄະນະພັກ ນວ ເຂົ້າຮ່ວມ.
![](https://v2.vientianemai.net/wp-content/uploads/2021/12/received_1288383098291761-1024x683.jpeg)
ກອງປະຊຸມຄັ້ງນີ້ ໄດ້ຮັບຟັງການລາຍງານ ແລະ ໃຫ້ທິດຊີ້ນຳກ່ຽວກັບການສະຫຼຸບຕີລາຄາການນໍາພາວຽກງານຮອບດ້ານຂອງອົງຄະນະພັກນະຄອນຫຼວງ ໄລຍະ 1 ປິຜ່ານມາ (2021) ແລະ ແຜນວຽກຈຸດສຸມປີ 2022 ເຊິ່ງໄລຍະຜ່ານມາ ອົງຄະນະພັກນະຄອນຫຼວງໄດ້ເອົາໃຈໃສ່ຈັດຕັ້ງຜັນຂະຫຍາຍມະຕິ XI ແຜນພັດທະນາ 5 ປີ ຄັ້ງທີ IX ຕິດພັນກັບມະຕິສະພາປະຊາຊົນ ແລະ ແຜນພັດທະນາເສດຖະກິດ-ສັງຄົມ 5 ປີ ສະບັບທີ IX ຂອງນະຄອນຫຼວງ ເຂົ້າໃນການນຳພາວຽກງານແຕ່ລະດ້ານ ເປັນຕົ້ນ: ການນໍາພາວຽກງານການລົງທຶນ ແລະ ການເຕີບໂຕດ້ານເສດຖະກິດ-ການເງິນ ຄາດຄະເນຈະຂະຫຍາຍຕົວລວມຍອດຜະລິດຕະພັນພາຍໃນ (GDP) ໝົດປີ 2021 ຂອງນະຄອນຫຼວງ ຂະຫຍາຍຕົວຢູ່ໃນລະດັບ 4,13% (ມະຕິສະພາບໍ່ໃຫ້ຫຼຸດ 6,5%) ຈະມີມຸນຄ່າໃນປີປະມານ 57.953 ຕື້ກີບ (ມະຕິສະພາ 59.270 ຕື້ກີບ) ສະເລ່ຍຕໍ່ຫົວຄົນ ຈະບັນລຸໄດ້ 6.027 ໂດລາສະຫະລັດ (ມະຕິສະພາ 6.610 ໂດລາສະຫະລັດ) ໃນນີ້: ຂະແໜງກະສິກຳ ຄາດວ່າຈະຂະຫຍາຍຕົວ 3,28% ກວມເອົາ 14,86% ຂອງ GDP ຂະແໜງອຸດສາຫະກຳ ຄາດວ່າຈະຂະຫຍາຍຕົວ 6,25% ກວມເອົາ 50,04% ຂອງ GDP ຂະແໜງບໍລິການ ຄາດວ່າຈະຂະຫຍາຍຕົວ 1,24% ກວມເອົາ 35,09% ຂອງ GDP ດ້ານການລົງທຶນ: ໄດ້ຄົ້ນຄວ້າອອກໃບຢັ້ງຢືນຊຳລະໃຫ້ບັນດາໂຄງການໄດ້ທັງໝົດ 878 ໂຄງການ ລວມເປັນມູນຄ່າທັງໝົດ 91,19 ຕື້ກີບ ເທົ່າກັບ 75,49% ຂອງແຜນການປີ (120,79 ຕື້ກີບ) ຄາດຄະເນໝົດປີ ຈະປະຕິບັດໄດ້ຕາມແຜນທີ່ວາງໄວ້ ໃນນີ້ ທຶນບ້ວງປົກກະຕິ 221 ໂຄງການ ມູນຄ່າ 30,01 ຕື້ກີບ ບ້ວງເລື່ອນຈ່າຍໃນປີ 2020 ມາຈ່າຍໃນປີ 2021 ຈໍານວນ 383 ໂຄງການ ເທົ່າກັບ 25,23 ຕື້ກີບ ບ້ວງພັດທະນາຊົນນະບົດ ແລະ ແກ້ໄຂຄວາມທຸກຍາກ 4 ໂຄງການ ມູນຄ່າ 2,13 ຕື້ກີບ ແລະ ຊຳລະໜີ້ສີນດ້ວຍເງິນເກີນແຜນຂອງປີ 2020 ຈໍານວນ 270 ໂຄງການ ມູນຄ່າ 33,82 ຕື້ກີບ
![](https://v2.vientianemai.net/wp-content/uploads/2021/12/received_980627136169059-1024x683.jpeg)
ນອກຈາກນີ້ ຍັງໄດ້ຊໍາລະໜີ້ສິນໂຄງການລົງທຶນຂອງລັດດ້ວຍບ້ວງອວ່າຍໜີ້ສາມແຈ 32 ໂຄງການ ມູນຄ່າ 208,01 ຕື້ກີບ ແລະ ບ້ວງພັນທະບັດ 73 ໂຄງການ ມູນຄ່າ 184,62 ຕື້ກີບ
![](https://v2.vientianemai.net/wp-content/uploads/2021/12/received_456302489390015-1024x683.jpeg)
ດ້ານການເງິນ ສາມາດຈັດເກັບລາຍຮັບເຂົ້າງົບປະມານໄດ້ 4.017.745,902 ຕື້ກີບ ເທົ່າກັບ 78,86% ຂອງແຜນການປີ ໃນນັ້ນ ລາຍຮັບນະຄອນຫຼວງ ສາມາດປະຕິບັດໄດ້ 1.150.390.368 ຕື້ກີບ ເທົ່າກັບ 82,47% ຂອງແຜນການປີ ແລະ ລາຍຮັບບ້ວງສູນກາງ (ພາສິ) ປະຕິບັດໄດ້ 2.867.355.534 ຕື້ກີບ ເທົ່າກັບ 77,50 % ຂອງແຜນການປີ ການປະຕິບັດຄຸ້ມຄອງລາຍຈ່າຍງົບປະມານແຫ່ງລັດໃນແຜນການປີ ໄດ້ອະນຸມັດລາຍຈ່າຍ 640 ກວ່າຕື້ກີບ ເທົ່າກັບ 127,44% ຂອງແຜນການ.
ນອກນີ້ ກອງປະຊຸມຍັງໄດ້ຮັບຟັງການລາຍງານ ແລະ ໃຫ້ທິດຊີ້ນໍາກ່ຽວກັບການນຳພາຈັດຕັ້ງຕິບັດ 2 ວາລະແຫ່ງຊາດ ຮັບຟັງການລາຍງານການຈັດຕັ້ງປະຕິບັດມາດຕະການປ້ອງກັນ ຄວບຄຸມ ແລະ ແກ້ໄຂການລະບາດພະຍາດໂຄວິດ-19 ຢູ່ ນວ ການຊຸກຍູ້ສົ່ງເສີມໂຄງການຜະລິດສິນຄ້າປາຍແຫຼມ ເພື່ອສົ່ງອອກພາຍຫຼັງທີ່ມີໂຄງການລົດໄຟລາວ-ຈີນແລ່ນຜ່ານຊ່ວງ ນວ ແລະ ເປີດບັ້ນດຳເນີນຊີວິດການເມືອງ ຂອງອົງຄະນະພັກ ນວ ສະໄໝທີ VII ປະຈຳປີ 2021 ເພື່ອຄົ້ນຄວ້າສຳຫຼວດປັບປຸງປົວແປງພັກໃຫ້ມີຄວາມໜັກແໜ້ນເຂັ້ມແຂງຕື່ມອີກ.
# ຂ່າວ – ພາບ : ລັດເວລາ