ຕອນເຊົ້າວັນທີ 24 ເມສາ 2020 ໄດ້ມີຝົນຕົກໜັກຫຼາຍຊົ່ວໂມງຕິດຕໍ່ກັນ ເຮັດໃຫ້ນ້ຳຫ້ວຍຫຼາຍສາຍຢູ່ເຂດເມືອງຊຽງເງິນ ແຂວງຫຼວງພະບາງ ມີນ້ຳໄຫຼຊຸຢ່າງແຮງ ໂດຍສະເພາະນ້ຳຫ້ວຍລົມ ເຂດບ້ານກິ່ວຕະລຸນ 1 ໄດ້ໄຫຼຊຸເອົາປະຊາຊົນທີ່ໄປເຮັດການຜະລິດຢູ່ເຂດດັ່ງກ່າວ.
ທ່ານ ຈົ່ງກໍ່ເຮີ ນາຍບ້ານກິ່ວຕະລຸນ 1 ໃຫ້ສຳພາດວ່າ: ເຂດເກີດເຫດ ຕັ້ງຢູ່ຫ່າງຈາກບ້ານກິ່ວຕະລຸນ 1 ໂດຍໃຊ້ເວລາຍ່າງປະມານ 1 ຊົ່ວໂມງ ມີປະຊາຊົນພາຍໃນບ້ານໄປເຮັດການຜະລິດ 2 ຄອບຄົວ ຄື: ຄອບຄົວທ້າວ ຢ່າຮືເຮີ ແລະ ທ້າວ ຈົວກົວເຮີ ລວມ 11 ຄົນ ຊອກບໍ່ເຫັນ 7 ຄົນ ໃນນີ້ຄອບຄົວຂອງທ້າວ ຢ່າຮືເຮີ 5 ຄົນ ແລະ ຄົນໃນຄອບຄົວຂອງທ້າວ ຈົວກົວເຮີ 2 ຄົນ ມາຮອດຕອນແລງຂອງວັນທີ 24 ເມສາ ໄດ້ຄົ້ນພົບແລ້ວ 3 ສົບ ປັດຈຸບັນ ອົງການປົກຄອງບ້ານໄດ້ສົມທົບກຳລັງປ້ອງກັນ-ກອງຫຼອນບ້ານ ກຳລັງທະຫານຂອງກອງບັນຊາການທະຫານເມືອງຊຽງເງິນ ກຳລັງຊອກຄົ້ນຫາຜູ້ທີ່ຍັງຊອກບໍ່ເຫັນຢ່າງເລັ່ງດ່ວນ ແລະ ຈະສືບຕໍ່ປຸກລະດົມໃຫ້ກຳລັງໃຈກັບຄອບຄົວທີ່ໄດ້ຮັບເຄາະຮ້າຍຕໍ່ໄປ.
ດ້ວຍຄວາມເປັນຫ່ວງເປັນໄຍປະຊາຊົນ ການນຳແຂວງຫຼວງພະບາງ ນຳໂດຍທ່ານ ວົງສະຫວັນ ເທບພະຈັນ ຮອງເຈົ້າແຂວງຫຼວງພະບາງ ພ້ອມດ້ວຍພາກສ່ວນກ່ຽວຂ້ອງ ໄດ້ລົງຖາມຂ່າວ ແລະ ມອບເຄື່ອງບັນເທົາທຸກເບື້ອງຕົ້ນໃຫ້ປະຊາຊົນທີ່ຖືກເຄາະຮ້າຍ ພ້ອມນີ້ ທ່ານຮອງເຈົ້າແຂວງຍັງໄດ້ຊີ້ນຳໃຫ້ກຳ ລັງທະຫານ ແລະ ອົງການປົກຄອງບ້ານ ສືບຕໍ່ຊອກຄົ້ນຫາຜູ້ທີ່ຍັງຊອກບໍ່ເຫັນໃຫ້ໄດ້ໂດຍໄວ ທັງຮັບປະກັນຄວາມປອດໄພໃຫ້ຜູ້ຊອກຄົ້ນ ພາຍຫຼັງຊອກຄົ້ນສຳເລັດ ໃຫ້ສືບຕໍ່ໃຫ້ກຳລັງໃຈ ແລະ ຊຸກຍູ້ໃຫ້ປະຊາຊົນພາຍໃນບ້ານສືບຕໍ່ເຮັດການຜະລິດຊ່ວຍຄອບຄົວທີ່ໄດ້ຮັບເຄາະຮ້າຍ.
ນອກຈາກບ້ານກິ່ວຕະລຸນ 1 ແລ້ວ ຍັງມີຫຼາຍບ້ານພາຍໃນເມືອງຊຽງເງິນ ແລະ ຫຼາຍທ້ອງຖິ່ນພາຍໃນແຂວງຫຼວງພະບາງ ໄດ້ຮັບຜົນກະທົບຈາກເຫດການຝົນຕົກໜັກ ແຕ່ວັນທີ 23-24 ເມສາ 2020 ເຊັ່ນກັນ.