ວັນທີ 24 ເມສາ 2020 ທ່ານ ບຸນໂຈມ ອຸບົນປະເສີດ ຮອງລັດຖະມົນຕີກະຊວງການເງິນ ຫົວໜ້າໜ່ວຍງານງົບປະມານ ແລະ ພະລາທິການ ຄະນະສະເພາະກິດເພື່ອປ້ອງກັນ ຄວບຄຸມ ແລະ ແກ້ໄຂການແຜ່ລະບາດຂອງເຊື້ອພະຍາດອັກເສບປອດຈາກເຊື້ອຈຸລະໂຣກສາຍພັນໃໝ່ (COVID-19) ພ້ອມດ້ວຍຄະນະ ໄດ້ໄປເຄື່ອນໄຫວເຮັດວຽກກວດກາເບິ່ງອຸປະກອນການແພດ ແລະ ເຄື່ອງຊ່ວຍເຫຼືອຕ່າງໆທີ່ສາງພະລາທິການການແພດເຂດດົງໂພສີ ນະຄອນຫຼວງວຽງຈັນ ເພື່ອຕ້ານການແຜ່ລະບາດຂອງເຊື້ອພະຍາດໂຄວິດ-19 ໂດຍຖືກຕ້ອນຮັບຈາກທ່ານນາງ ມະນີສອນ ໄຊຍະເສນ ຫົວໜ້າຂະແໜງພະລາທິການການແພດ ພ້ອມດ້ວຍພະນັກງານກ່ຽວຂ້ອງ.
ໂອກາດນີ້ ທ່ານນາງ ມະນີສອນ ໄຊຍະເສນ ໄດ້ລາຍງານກ່ຽວກັບອຸປະກອນການແພດ ແລະ ເຄື່ອງຊ່ວຍເຫຼືອຕ່າງໆ ລະບົບສາງຕົວຈິງທີ່ໄດ້ມີການເກັບມ້ຽນພາຍໃນສາງ ພ້ອມທັງສະເໜີລະບົບບັນຊີອອນລາຍ ການບັນທຶກການຮັບເຄື່ອງຊ່ວຍເຫຼືອຕ່າງໆ ເຊິ່ງພາຍໃນສູນດັ່ງກ່າວ ປະກອບສາງເກັບມ້ຽນອຸປະກອນການແພດແບບຫ້ອງຕິດຕັ້ງເຄື່ອງປັບອາກາດ ຫຼື ສາງເຢັນ ແລະ ມີສາງເກັບມ້ຽນທຳມະດາ.
ໂອກາດດຽວກັນ ທ່ານ ບຸນໂຈມ ອຸບົນປະເສີດ ໄດ້ໃຫ້ສຳພາດຕໍ່ສື່ມວນຊົນວ່າ: ການລົງມາເຮັດວຽກຢູ່ສູນດັ່ງກ່າວນີ້ ເພື່ອເປັນການກວດກາເບິ່ງຕົວຈິງ ບັນດາຂະບວນການເກັບຮັກສາອຸປະກອນການແພດ ແລະ ເຄື່ອງຊ່ວຍເຫຼືອຕ່າງໆທີ່ໄດ້ຮັບການຊ່ວຍເຫຼືອຈາກພາກສ່ວນຕ່າງໆ ພ້ອມທັງຕິດຕາມລະບົບເອເລັກໂຕຣນິກໃນການຮັບເອົາເຄື່ອງຊ່ວຍເຫຼືອຈາກພາກສ່ວນຕ່າງໆເຂົ້າມາໃນສາງ ຂະບວນການລົງບັນຊີ ການຈັດສັນອຸປະກອນແຕ່ລະປະເພດ ເພື່ອຮັບປະກັນບໍ່ໃຫ້ຕົກເຮ່ຍເສຍຫາຍ ທ່ວງທັນກັບສະພາບການເພື່ອນຳໃຊ້ເຂົ້າໃນວຽກງານສະກັດກັ້ນ ແລະ ຄວບຄຸມການແຜ່ລະບາດຂອງພະຍາດໂຄວິດ-19 ຢູ່ ສປປ ລາວ.
ສຳລັບອຸປະກອນການແພດ ຈະໄດ້ມີການຈັດສົ່ງແຈກຢາຍໃຫ້ບັນດາໂຮງໝໍເມືອງ ແຂວງຕ່າງໆທີ່ມີຄວາມຕ້ອງການຕາມແຜນງານຈຸດສຸມ ພ້ອມນັ້ນ ເພື່ອລົງເກັບກຳຈຳນວນເຄື່ອງທີ່ຍັງຄ້າງຢູ່ສາງ ເຫັນວ່າອັນໃດມີຄວາມຈຳເປັນຢ່າງຮີບດ່ວນໃນການຈັດຊື້ ປັດຈຸບັນຄະນະສະເພາະກິດເພື່ອປ້ອງກັນ ຄວບຄຸມ ແລະ ແກ້ໄຂການແຜ່ລະບາດຂອງເຊື້ອພະຍາດໂຄວິດ-19 ໄດ້ຕົກລົງແຕ່ງຕັ້ງຄະນະຈັດຊື້-ຈັດຈ້າງ ເພື່ອຊື້ອຸປະກອນທາງການແພດ ເຂົ້າມາເພື່ອຕ້ານການແຜ່ລະບາດຂອງເຊື້ອໄວຣັສໂຄວິດ-19 ຢູ່ ສປປ ລາວ ໃຫ້ໝົດໄປ.
