ພົບກັນຕາມເຄີຍກັບ “ເບິ່ງບ້ານເຂົາເອົາບົດຮຽນ” ຄໍລຳທີ່ຈັດສັນກັ່ນຕອງເອົາບົດຮຽນດີໆຈາກຕ່າງປະເທດ ມາຕ້ອນບັນດາທ່ານຜູ້ອ່ານ ເຊິ່ງມີທັງບົດຮຽນທີ່ເບິ່ງໄວ້ເພື່ອຖອດໄປປະຕິບັດຕາມເງື່ອນໄຂຂອງບ້ານເຮົາ ແລະ ບົດຮຽນທີ່ຄວນປ້ອງກັນບໍ່ໃຫ້ເກີດຂຶ້ນໃນສັງຄົມລາວ.
ມື້ນີ້ ຂໍເວົ້າເລື່ອງລະບຽບການເກັບພາສີຢູ່ບາງປະເທດ ເພື່ອເບິ່ງນຳກັນວ່າ ຢູ່ລາວພວກເຮົານັ້ນຄວນມີຄວາມຮັດກຸມຊ່ຳໃດ ກ່ຽວກັບການເກັບພາສີກັບບໍລິສັດຕ່າງປະເທດຈຳນວນໜຶ່ງ ທີ່ເຄື່ອນໄຫວຢູ່ໃນປະເທດພວກເຮົາ.
ທີ່ ສະຫະພັນຣັດເຊຍ: ນັບແຕ່ວັນທີ 1 ເດືອນມັງກອນ ຫາວັນທີ 1 ເດືອນຕຸລາ 2018 ທາງການຣັດເຊຍ ໄດ້ເລີ່ມທົດລອງໃຊ້ກົດໝາຍວ່າດ້ວຍການຄືນພາສີມູນຄ່າເພີ່ມ (VAT) ເຊິ່ງທ່ານປະທານາທິບໍດີ ວະລາດີເມຍ ປູຕິນ ໄດ້ລົງນາມໃສ່ເພື່ອປະກາດໃຊ້ ໃນວັນທີ 27 ເດືອນພະຈິກ 2017 ກົດໝາຍສະບັບນີ້ ມີຈຸດປະສົງເພື່ອຄືນພາສີມູນຄ່າເພີ່ມ ໃຫ້ພົນລະເມືອງຕ່າງປະເທດ ເວລານຳເອົາສິນຄ້າອອກໄປຈາກຣັດເຊຍ.
ກົດໝາຍໄດ້ກຳນົດຢ່າງຈະແຈ້ງວ່າ ຄົນຕ່າງປະເທດທີ່ບໍ່ຂຶ້ນກັບສະພາບເສດຖະກິດອາຊີ-ເອີຣົບ ຈະໄດ້ຮັບຄືນຈຳນວນເງິນພາສີ ທີ່ໄດ້ຈ່າຍໄປໃນເວລາຊື້ສິນຄ້າ ໃນດິນແດນຣັດເຊຍທີ່ມີຍອດມູນຄ່າການເສຍພາສີ ແຕ່ 10.000 ຣຸບປີຂຶ້ນໄປ ລູກຄ້າທີ່ເປັນຄົນຕ່າງປະເທດ ຕ້ອງສະເໜີເບີກໃບບິນຄືນພາສີພາຍໃນມື້ທຳອິດ ຫຼັງຈາກຊື້ສິນຄ້າດ້ວຍມູນຄ່າທີ່ເວົ້າມາຂ້າງເທິງນັ້ນ.
ແນວໃດກໍດີ ກົດໝາຍຍັງໄດ້ກຳນົດປະເພດສິນຄ້າ ທີ່ຈະບໍ່ໄດ້ຮັບຄືນພາສີມູນຄ່າເພີ່ມ ເຊິ່ງແມ່ນສິນຄ້າທີ່ຕ້ອງໄດ້ເສຍພາສີຈຳໜ່າຍພິເສດ ແລະ ສິນຄ້າທີ່ນອນຢູ່ໃນບັນຊີພິເສດຂອງລັດຖະບານ ກົດໝາຍສະບັບນີ້ ໄດ້ຜ່ານການທົດລອງໃຊ້ຢູ່ 3 ຈຸດ ຂອງຣັດເຊຍ ລວມມີນະຄອນຫຼວງມົດສະກູ ນະຄອນແຊງເປແຕກບວກ ແລະ ນະຄອນໂຊຈີ.
ທີ່ ອິນໂດເນເຊຍ: ໃນຕົ້ນເດືອນກັນຍາ 2019 ຂ່າວຕ່າງປະເທດຈາກອິນໂດເນເຊຍ ໄດ້ໃຫ້ຮູ້ວ່າ: ທາງການຂອງປະເທດນີ້ ໄດ້ອອກກົດໝາຍເກັບພາສີມູນຄ່າເພີ່ມ ຈາກບັນດາບໍລິສັດເຕັກໂນໂລຊີຂ້າມຊາດຂອງຕ່າງປະເທດ ເຊັ່ນ: ກູເກິນ (Google) ແລະ ອາເມຊອນ (Amazon) ເຖິງວ່າສອງບໍລິສັດທີ່ວ່ານີ້ ບໍ່ມີສຳນັກງານຕັ້ງຢູ່ໃນປະເທດອິນໂດເນເຊຍກໍຕາມ.
ຂ່າວໃຫ້ຮູ້ຕື່ມວ່າ: ໃນປີ 2016 ບໍລິສັດ ກູເກິນ ໄດ້ມີບັນຫາກັບອິນໂດເນເຊຍ ຍ້ອນທາງບໍລິສັດໄດ້ຫຼີກລ່ຽງພາສີ ລວມທັງພາສີລາຍຮັບຈາກການໂຄສະນາ ພາສີມູນຄ່າເພີ່ມຂອງອິນໂດເນເຊຍນັ້ນແມ່ນຢູ່ໃນອັດຕາ 10% ຂອງມູນຄ່າທັງໝົດ ເຊິ່ງກຳນົດໄວ້ສຳລັບຜະລິດຕະພັນ ຫຼື ການບໍລິການເປັນສ່ວນໃຫຍ່.
ທີ່ ຝຣັ່ງ: ໃນຕົ້ນເດືອນກໍລະກົດ 2019 ຝຣັ່ງ ໄດ້ກາຍເປັນປະເທດທຳອິດໃນເອີຣົບ ທີ່ໄດ້ອອກກົດໝາຍເກັບພາສີຈາກເຫຼົ່າບໍລິສັດເຕັກໂນໂລຊີຂ້າມຊາດຂະໜາດໃຫຍ່ ລວມມີ ກູເກິນ ແອບເປິນ ເຟດບຸກ ແລະ ອາເມຊອນ ເຊິ່ງຂຽນເປັນໂຕຫຍໍ້ວ່າ “ກາຟາ” (GAFA) ກົດໝາຍນີ້ຮ່າງຂຶ້ນຖືກຮັບຮອງເອົາ ໂດຍສະພາຜູ້ແທນບາຊະດອນ ແລະ ສະພາສູງຂອງຝຣັ່ງ.
ອັດຕາພາສີຂັ້ນຕ່ຳຢູ່ຝຣັ່ງນັ້ນ ຢູ່ໃນລະດັບ 3% ສຳລັບລາຍໄດ້ຂອງບໍລິສັດເຕັກໂນໂລຊີ ທີ່ມີລາຍຮັບໝູນວຽນໃນຕະຫຼາດຝຣັ່ງຢ່າງໜ້ອຍ 25 ລ້ານເອີໂຣ ແລະ ຫຼາຍກວ່າ 750 ລ້ານເອີໂຣ ໃນຕະຫຼາດໂລກ ກົດໝາຍນີ້ຍັງໄດ້ກຳນົດການເກັບພາສີ ແຕ່ປີ 2019 ຄືນຫຼັງ ເຊິ່ງທາງການຂອງຝຣັ່ງ ຄາດວ່າຈະສາມາດເກັບລາຍຮັບເຂົ້າປະເທດໄດ້ປະມານ 400 ລ້ານເອີໂຣ.